Hla Phuah Thiam Mi; Fam Lalzova

Tun ṭuma ka thu rawn ziah hi kan Mizo zinga hla phuah thiam hmasa leh hmingthang tak, Fam Lalzova chanchin tlangpui niin, ziah kim loh lai leh ziah dik loh laite a awm a nih chuan a hmasain he ka thuziak chhiartute hnenah ngaihdam ka rawn dil hmasa a ni.

Kan Mizo zinga hla phuah thiam hmasa leh lar tak mai Fam Lalzova kha ni 2.12.1924 khan Lunglei Rahsi veng ah a lo piang a. A pa hming hi Hnuna niin a nu hming Aimawii a ni. Indopui II–na a lo chhuah khan pawl nga a zir zo hman chiah a. Lemziah leh thil lem siam lama a talent ṭhatzia hriain SDO Wiscott an Aizawlah hruai pheiin, Aizawl aṭang chuan kan Mizo zinga thuziak thiam tak pakhat chuan lehkha zir turin Calcutta (tuna Kolkata ni ta) ah hruaiin, sikul luhna tur an hriat lawk loh avang leh a lung a len em avangin Mizoramah a lo chuang chhuak leh a, lehkha zir chu a bansan a ni awm e.

Fam Lalzova kha kan Mizo zingah chuan Lengzem hla phuah thiam zinga hming langsar tak mai niin, hriat theih chinah hla hi 50 vel zet a phuah a ni. Kum 1943 aṭanga kum 1945 chhung khan hla 48 vel a phuah a, hriat theih chinah sakhaw lam hla 3 a phuah a, hla lenglawng lam hi 5 vel phuahin a hla phuah dangte chu hmangaihna lam hla chi vek a ni.

Rimawi hi a ngainain heng Spainsh Guitarr, Hawaiin Guitarr, Violin, leh Ukulele te hi a tum thiam hle a ni awm e. Mi lungleng thei mi nih naka laiin a bialnuin pasal a neihsan a, chumi avang chuan "Khawnge i kal dawn sawi rawh Parte, ka zui ang che," tih hla a phuah phah hial a ni awm e.

Fam Lalzova hla phuahte hi kum 1960 hma lam kha chuan Zoram tluanah tlangvalten, se dar tia zet ṭingṭang awrhin zan thla engah mimal leh a huhovin an sa uar hle ṭhin a ni awm e. Zan thla engah nulaten luhkapuiah là an kaih a, an bulah an in leng tlangvalten Fam Lalzova hla phuah an han thlawh meuh chuan a lo hria nu leh paten an vanglai ni an dawn kirin mutmu pawh an tuah thei meuh lo a ni.

Ni 2.12.1945 khan a pian champha kum 21-na a lawm hnu lawk, ni 8.12.1945 khan khawsik natna avangin chatuan ram min lo pansan ta a ni.

Mi lungleng hmingthanga sawi a nih avangin Fam Lalzova ti a sawi ṭhin a ni.

- George L.Ralte, Aizawl West