MPF inen lètna turte

Mizoram People Forum hi Mizoram tana thil hlu a ni a, anni hi awm lo ta se kan inthlan kha a bawlhhlawh ang tih chu tlang hriat a ni. MPF-in Street Campaign an han kaihruai tlatte kha a ṭha, boruak sang leh bawlhhlawh tur an uap a, Common Platform an siam ang kha a changkang a, chuti chung chuan MPF hian hmasawnna tur an la nei.

1. MPF hi an ṭhahnem tawk tur a ni. Khaw ṭhenkhat report a lan danin MPF indaih lohna hmunah chuan an ven theihnaah boruak a ṭha, ven theih loh chin an neih khan pawisa sem kher loh pawh boruak ṭha lo a awm phah ṭhin. MPF hi an la awm zel dawn chuan kalphung mumal tak siamin chumi mil chuan Duty insiam se, mi ṭha tan MPF hi an hnawksak lo va, thil tih sual tum tan an hnawksak avangin an awm tam hrim hrim khan tihsual tumtu an biru ṭhin tih hriat a ṭha.

2. MPF hian House to House campaign khap hun an neih kha a ṭha hlea a hriat rualin, khawng taka an kalpui a ngai a ni. MPF thu awih zawng chuan campaign an ti tawp a, a thuawih lo zel tan inthlan dawn hnaia an campaign khan chance a ṭha ve leh thei tlat. Thingtlang lamah chuan an kengkawh ṭha a, khawpui lamah chuan an kengkawh ṭha lo tih a ni. Rualkhai takin House to House Campaign khapna hi kengkawh tawh se, MPF an zahawm zual dawn a ni.

3. MPF hi an huaisen a ngai a, MPF hming an put tawh chuan zuam zawng leh hlauh zawng a hranpa nei tawh lo se a ṭha a ni. MPF chuan inthlan chhung chuan a ṭul a leh Chief Minister emaw, Party President pawh a khak ngam mai tur a ni, MPF tan hlauh neih a thiang lo ang.

4. MPF in Banner leh Poster tar phal zat a siam kha thil ṭha a ni a, senso a tih tlem bâkah inthlan boruak sang lutuk; vote hmuhna ni si lova intlansiakna a veng a, MPF-in mahni khua leh vengah ṭheuh Poster leh Banner hi uluk zawkin an ven a ngai, chhiar thlap thlap se a ṭha a ni.

5. MPF hi 2028 inthlanah chuan Mizoram pumah ding tawh se, Mizoram inthlan hi a fel fai zual ang.

- Ramthansanga