RINNA FIAHNA – ENGTIN NGE KAN CHHÂN DAWN LE?

Kuminah keini Presbyterian Kohhran chuan ‘Kristiante rinna vawn him,’ tih Puitling Sunday School-ah kan zir a, a hun takah kan zir ni pawhin a lang.

Tunah chuan kan rama inthlanna pawimawh ber mai, mipuite aiawha kan rama roreltu turte kan thlang zo fel chiah a, inthlanna pawh muanawm takin kan nei tih kan hria. He kan inthlan hian kan ram mipui a nghawng tak meuh va, vote chhiar ni pawhin mipui tam zawk mahte chuan mahni hna pawh ngaihsak hlei thei lovin tute nge kan thlan tlin tih ngaihvenin beng kan chhi ṭhup ṭhin a, ram mipui a nghawng tak meuh a ni. Tichuan kan sorkar ropui leh thiltithei tak chuan Kristiante ni pawimawh, Amah Pathian, urhsun leh hlim taka kan biakna ni Sunday chu vote chhiar hun atan a han ruat ta hmiah mai a. Ṭhenkhat chuan UPSC Exam te pawh Pathianniah tho an conduct-a, kan ti tho a lawm an ti a, hei leh vote chhiar hi chu a inang lo. UPSC Exam hi chuan mipui a nghawng lo va, vote chhiar hi chuan kan ram pum a nghawng a ni.

Chutiang chu a nih avangin Pathianni (Sunday-a)–a vote chhiar chu kan ram, Mizoram tan a ṭha lo ve tiin Sunday ni lo ni danga sawn turin ECI hnenah MKHC te, Political Party hrang hrangte pawhin dilna an thlen a, tun thlengin chhanna lawmawm kan beisei ṭhup chu kan la hmu lo niin a lang. Chutih laiin Chanchinbu lamah chuan ECI-in vote chhiar ni tura a ruata chhiar thei turin Official lam chu an inpeih vek tawh tih kan chhiar a, kei chu ka dam hlawl lo!

Tun thlenga chhanna lawmawm a la awm loh avangin MKHC huaihawtin Political Party hrang hrangte leh NGO hruaitute chuan vote chhiar hun chu Sunday ni lo, hun remchang danga sawn turin ECI-ah CEO Mizoram kal tlangin ni 9-11-2023 khan dilna chu an theh lut leh ta a ni. Hei hi chuan rah ṭha a chhuah ngei beisei phawt teh ang.

Hetah hian pawimawh bera lang chu Official-te an niin ka hria. Kan Official-te hi a tam zawk daih chu keimahni ang tho, Kristian, Pathiannia Pathian biaa ṭul nileng ve ṭhinte an ni; anni hian ‘Sunday hi kan Pathian biaa hun kan hman nilenna ṭhin a ni a, he ni hi chuan vote kan chhiar thei lo vang,’ ti ngam se, MKHC leh NGO dang zawng zawngten a ruala an dilna hian awmzia a nei ngeiin ka ring.

Heti pawha chhanna lawmawm kan hmu lo va, ECI hian vote chhiar ni chu Sunday ni lo, hun remchang danga sawn lova a tilui dawn a nih chuan, kan ram mipui ṭang rualin MKHC te, Political Party te, Y.M.A. te, MHIP te, MUP leh NGO dang zawng zawngte leh vote chhiar tura ruatte (kan sorkar Official te hi Kristian ṭha tak tak, mahni awmna Kohhrana rawngbawltute pawh tam tak chu kan ni ang) hian, "Pathianniah vote kan chhiar dawn lo," kan ti thei ang em le? Hei ngei hi kan chhan dan tur niin kei chu ka hria. Chutia kan tih chuan khawvel hian an hre thuai dawn a, khawvel sorkar lian dangte mithmuhah pawh thiam kan chang ngei ang tih ka ring. ECI kut ke ber Election Department leh Sorkar hna thawk dang zawng zawngten kan Pathian biakna ni pawimawh takah hian vote kan chhiar thei lo ti ngam ila, kan tawn tawn tawng mai turin kan inhuam mai lawm ni le? ENG TIN NGE KAN CHHAN DAWN LE?

- T.Vanlawma, Hunthar veng, Aizawl.