ZORAM THAR A LO PIANG DAWN

A va nuam dawn ve le, Inthlan campaign lai khan party tin thil tum chhiar theih leh ngaihthlak theihin an puang zar a. Zoram khawvel chuan hun thar a chuang kai ngei ang. Tu party pawh tling se, hmasawnna hi a zuanin a zuang turah beisei phawt ang.

Zawlnei inti ho khan Zoram thar lo piang tur an hmu lawk nasa mai a, eng emaw tak chu Zoram hian hun thar a tawng dawn a ni mai thei, chu hun thar lo thleng turah chuan anmahni pawhin rorel ve an chak nge ni? an in candidate ve ta hial a, mahse tling lo tur an nih an hresa niin a lang. Zoram thar lo thleng tur auchhuaktu kan ni e, te an ti vel ta mai mai a. Hmuh chu an nei ve niin a lang. Chuvang a lawm, sorkar thar lo piang tur hi a nghahhlelhawm em em.

BJP PARTY : Anmahniin sorkar siam theih chu an beisei pha lo, mahse sorkar thar lo piang tur hi, majority seat la phak an awm an ring lo, sorkar tharah tel ve an inbeisei. An beisei ang a thleng a nih chuan, Central malsawmna hai lut thei Party niin an insawi, an hai luh theih tur pawh a turu hlawm khawp mai. Zoram hmel thar a lang ut dawn, a va nghahhlehawm tawh tak em.

CONGRESS PARTY: Interview hrang hrang leh Press Statement kan lo en chuan, an party an chak phak an ring. An chak a nih chuan mi intodelh tumte an pui dawn, mi tam tak intodelh kan pung tawh dawn. An hotupa mi thar hmangin boruak thar an siam ang, mi corrupt ho tan an nelawm lutuk tawh dawn lo a nih hmel. Central lamah INDIA in BJP an lehthal an beisei a, an beisei hi a lo thleng a nih chuan Central bu puiah Mizo pa kan ṭhu pha hial ang, Central blessing nen Zoram an hruai dawn. Hmasawnna lian tak kan hmu ang, a va nghahhlehawm tawh tak em.

MNF PARTY: Covid hri leng karah pawh, khati khawp khan hmasawnna kalpui theiin an insawi. An party dinhmun a la chhe lo, tling leh ngei turah an inngai. An sorkar leh a nih chuan, hmasawnna hna an chhawp lian tak takte an chhunzawm ang. SEDP pawh awmze nei zawkin an kalpui thei tawh dawn. Leiba ngah nia Party dangin an puhna kha, ngah niah an inngai lo, hmasawn nan chuan central phal chin puk zel an inthlahrung dawn lo. Term hmasa ai chuan hmasawnna lian tak an kalpui dawn. Zoramin hmel thar a hmu ngei ang. Nghahhlelhawm tak a ni.

ZPM PARTY : Sorkarna chang tura beiseina nei lian ber an ni. An phur em em ringawt tawh mai a ni. Sorkar thar kalpui dan tur ruangam an aupui nasa tawh. Upa tapchhak meilum ai thlengin sorkar thar hmalakna tur an sawi zat zat thei tawh. Corruption an do bur dawn, Kut hnathawktute thlai hralhnaah harsatna a awm tawh dawn lo, ṭhalai intodelh tum an kutah an kai dawn. Rorelnaah Pathian ram thlentir an tum bawk. A va nghahhlehawm tak em.

CHUTICHUAN: Eng party pawh lo sorkar se, Zoram hian hmel thar a hmuh tawh beisei ila. Heti khawpa thil ṭha tih tum Party ho hian, Zoram hi a ngaiah min hnuk hun hun zel a nih vaih chuan, ṭhangtharte an beidawng tawh ang. Zoram thar chu thisen nena a luan a ngai tawh ang. Chumi thleng lo tur chuan beiseina sang tak i nei ang u.

HEI HI KA LO CHAH VE ANG CHE U: In campaign hla kha theihnghilh miah suh u. In insawi ang kha in nih kan beisei avangin, ni sensa hnuaiah Vote thlak pawh kan phur hle a nih kha. In intiamna kha rawn tihlawhtling ngei ngei ang che u. Chutichuan in sawi lan vak loh, thil pahnih chiah chah duh che u ka nei.

1. RAMSA HUMHALH: Kan ramah hian Ramsa a lo tam hle ṭhin tih ṭhangtharte hriat turin, Youtuber hrang hrangin an rawn chhawp chhuak ṭhin. Hmanlai pasalṭha hrang hrang an kawmna kan lo ngaithla a. Mi pakhatin sa an kah tam theihzia chu maw, za aṭang zanga kap deuh vek an ni. Lasi zawl Pasalṭha phei chuan an kap awlsam thei ropui mai si. An Lasi zawlte lah an sawi hmelṭha thei rap maw le!

Mahse maw, tunah chuan sate hi a vang tawh em em mai a, silai kan nei ṭha tulh tulh tawh bawk si, sava kah thlakna lah kan nei ṭha tawh teh mai asin. He ram ṭha leh ramngaw tamnaah hian heti taka sa a vang ta mai hi, dan thar kan siam a ngai ve tawh a ni.

Sapram lamah chuan, sa hi kah phal hun an hawng, chu pawh a kap duh chuan sorkarah pawisa pein phalna an la phawt ṭhin. Phalna la lo sa kap an man chu a hremna pawh an ti na khawp mai. Hetiang dan hi kan kalpui vat loh chuan kan ramah hian sa leh sava hmuh tur a awm lo thuai dawn. Dan thar rawn siam vat teh u.

2. DARKAR BI INHLAWHNA: Party tinin kut hnathawktute intodelhna kawng zawn in tum vek a, heta kawng pawimawh tak chu, a taima apiang hlawh tamna kawng kan zawnsak hi a ni. Chutih rualin mahni remchan huna hlawh neia inhlawhna kawng siamna a ni bawk. Hetiang inhlawhna hi ram changkang zawng zawng chuan an kalpui vek tawh.

Hmanah khan kan Assembly Speaker khan hetiang inhlawhna kalpui a duh thu kha a sawi tawh a, a sawiah a ral ta mai bawk si a. Nangni sorkar thar siam turte khan, dan thar rawn duang chhuak hram teh u.

- Lalrinliana Colney