Khawpui nula vs Thingtlang nula

Hman deuh khan kan miss-in class a lak laiin thingtlanga a ṭhian Pastor pakhat, thingtlang nula nge khawpui nula felin taima zawk? tiin a zawt a. A chhanna chu thingtlang nula ai khawpui nulate an taima tawh zawkin an fel tawh zawk tih hi a ni.

Kan tet deuh lai, kan tleirawl chhuah tan tirh lai leh tun hnu thleng pawha khawpui nula aia thingtlang nula fel zawk tur leh taima zawk tura kan lo ngaih ṭhinna kha a dik lo chho mek niin a lang.

Tun hmate kha chuan nupui atan mipa tam takin khaw-pui nula aiin thing-tlang nula an duh zawk ṭhin. A chhan chu khawpui nula aiin thingtlang nulate kha an taima zawk a, hna thawh hreh an nei lova, hna rum thawhah phei chuan khawpui nulaten an tluk lo hle.

Chubakah sex lama thianghlimna chungchang pawh an fihlim bik a, nu leh pa tam takin an fate nupui atan thingtlang nula an duh zawk. Mahse tunah chuan engkim a inthlak dang-lam ta a ni ber.

Thingtlang nula tam tak hi khawpuiah lehkha zir leh thil dang tiin an han awm a, khawpui nun an han tem ve a, an khuaa an han haw leh meuh chuan hna thawh an lo zak fo tawh ṭhin. Changkang tak tak si loin an inti changkang a, chu chuan an nunah thatchhiatna a thlen a, khawpui nula an tluk lo ṭan mek a ni ber.

Tunah erawh thing-tlang nulate aiin khaw-pui nulaten eng hna pawh thawh an hreh tawh lo zawk a ni. Thingtlang nula-in hna thawh hreh leh zah a neih laiin khawpui nulate erawh hna thawh tur zawngin state pawn leh ram pawn thlengin an phi vel ruai a ni ber mai.

Khawpui nula zinga eirawng bawl leh buh ṭhap thiam lo tam tak an awm rualin thingtlang nula tam tak zingah pawh eirawng bawl thiam lo leh buh ṭhap tak ngial pawh thiam lo tam tak an awm ve mek zel tho.

Inkhawmah pawh thingtlang nulate aiin khawpui nulate an taima tawh zawkin, kawng tam takah entawn tlakna an nei tam tawh zawk a ni. Sum zawn leh dehchhuah dan kawng-ah pawh thing-tlang nulaten khawpui nulate an tluk lo chho mek a, hetiang a nih chuan chhungpui nu atan pawh thingtlang nulate chu an hnawng tawlh tawlh ang a, khawpui nulate erawh an tlatlum tulh tulh thung dawn tihna a ni.

Thingtlang nula aia khawpui nula an ṭhat zawkna ka sawi tam zawk avang hian thingtlang nulate an fel lo vek e ka tihna a ni lo a, thingtlang nula zingah pawh hnathawh zak lo, hlawhtling tura eng pawh thawh huam mi fel tak tak an la awm ṭeuh tho e.

- Nawlchunga Chinjah, Siaha