Prepaid meter hman ve a hun em?

State tam takah chuan prepaid meter hi electric supply-tu corporation tam tak chuan an hmang tawh.

A awm dan tlangpui chu prepaid mobile phone connection hman dan nen a inang thawkhat. Mizoramah hian khawpui lian deuh deuh State capital leh District capital-ah te hian mipuite tan bill pekna a tam zo thei lo a, nilenga bill pe tura intlarte a ngai a. A changin theihnghilha bill pek lohte a lo awmin chawi belh (surcharge) a awm ṭhin. Hengte avang hian electric latu tam tak hi chuan prepaid meter hman hi an duh zawk tawh hial awm e. Mobile phone advance a kan pek ang hian mahni remchan danin bill hi pek theih a ni dawn a ni.

Consumer-in a peksa (balance) hi a zawh dawn chuan meter hian hriattirna ri (sound) a siam ṭhin. Hei hi Rs 50 aia tlem emaw Rs 100 aia tlem emaw pawisa a la awmin hriattirna hi pe tura siam theih a ni. Hriattirna hi holiday-ah emaw chuan ri lo tura set theih a ni. Hetiang a lo nih chuan office kal ni velah consumer-in a va topup a ngai a. Chutianga va ti lo te chu tlai lam aṭangin an in a electric kha meter khan a electric chu a off mai dawn a ni.

Consumer-in topup a va thun hunah number chhutluh tur hriattir an ni a, chu number chu meter-ah khan number awmna (keyboard) a awm a, chutah chuan chhut luh tur a ni. Balance neih zat en turin hmehna tur a awm a, chuta ṭang chuan a hriat mai theih a ni.

Hetiang meter hi a to deuh a, Rs 7000 chung lam a ni hial ang. Amaherawhchu, consumer-ten meter hawh man (meter rent) an pe mai ṭhin a ni awm e.

Hetiang ang meter vuah hi consumer-te leh electric supply-tute tan awlsam zawkna tam tak a awm a ni.

Consumer tana a awlsamzawknate

1. Consumer-ten bill pe tura office a ni leng lenga intlar a ngai lo.

2. Eng pawl emaw ruaia bill pek man chawi hran a ngai lo bawk.

3. Mahni inren thiam leh bill peksa in a daih rei mai a ni.

4. Meter reading lak a ngai tawh lo a, meter reader-te chunga phunawina a awm tawh lo.

5. Electric hman man a lo to dawnin sum leh pai nei deuh tan chuan rei tak chhung tla tur a lei lawk theih (petrol to dawna kan lo in stock lawk ṭhin ang deuh hian).

Electric Supply-tu

Corporation (Department) tan

1. Electric hman man pek loh vanga electric chawk luh nan leh consumer-ten electric ṭha zawka an hmuh nan hma an lak theih.

2. Consumer-ten dik lo takin an hman leh hman loh chu consumer-in topup a rawn thun dan aṭangin a hriat theih. Thla hnih khat tla tur lo lei lawkten reitak rawn lei belh loa an awm chuan thil dik tawk lo a awm a ni tih a rinhlelh theih.

3. Meter reading ti tura meter reader tam tak rawih a ngai tawh lo a, bill chawk turin office-ah an ṭhut nghuk a ngai tawh lo bawk.

4. Thla tina consumer-ten an hman dan (sale data) hre turin tihdan chi 2/3 a awm thei.

(i) Thla tin meter reading chhinchhiah.

(ii) MRI (Meter Reading Instrument) hmangin meter lo record kha lak chhuaha office a chhut chhuah leh theih a ni.

(iii) Consumer-ten topup an rawn tih dawnin an hman dan history hriatna tur number meter a hmehlan theih (digit 20 lai a ni awm e) chu consumer-ten rawn hre tura hrilhin a hriat theih bawk.

A enga pawh chu ni se la consumer-te awlsamna hi ngaih pawimawh tur a ni a, ngaihtuahna sen deuh a ṭha ang.

- Chhara