Bazar ṭha kan mamawh

Mizoram sorkar kal tawh leh kal mekte'n ram leh hnam tan hna an thawk a, tih ṭhat tak tak pawh an ngah awm e. Mah se, sorkar kal tawhte leh sorkar kan neih mekte duhkhawp lohna ka neih chu bazar lama an hmalaknaah hian a ni.

Mizoram khawpui ber Aizawla kan bazar dinhmun han thlir hian lung a awi mawlh lo. Kan chaw hmeh bazar-te hi kan hrisel loh phah ang tih hlauhawm khawp a ni. Chawhmeh bazar pui ber Aizawl New Market pawh hi a ṭawp takzet a ni. Ruah a sur phei chuan a chiau nuai a ni ber mai. Kan ei leh in zawrhna hmun a thianghlim loh chuan kan hriselna hian tuar chin a nei ngei ang.

Ram changkang zawk leh hmasawn tawhte dinhmun anga din chu a har mai thei, mahse heti lutuk lo deuh hian kan bazar-te hi cheiṭhat nise a duhawm hle. Aizawl New Market ngat phei hi chu a ṭawp piah lamah, a hlauhawm hle. A buidling a hlui tawh si, dawrtu an tam si a, vanduaina tawh palhte pawh a hlauhawm a ni. Chuvangin, kan sorkar hian a rang lamin bazar ṭha tak siam vat se ka ti hle.

Tin, kawng sira chawhmeh zawrh a ni ṭhin hi ka vei khawp mai. Motor khu leh thil dang dang lakah a him si lo, hei hian kan hriselna dinhmunah nghawng a neiin ka ring tlat. Hetia kawng sira chawhmeh zuar hi state dang aṭanga mikhual lokalte hmuhah pawh a mawi lo hle. Kan hriselna dinhmun atana thil pawi thei a nih bakah, sorkar tan pawh thil zahthlak a niin ka hria. Chuvangin, kan sorkar hian a rang lamin bazar ṭha tak, mi tam zawk inzawrh theihna tur hi ngaihtuah vat vat se a duhawm hle.

Kawng hrang hrangin kan ramin hma a sawn mek a, mahse kan ei leh in tur zawrhna ber a thianghlim lo a nih chuan hmasawnna kairual lo tak a ni ang. Thil dang zawrhnate chu a lo ṭawp deuh a nih pawhin thuhran, ei leh in tur zawrhna hi chu a thianghlim a ngai a ni. Mithiam ka ni loa, ka zirchiang hek lo. Mah se, kan ei leh in tur zawrhna hmun ṭawp lutuk hi chuan kan hriselna dinhmunah nghawng a neiin ka ring tlat.

Kan sorkar hian a duh a, ngaihtuahna tak tak a seng a nih phawt chuan bazar ṭha tak hi a din thei ngeiin ka ring tlat. Tuna kan bazar-te hi kan pan lo thei si loa, phur lo takin kan bazar a ngai ṭhin. Ruah sur nikhua phei hi chuan chawhmeh bazar-a kal nisiin, kan berh chhuak vek zel. Kan sorkar hian kan chaw hmeh zuartute'n thianghlim zawka chawhmeh an zawrh theihna tur hi ngaihtuah vat se ka va ti em.

- Lalrinpianga