VOTE THLÂKTU PATHUM

Le, Mizoram state inthlanpui vote thlâk vawi 9-na chu kan zo ta! Tûna kan nghah leh vauchher chu vote chhiar hun a ni tawh a; mahni party ṭheuh tlinga ngaih hun lai leh mahni ngaihdân vawrh hun lai tak a ni a; a nawm lai tak a ni e.

Inthlan apiangin mihring mize inang lo tak tak pathumin vote an thlâk ziah a; chûng mite chu an bih den den dâwn a ni.

Vote thlâktu pakhatna – party behchhan: Hêng mite hnênah chuan campaign theih an ni lo va; engpawh tiam ila, an party ni lovah chuan vote an thlâk dâwn chuang lo. ‘Party ruih chilh’ an ni a; ‘vawkpui pawh in-candidate mah se, ka vote tho vang’ tih ngaihdân kha a pawm nghet tlat a, an party-ah an rinawm bur mai a ni. An party a chhiat ber lai pawhin a chhuahsan lo va, an awmna party-ah an lung a âwi a, therhlo an beisei hran lo. An party candidate chu a hmêlhriat a ni emaw, ni lo emaw; tu pawh niin eng mizia pawh pu mah se, an party official candidate a nih chuan ngâwi rengin a vote a; mi dang angin a bengchheng ve lêm lo. Nu pakhat pawh, a pasal chhûngte lam tu emaw ber kha VC/LC-ah a ding ve a; a pasal chuan, “Nu-i, kan vote ve ang chu ti raw?” a ti chu an nu chuan, “I duh leh vote rawh; kei chu ka vote dâwn lo. Kan party mi ni lo chu ka vote thei lo,” zu ti hmak a!

Vote thlâktu pahnihna – mihring behchhan: Hêng mite hi ‘âwn lam nei lêm lo (neutral) an ni’ pawh ti ila, kan ti sual tam pui lo vang. Party âwn lam an neih loh avângin a mihring (candidate) azirin vote an thlâk mai ṭhîn. Candidate zîngah ṭha leh fel an tih ber an vote a, sumpai leh therhlo an beisei lêm lo. An chhûng hnaivai leh ṭhian ṭha te an nih chuan an vote mai bawk a; neutral an nih miau avângin politician tân pawh ta neih hleih theih an ni lo. Inthlan lehpekah chuan mi dang an vote leh daih thei a, rin ngam an har ṭhîn ngawt ang le. Therhlo an beisei lo kan tih mêk laiin vote hralh hi an lo chîng ru zêk a, a ngam huai huai chan a ni tawh mai.

Vote thlâktu pathumna – sumpai behchhan: Hêng mite ve thung hi chu, a chunga kan sawi tâk ‘vote zuar leh hralh’-te ai mahin an nasa zâwk. “Pawisa min pêk loh chuan vote ka thlâk dâwn lo,” an ti hmak ngam a nih chu. A ṭhen phei chuan candidate tin hnênah kut an dawh a, an duhnaah an vote leh tho lâwi a, mi hlauhawm tak an ni.

Nang eng nge i dinhmun ve le?

– V. Kûngtea,

Awmhar Cabin