INTHLAN LEH A BEHBAWM

MLA inthlan chu buaina awm lovin kan zo ta a, vote tla zawng zawng pawh pindan rinawm tak chhungah December ni thuma chhiar turin kalh hnan vek a ni ta. Campaign au-hla hrang hrang hriat nuam deuh deuh a awm nual a, tun hma anga mimal inbeih vak vak ang kha kan kal pel ṭan ni te pawhin a lang e.

STREET CAMPAIGN DANGDAI KAN HMU:- Tun hma lam inthlan campaigna kan la hriat zen zen loh, "Thlawitenali" tih aia, "Kan sualte ngaidamin kan ram a tidam leh ang," tih hla hmun inkarki tak taka an lampui mup mup mai hi thil chhinchhiahtlak tak a ni awm e. Hmun pakhatah phei chuan Gospel Camping chhuak ang maia hnehna puang au thawm hriat tur a awm bawk a, eng emaw thawktu a awm ngei niin a lang e. MPF kaihhruaia Campaign leh Pathian fakna hla saa han lam mup mup mai chu, 'Thlawitenali' tih hla, meng mang lova lampui dawrh dawrh ai chuan a ri pawh a mawi hle a ni! MPF te street campaign chhunga an hmalakna a fakawmin a zahawm a, boruak an vawng dai hle niin a lang. Hetih lai hian MPF leh Pol. Partyte thuthlung zawm lo party ṭhenkhat, election puan tawh hnu a house to house campaign lo nei ngar ngar an awm bawk a, a zia lo hle a ni. Dan pawisak lohna a ni a, campaign lai aṭanga dan bawhchhe lui ṭhinte aṭang hian rorelna dik kan beisei ngam ang em tih hi lo inzawt teh u le.

MPF AN FAKAWM:- MPF dinna hmun leh la din ve lohna hmun chu boruak a danglam thu an sawi hi a dik hmel e. Hetih lai hian MPF duty pawh an inang vek lo va, ṭhenkhat chu Pol.Partyte nena an thuthlun ang taka ṭhahnem ngai taka thawk an awm laiin, an duty chhan hre chiang lo ang maia lo dul deuh an awm niin a lang . Aizawl tlak lam hmun pakhatah chuan mi pakhat pawisa sem lai hmutuin MPF te a hrilh vat a, mic-ah a semtu party hming sawi lang lovin an au khum tih an sawi. MPF duty ulukna hmunah chuan pawisa semtute an duh angin an che thei lova, last minute an hman ṭangkai hman loh thu thlenga sawi rik a awm a ni. MPF te hi ṭang sauh sauh se, dik lo taka pawisa sem chingte hi kan um bo ang a, inthlanna thianghlim leh rorelna ṭha kan la hmu mai ang. Pawisa sem tur ven kawngah hian pol.party ṭhenkhat worker-te, hmeichhia thlengin an ṭangkai hle tih an sawi a, zalen taka pawisa sem a tiziaawm deuh niin a lang a, an fakawm hle mai. Aizawl chhuah lam hmun pakhatah chuan Polling area bul hnaia pawisa sem tum ni awma langte thlengin MPF duty-ten an hnawh darh thu dawn a ni bawk.

KHIANGKAWI IPTE AH TAM BER NI! : Aizawl tlak lam veng pakhatah chuan pawisa a leng nasa hle tih an sawi a, inthlan ni kha Khiangkawi ipte ak ngai lote thlenga puar nelhnawlha ipte ah tam ber ni zu ti hial a! Tlangval pakhat pawhin pawisa sem lai a va nang fuh a, cheng zasarih a dawn thu leh pawisa semtute a vote chuan loh thu a sawi an ti. Heng ipte aka pawisa semtu zingah hian Kohhrana rawngbawltute, hmeichhia thlengin an bang bik lo an ti leh zel a nih chu. Hetianga pawisa semtirtu, a semtu, a lo dawngtute leh a lo hmutute thlengin Biak in pakhata lawi ho in awm ngei ang a, Vanram kai tum ṭheuh ṭheuh hi engtin nge ni zel ang le? Sawi zel teh ang aw, pawisa sem tura tih ṭhenkhat chuan an sem zo hman lova or sem zo duh lo va, veng pawn lama riak bo ta daih an awm zu la ti lehzel a, Kristian ni tak maw le? Vote thlak zawh tawh hnu thlenga kamnam deuh thar thar chunga cheng zanga note clip la ak puar nalhte pawh an awm an ti leh zel nia! Sawrkarin pawisa a bat hnem tehlul nen, pawisa lo la sem thei pawl hi an awm tho a nih awm hi maw. Hetianga pawisa hmanga in lei tlin tumte hian min hmusit a, an lak aṭang hian rorelna dik a beiseiawm loh hulhual a ni. Ram hmangaihtu (nationalist) ni lovin, mahni hmasial (selfish) an ni a, mi hlauhawm an niin kan hnawl ngam tur a ni ang.

HMEICHHE HUAISEN :- Aizawl tlak lam hmun pakhatah vek Candidate pakhat chu tlai dar li hnu, tu mah polling area chhunga luh phal tawh loh hnuah a lut a, hei hi nu pakhatin dan bawhchhiatna a ni tiin nasa taka a au chhuahpui thu leh fakawm an tih thu an sawi. Security-te hian dar li hnuah eng vanga polling area chhunga Candidate hi luhtir mai nge an nih tih hi zawhna a ni ta e. He nu ang bawka hmeichhe fel tak leh dikna duh ve bawk pakhat chuan, nu pakhat pawisa sem ching deuh pawisa sem lai thlalak a nei a, a fiah vak loh avangin a report tak loh thu an sawi. He pawisa semtu nu hi a pawisa sem lai thlalak nei an awm nual thu sawi a ni a, hetiang thlalak neite hian lo kawl ṭha tlat teh u aw!

Pawisa sem hmanga MLA nih tum ṭhinte hi ngun takin ngaihtuah ila, an tlinpui ngat a nih chuan an sawrkar tirh aṭangin inthlan leh dawn huna sem leh tur tuakin hun an hmang leh ngei ngei ang. Tun hmain Manipur state inthlanna chu sum ngah leh hel pawlte puih party apiang an chak mai, an tih ṭhin kha kan thleng ve mek niin a lang ta. Tuna Manipur dinhmun saw, sum dik lo leh helho hmachhuana rorelna rah a ni mai em, ngaihtuah tham niin a lang. Kut tling lova sum dawn leh sem hi kan bansan vat loh chuan Pathian thikthu chhiatna hi kan tawng baw palh mai ang tih i hlau ang u.

Mipui pawisa eiruksak hmanga inti hausate lak aṭang hian rorelna dik a beiseiawm lo va, ram pawhin a ṭhatpui hek lo vang. Pathian duh zawnga rorelna chuan mi rethei, pachhia leh hmeithaite a ngaihsak ṭhin a, roreltute hausak phawtna lam a tinzawn ve lo. Tuna kan ram mamawh tak chu hausate hausak belhna lam aia retheite chawi kan dan ngaihtuah tak tak ram hruaitu hi a ni. Ram rorelna dik hi kan Pathian duh zawng tak a ni a, ama mite laka a phut pawh a ni. Pathian hming lam reng chunga bawhchhe lui ngar ngarte chuan ram rorelna dik min thlenpui lo ang a, Pathian malsawmna pawhin a umzui reng lo ang tih a hlauhawm hle a ni. Chuvangin thla thar maia ram rorelna fawng vuantu tur apiangte chuan rinawmna leh dikna nen Mizoram thar rawn din hram teh u le.

- Biaki-pu, Aizawl