Thing leh mau chereu nasa hi
Nipui a thaw leh ṭan a, kan khaw sik leh sa danglam dan hi i ngaihtuah ve ngai em? Thing leh mau kan tih chereu nasat vangin khaw lum lutuk te, ruah surin hunbi a neih loh dante hi tu vang nge ni ang le?
Mizoramah ram-ngaw (virgin forest) a awm mang ta lo a, a awmchhun pawh mihring chenna aṭanga hla takah a awm pheuh pheuh a rinawm. Kum tin ramngaw venna lam chi hi central sorkar aṭangin kan dawng ngei ang a, khawiah tak chu sum chu kal bo ṭhin ang maw. Hetianga kan khawsak mek lai hian kan ramngaw te lah chu a chereu nasa em em mai si a, engtin tak kan awm zel ang maw.
Kan ramngawte heti taka a lo cherau chhanah hian sorkara Forest department hian mawh a phur lian ber ang a, a dawtah thingtlang khaw ho mawh a lian leh bawk ang. Thingtlangah chuan eirawngbawl nan thing an hmang ber a, nakin hnu dawn lek loin an khaw chhehvel ramngaw an suat hum hum a, thing kih tur remchang apiang an kit zel mai si a, nakin lawkah a tuartu tur an nih an inhre miah lo.
An tawrh leh tur tih hre turin zirtirna an dawng ṭha tawk lo pawh a ni mai thei, hei hi Forest department-a thawktute mawh a ni thung ang. Zirtir a, hrilh mawlh mawlh pawh zawm lo hnam kan ni bawk si hi a hahthlak a ni. Tuah turin thing an kit a nih pawhin an kihna hmunah khan thing ṭhang duh chi tal phun leh tura zirtir emaw, a phun tur supply emaw a awm si lo a, eirawngbawl nan an mamawh bawk si a, an kit lo thei bik lo a ni.
Central aṭangin sum engemawzat a lokal ṭhin a, thing leh mau humhalhna chi khat a nih beiseiin gas connection pawh khaw tam takah a thlawnin Forest department-in a sem hlawm a. Gas connection a free-a an dawng chungin thing leh mau an la hmang em tih pawh finfiahna a awm lo a, zirtirna pawh pek an ni meuh lo.
Ram ngaw humhalh leh ram ngaw siam chungchangah hian Forest department hi a mawhphurtu ber an ni a, an mawhphurhna pawimawhzia hi an hre ṭha tawk duh lo ni te hian ka hre ṭhin. Kan forest officer-te hnathawh dan leh an in leh lo en hian a lungawi thlak thlawt lo bawk. Engineer-te hi eiru tura kan dah luih tlat lai hian mi fel tak tak erawh an tam ve tho mai.
Chuvangin, Forest department officer-te hi kan sik leh sa tawn mek aṭang hian ka thikthu a chhe thar leh tlat a nih chu.
- Lalkhirhvela