Tui thianghlim leh a kaihhnawih

Vanglaini March 17 a chhuakah khan PHE Minister-in National Drin-king Water and Sani-tation Awareness Week hawnnaah engineer-te fuihna leh chona a siam thu a lo lang a. Mipuite hnena tui thianghlim pek a pawimawh tih sawiin; hriselna, faina leh thiang-hlimna nei turin tui thiang-hlim a pawimawh tih a sawi a.

Hemi chungchang hi Vanglaini March 18 chhuaka editorial-ah khan tuihnih a ni nghe nghe.

Ni e, tui hi mihringin kan mamawh ber pakhat a ni. Tui telloin kan nung thei loa, khaw nuam tia sawi ṭhin reng reng hi tui ṭhatna leh hnianghnarna hmun a ni zel. Khaw hrang hrangah PHE dept. in mipui tan tui pump leh tui lak an kalpui a,an fakawm hle. Tui hnianghnar nei tur hian department-a thawktute an pawimawh rualin mipuite pawhin tihtur kan nei tih hriat a hun.

Tui sem tur hian kawng thui tak zawh a ngai tih kan chhut fo a ṭha. Current hmanga pump, pipe ṭha, a khawlkhawmna ṭha, thawktute inpekna leh rualkhai zawka sem dan tur ruahmanna neih te a ngai ni.

Tui semte thu lo leh mahni hun thlen hmaa lo herhhaw ta mai te hi ringtu ṭha tak zingah kan awm fo. Nu ho zingah tui semtute vau leh hrawk khur khur an awm ṭhin. Hetiang hian tui sem dan kalhmang a tibuai vek theih avangin sim a ṭha hle.

Tui renchem leh khawlh lamah ṭanlak thar kan ngai hle, pawisa khawl nachang kan hriat ang hian a telloa kan awm theih loh tui hi khawl a hun. Tui chawi peih si lo hian ren miah loin tui kan hmangral a, Dept. in tui an sem har deuhin kan phun leh si. Hman deuha PHE minister-in a sawi 'tui dahkhawlna nei ṭha miah si loin mobile phone changkang kan hum fur si' a tih kha a dik hle. Dah pawimawh (priority) hmasak tur hi kan hriat a hun hle mai zofate hian.

Kumin ṭhalvaekchar lo thleng tur pawh hi kan hmuah dan a inang lo hle ang. Remhre deuh, tui khawlna nei ṭha chuan huphurh miah loin an hmuak ang. Zuk leh hmuam atana sum kan sen hnem a, a tel loa kan awm theih loh tui neih nan sum kan seng tlem hle si, i harh thar ang u.

- Zoramsaia