'Khawlaia zu in' kha...

March ni 10 khan Vanglaini-ah 'Khawlaia zu in' tih thupuia hmangin editorial an rawn ziak a. Kha thil bakah khan sawi belh duh ka nei ve a ni.

Kei chuan khawlai chauh pawh ni lo khel-mual leh vangtlang hmun reng renga zu leh a kaihhnawih ruihtheih thil tih hi ka duh lo a, zu in duh chuan daiah emaw mahni in lumah emaw an in mai tur a ni. Sorkar hian zu a zuar ngam a nih chuan a khuahkhirh ngam bawk tur a ni bawk.

Mizo mipui leh
ṭhalai zingah dan anga zu zawrh phal a nih tak avanga duh duhna hmuna zu in leh zu ruih leh zu kenkual hi phal vek a ni ta emaw ti tam tak an awm. Hengho hian an duhna hmunah zu an in a, an duh leh an keng lang a, an duh leh an rui thei emaw intiin mipui mit tikham khawpa zu in hmuh tur an awm ta fo mai; hetiang zela kan kal chuan nakin lawkah intihbuai hi kan hmabak a ni dawn.

Sorkar hian Koh-hran leh pawl hrang hrangte dodalna karah zu a zuar ngam hi ka fak a, hetianga huaisen sorkar hi nakinah pawh nei zel ila ka duh. Tin, party dang pawh khan lo hria ula, Mizoramah sorkar siam duh vang leh eng pawl pawl emaw mitmei ven vanga thil ṭha tak tak tih puitlin ngam loh hi an nei fo a, daizep vanga thil ṭha pawh ti ngam lo chu sorkarna siam tlakah pawh ka ngai lo.

Sorkar ṭha nei thei tura rilru huaisen an neih tlat loh avangin Mizoram pawh an hruai ṭha thei lo.

Tuna Congress kaihhruai sorkar pawh hi an thil tih duh huaisen taka an tih tlang ngam avanga ka fak rualin selna lian tak ka nei. Road tax tam tak an lak chuan kawngpui ṭha tak min pe tur an ni a, lirthei no plate manto tak (High Security Registration Plates) leh road tax kan chawi ṭeuh chuan kan lirthei bo te pawh hi awlsam taka chhui theih a ni turah kan ngai.

Chutiang bawkin zu khapna dan kan hlih hnu hian sorkar hian tihtur pawimawh tak a nei nghal a, zu ruih chingte dan hmanga a khap beh a ngai ve ta a ni. Tunah chuan zu a tam tawh a, englai pawhin khawiah pawh zu a awm. Tun hma anga inthlahdah a thiang lo a, police-te pawh nghawrh zawka an duty a ngai ta a ni.

Aizawl bikah - veng hrang hrangah hian fianrial deuh lai te, kawn te, field te a awm thluah a. Zu thlah zalen a nih hma kha chuan heng hmunah te hian khawtlang mipuite zalen takin an leng
ṭhin. Zu a zalen hnu hian henglai hmunte hi zu in ho hian zu in nan an hauh fai ta deuh vek mai.

Khawlai leh hmun fianrial lai deuha zu in a, vantlang hmun ti bawlhhlawhtute hi khawtlang duty-te kutah dah mai loin sorkar hian ngun zawka a vil a ngai e.

- Lalthianghlima