Pathianni leh vote chhiar
Pathianniah an zin tho a lawm! Secular country a nih hi! Hlauh hi kan ngah lutuk! Kohhran upate pawh kan thlang tho a lawm!
Ram pum huap inthlan chhiarna leh tualchhung kohhran thiltih nen khaikhin chi a ni hauh lo vang. Political party boruak leh kohhran boruak a inang thei lo. Mizoram hi Kristian tamna ram a ni a, secular country kan nih vang tak reng hian Pathiannia vote chhiar loh hi a "secular" zawk (Indian secularism hriatthiam pawh a pawimawh tel àwm e). Ram leh sakhua tâna rem lo thuchhuah a awm hian "kan hlauh" vang ni lovin, kan hlauh loh vang zawkin kan do tur a ni. Hlauh vangin sual kan do a ni lo va, hnehna kan chan dawn avang leh hneh kan beisei avangin hlauh thlarau tel lovin sual kan do zawk ṭhin.
Kum kaltate kha chuan Pathian biak inkhawmṭcrusade te a nih ngawt loh chuan Vanapa Hall ah pawh Pathianni chuan programme huaihawt kha a rem lo ṭhin. Kumin erawh chuan Pathianniah PM Vishwakarma programme hmangin state pawn lam mi nen an ri hluai thung! Kan Kristianna leh kalphung te hi vawilehkhatah tihchhiatsak min tum lem lo, amaherawhchu kan dinnaah kan din ngheh loh chuan pawisa, power leh development hmang leh hmingin min tidal tial tial ang; chutih hunah chuan chimral kan harsa tawh lo viau ang le!
He issue hi Pathiannia vote chhiar issue ngawr ngawr a ni lo; nakin zela a hnam leh sakhua anga zuam leh hmuhsit kan nih lo nân a ni. Sum leh thuneihna, intih changkanna leh intih hawizauna hian i ram leh hnam thlir kânin hma sawntir che suh se, i ralna tur tho a ni dawn si a.
- Steven L Ralte