SAWRKHAR THAR A PIANG E HIP HIP - HUREU
Sawrkhar thar a piang e, han tih hian ZPM Kalphung thar mipui sawrkhar a piang e tihna emaw lo ti kher suh u. Kan inthlang zo va, Ballot Paper an chhiar zawh hunah result a lo chhuak ang a, Sawrkhar thar chu kan hre mai dawn a ni. Tun hi tu Party berin nge Sawrkhar siam ang aw! tih chu, Kan inrinsiak hun a ni a, a nuamin a hlimawm hun lai tak pawh a ni awm e. Ṭhenkhat la urhsun deuhte chuan, zan tin mangphan te pawh awmin, an ṭan lam an lo chak phei chuan tho á ruaiin, bula ṭhiannu mu tui lai lo phih lawp lawpte pawh zuk awm a, hmun ṭhenkhatah chuan Sephung laia tihtakzeta insiktir a, ṭan lam chak zawk ngei se tia lo innek ngawr ngawrte pawh zuk awm a.
Hmanni damlo kana ka vak chhuak zawk chuan hmelhriat remchang hmuh apiangte chu, tun ṭum kan inthlang chu tu nge chaka i rin le? Kan ti thla ve zen a, rin dan a inang lo angreng hlawm khawp mai. Ṭhenkhat chuan Sawrkharna mahnia siam thei pawl awm lovin thawkho (Coliation) Sawrkhar kan neih mai ringte pawh zuk awm a. Inthlan zawh hlima party hruaitu pathum Pu Zoramthanga MNF, Pu Lalsawta INC leh Pu K Sapdanga ZPM te Media lamten an pawl dinhmun an zawhna TV lama an chhang (thusawi) te kha ka lo ngaithla fuh ve hlauh a, Zoram khawvel hmun leh hriata sawi an ni bawk a, an ti takin an ti mai mai lo, an confi. An party kha Sawrkharna siam thei tura tling ngei turin an inring vek a. Eheu! Keini ang taptawm leh dai dar zau ve vak lo tan chuan vaia tlin chi lah ni hek suh, tu ber chu han tling ang maw? te kan ti ta ber a nih hi.
Hmanni Aizawl S III Muallungthu inthlan ṭhat nia Party hrang hrang hotute Media ho hmaa an thusawite kha a ṭhain ngaihthlak a nuam khawp mai. Sawrkhar lai Minister Pu Lalruatkima phei kha chuan a duhthawh bawk a, a sawi ṭha thawkhat e. Khatiang khan an Party hotute leh an Campaigner dang hote hian sawi ve hlawm tak maw? Tlinpui lehna tham zet tur a nih kha le!
Engpawh nise, eng Party pawhin Sawrkhar rawn siam se, Mizoram leh Mipui tan, hmasawnna tur zawnga hma an lak dan te kan lo thlir ang a, tuna MNF Sawrkhar hi tling leh an nih chuan, an inbengbel thawkhat tawh bawk a, hruaitu tharte siamin hmana an underground rilru ṭhinte kha paih bo fai vekin, an MLA ṭhalai mi thiam tak takte hi hmatheh a, hma laktir nachang han hre tawh se, an Flagship programme MAU CHIN leh SEDP sem tihvel leh Kawng chhawng, Traffic Zam lo leh Leiverh tih ang vela inawi khawtlai ringawt tawh lo hian hma han la se. Ram hmasawn nana KAMRULA Chhangte an ti nge, Majumdar, Lasker tih angte ring ngawt tawh lovin, kan ṭhangthar mi thiam tak takte nen hian hma han la se, kan kang chho awk awk ang le. Inthlan leh 2028 thlira Congress Party hovin an inawi thlamuang deuh pawh hi an tibeidawng deuh ngei ang.
Ram mamawh thil ṭhenkhat tih thupui hmanga Dt 15.11.2023 Vanglaini chhuaka Ṭhuamtea Lunglei rawn tarlante kha, a ṭha khawp mai. Sawrkhar thar lo piangin Zoram tana hma chak taka a lak hmasak turte zinga hmaih hauh loh tur chu –
Mizoram People’s Movement kalphung thar mipui Sawrkharin Sustainable Development & Reform Policy (S.R.D.P) tih Chapter VIII na Social Security & Welfare No h leh i hi a ni chu chu.
(h) Ruihhlo veivakin Mizoram a paltlang lohna turin Sawrkhar tlawmngai Pawl leh Kohhran te nena thapui thawha Beihpui thlak a ni ang.
(i) Ruihhloin a tih buai tawh te chhanchhuah hna leh ruihhlo laka la fihlim te venhim hna thawkin beihpui thlak a ni ang.
He thu hi kan tun dinhmunah a pawimawh tak meuh meuh a ni. He Beihpui hian kan ram kaltlanga Sawrkhar phal loh Smuggling bungrua, kuhva ro tawlh thlengin a ni a, chubakah Tualchhung Zu thlawr ṭhin Rangvamual (RV) leh hmun dang danga an tih rem hleih theih loh te hi tihrem theih a ni tih lantir vat a ṭulin a har lo. Heng ruihhlo tual siam – Damdawi eng ang nge an hman pawh hriatchian loh te hian, kan ṭhalaite a suat/tihhlum nasat zia sawi reng mai hi titawp tura chak taka hmalak a ṭul. Khamkhawp thar tur chuan kumtluana mar pata hnathawh (hlothlo a)/ feh a ngai.
Kan kawngpui te hi kum tluana ṭha taka tlan zur zur theih ni se, kan tu kan faten chhawr thei lo zelin awm ta zel se a hlu lo. ‘Miin Khawvel hi a pumin nei se la, a nun chan si se la, a tan eng nge sawt ang’ tih ang vel a ni. SRDP Policy anga a tahtawl tea chak taka hmalak a nih chuan, rei lo teah Zoram hi Zoramtharah kan inhlangkai ngei ang.
Hei hian Corruption kawngkharte a hnawh khar ping ang a, hlemhletna a bo ang a, chhungtinten rualkhai takin tuk zan chaw kan kilho thei ang a. Pamham tak leh mipui leh rethei chan ai phih tlak tumna awm lovin, taima leh remhre tan din chhuah theihna turin bul ṭan a ni ang a, Chhanchhuahna Camp tih leh Rescue Home tih te pawh an lo nep zel ngei ang le. A va nghahhlelh awm em!
- Lalhmangaiha Sailo, Holy Cross Bakery, 9436360275