I rin aiin MPF a hlu a nia aw!

Mizoram chuan Inthlanpui a hmachhawn zo a, thlirletna a awm nak nak a. Chumi zingah chuan inthlan laia hriat hlawh tak, Mizoram-a ‘civil society’ pawl lian hrang hrang thil tum neia thawk tlang ṭhin ‘MPF’ tia hriat lar- Mizoram People Forum hming a ri ta fo mai. Elsenna leh ṭhahnemngaihna a insul pel nuk a. India Danpui-in chanvo min pek angin ka thil hriat leh thlir dan ṭhenkhat ziah a lang ve tlat!

MPF hian 'inthlan laiin eng eng emaw a khap thei em?'

A tawi zawngin, 'thei lo, a khap bawk lo. MPF leh Political Party te'n inthlan vuakveta hman atan Thawhhona Thuthlung an siam a, chutah chuan tih tur leh tih loh tur tarlan a ni zawk a, thuthlung hian a phal lo zawk a ni,' tia sawi tur a ni ang. Thuthlung a nih angin MPF hnuaiah hian party-te an awm lo a, thawkho/inpuibawm tur an ni zawk.

Party-te’n MPF hlauh vangin Thawhhona Thuthlung an pawm em ni?

MPF ‘history’ tawi zep lawk ila a fiah thei mai ang. 2003 Inthlanpui sulhnu Synod-in zirchiang tura a ruatte thil hmuhchhuah- inthlan campaign boruakah thil duhawm lo a hluar chho zel a, vote lei a hluar a, inrikrapna a awm ngei tih finfiah a ni bawk a, chumi aṭang chuan MPF din ṭul tihna a lo irhchhuak a.

2006 a MPF din a nih khan political party te nena inhmukhawmin party lam pawhin inthlan chu hautak an ti a, 2003 inthlanah candidate-te’n tla bik nih hlauh avangin sum an sen nasat phah tihte sawi lan a ni a. Thawhhona Thuthlung an duang a, vawi eng emaw zat thlirho a nih hnuin thuthlung chu a lo piang ta a. Tun hnuah pawh inthlan dawna ennawn leh ṭhin a ni.

Kumin Thawhhona Thuthlung ennawn lai khan Thu Sawm Pek anga thlak theih loh bur a nih lohzia entirna a thleng a. Inthlan hmasa lama thuthlung khan ‘inthlan puan hnuah pawh house to house campaign a remti a.’ Kumina rawtna awm 2023-ah chuan ‘house to house campaign neih loh tawp’ tih chu meeting-ah tihtluk niin political party leh MPF lam pawhin hming an ziah hnan a, copy tam tak chhut a ni hman a. Hetih lai hian, ‘inthlan puan hnuah chauh house to house campaign chu neih loh ni se,' tiin rawtna a awm leh a. MPF leh political party-te ṭhukhawm lehin sawiho a nih hnuah rawtna hnuhnung zawk chu pawm a ni ta a, kumin Inthlanpui-ah khan hman a ni.

He thil thleng hian party-te barh luih an nih lohzia a tilang a, thuthlung hi a ṭul anga tih danglam theih a ni tih leh, political party te hi 'stakeholder' an nih zia tichiangtu pakhat a ni ang.

Mimal dikna chanvo ngai pawimawhin senso tihhniamna atana duan campaign nana zaithiam rawih loh tihte pawh 2018 khan paih a ni daih tawh.

MPF kalphung pawh hi hmasawn zawngin a inthlak danglam (evolve) ve zel a, MPF Constitution chu ennawn leh tawh niin Annual Assembly-ah pass a ni tawh a. Governing Board in President chu a ruat/thlang thei tawh zawk a. Rah ṭha a chhuah chhoh zel beisei ila, lo thlir zel phawt ang.

MCC guidelines a awm tho a, thuthlung lo siam phet a ṭul em ni?

Election Commission of India (ECI) hian inthlan kaihhruaina Model Code of Conduct a siam a, tih tur leh tih loh tur tarlanna ti ila a sual tam lo ang. MCC-in inthlan chungchanga party/candidate-te kaihhruaina a siam leh MPF leh political party thuthlung hi inang lo lai awm bawk mah se, Election Commission kalphung leh Thawhhona Thuthlungin a duh ber chu 'inthlanna dik, felfai leh thianghlim' hi a ni tho tho a. Mizoram-ah chuan MPF-in Election Commission thachhang a lo dawl ve ṭhin a. Inthlan laia MPF Constituency leh MPF Local Forum buai ziate hi sawiin a siak lo. Vote thlak ṭha tura infuihna thlenga MPF thuchah zozaite pawh mi hawi harh pangngai tan hai rual a ni lo.

Election Commission hian MPF hi a hnathawh ṭha a tihpuina 'Letter of Appreciation' a pe nual tawh a, hnawk ti se la hetiang hi a pek duh ka ring lo. Khawvel inthlak angin ngaihdan a danglam zel a, 'MPF leh political party-te Thawhhona Thuthlung siam a ṭul lo, MPF awm a ṭul lo' tih ngaihdan neihte hi a thiang vek mai. Hemi ruala bûk ngai ta chu MPF din a nih chhan hi a ni a, uluk taka bihchian chuan MPF awm ta lo se? tih zawhna tawi te hi inzawt ta hlawm ila. A chhanna chu mipui ngaihdanah innghat se la. MPF Local Forum awmna leh awm lohna hmuna candidate campaign senso-te hi zirbing tham a ni tawh mahna.

Festival leh festivity

India ramah chuan inthlan hi 'Festival of Democracy' tiin sawi a ni ṭthin a. Mi tinin an duh tak, ṭha nia an hriat, thlamuang taka an vote hi an dikna chanvo a ni a, a hlu em em a, chu chu Festival of Democracy a nihna lai pawh a ni a, 'Mipui Rorelna Kût' tia dah hi a sual lo.

'Mipui Rorelna Kût' hi state dangah pawh kût ang chuan hman a ni ang, hemi rual hian 'Kût' hian ken tel a nei a, 'Kût a nihna/hlimhlawp' (festivity) lai hi buaipui ngai a ni fo a, hemiah hian kal fawr a awl dawn a ni. Thil chik mi (intellect) te aṭangin, "Hmun dang inthlan dan khaikhinin thawhhona thuthlung hian thil tam takah Festival of Democracy a phawk chhuak kan ti khawp mai," tih an sawi ka hre ta nual mai. Thawhchhuah nei mang lo state 'Consumer Economy' kan nih laia inthlan campaign senso ti tam zawnga ruai ṭheh hut hut, kawng zawh hautak, sum sem nasa, vote lei hluar, dry state ni chung siin zu hmang hian nasa zawkin kan chawm ngheng thei a, voter tam tak rilru fim a puttir kher lo ang, chu chu em ni 'Mipui Rorelna Kût'-in a tum ni ang? Hemi bakah inthlan senso a tam lutuk chuan candidate tan phurrit a siam nasa khawp ang, candidate atan mi hausa kan melh ṭan tawh an tih sek hi.

Mipui lam pawh kan insum a ngai! Nasa taka insengsoa tling candidate ṭhenkhat (an vaiin ka ti lo) te’n an sum sen hi hmuh let leh an tum mai thei a, engtin nge hmuh let an tum ang tih chu lo ‘hisap’ ve mai rawh. Chu chuan sawrkar ṭha a din ang em? Thawhhona Thuthlung hian candidate-te hi a hlawkpuitu (beneficiary) nihtir a tum zawk asin. Senso sang theia boruak a awm pawhin "Thuthlung chhuanlam tur a awm hi chu a lawmawm," tih thu candidate ṭhenkhatin min hrilh ve ngei e. Hemi piah lama sum seng zawnga khawsa chi hi chu mipui lam pawhin ngaihdan an siam thiam em em ang!

MPF hi a hlu a nia aw!

India media house hriat hlawh tak senior journalist pakhatin MPF hmalakna hi 'inthlan atana ram pum entawntlak' (role model for the whole country) tiin kan titi-naah a sawi a. Ani hi Eastern India zirbing a ni a, India Hmarchhak thlir thiam ve tawk taka ka ngaih a ni.

Nagaland-in MPF ang hi din an tum tawh a, a har an ti viau, kumin inthlan lai khan MPF hnathawh dan an rawn zir nghe nghe. Sakhaw pakhat vuan mah se hnam bil (ethnic diversity) vangin ṭawng khat an hmang thei lo a. Kan ramah chuan ṭawng khatin kan inbe tlang thei vek a, sakhaw pakhat kan vawn bawk avangin MPF din hi a remchang tlat mai a. Heti taka danglam kan nihna, hmun danga awm ve mang mang lo hi hlut mawlh teh ang u.

MPF tana rawtna

1. Common platform hi hei aia ṭha leh uar zawka neih a pawimawh hlein ka hria. Mipui lamin candidate an hriatchian theihna tur a ni. A hmuna kal lo tan pawh phone aṭangin a lo en vek theih tawh. Candidate te’n ‘fair chance’ an neih theihna atan MPF lam hian a ṭul chuan hnuh deuh hrawih ngaih chang a awm ang.

2. Thawhhona Thuthlung hi ennawn a ngai hle a. Tih chak a ngaih pawhin party lam aṭangin MPF-ah lut fo se, stake-holder an ni a, beneficiary (hlawkna teltu) an ni bawk si a. A ṭul a nih chuan MPF lam pawhin na zawkin rawn ṭhin bawk se la.

- Vanlalrema Vantawl, Mission Veng