CHAWLHNI A VOTE CHHIAR
Pathian khawngaihna leh hruainain MLA General Election chu buaina leh harsatna awm lovin kan lo zo ta. Lalpa chu fakin awm rawh se. Kan hmabak chu vote chhiar a ni ta. Election of India-in December 3 (Nithum) Pathiannia vote chhiar a rawt chu MKHC te Party leh NGO hrang hrang inhlawmkhawmten, sawn tura an ngen chu hnawl a lo ni ta. Pathianin kan ṭawngṭaina a hre lo nge? Kan rinna fiah nan hman a tum tih hi zawhna lian tak a ni.
England mi tlan chak Erich Nadela chu 100 Mtrs intlansiakah Gold Medal la ngei tura ngaih kha; Olimpic Game-a an tlan ni tur Pathianni a nih avangin a tlan duh ta lo va. England mipuiten anchhe tinreng lawhin hnam hmelma tiin an au khum a. Kar thar a lo thlen chuan 100Mtrs chunglam zawnga intlansiaknaah chuan telin Gold medal a hui fai vek a nih chu! England mipui an va lawm tehreng em. An au hla chu tidanglamin, 'Eric Nadela England ropuina lallukhum' tiin an au ta zawk a ni. Pathian chuan a thupek zawma ṭih tute chu a ensan lo asin!
Sadrakate ṭhian thum kha Lal Nebuka Nezara rorelna pui tura dan zirlai an ni a, lal thupek awih loh kha an tan chuan an nihna aṭanga ban mai ni loin thihna a ni. Mahse lal thu ai chuan Pathian thu an awih zawk. An hlawhchhuah chu meipui aṭanga him taka chhuah mai bakah Sadrakate Pathian sawichhia chu tih boral an nih tur thu lalin a chhuah a nih kha. Daniala khan thupek khauh tak awm reng chungin Jerusalem lam hawia Pathian biak a báng duh lo! A chan tur chu ahria. Pathian a chet meuh chuan amah dotute chu anmahni thangah an awk ta. Amah hektute mai ni lo, an chhungte zawng zawng nen Sakeibaknei pukah paihin pawh sawm an ni ta zawk a ni. Lalnu Etheri khan an hnam dam nan dan lovin lal hmaah a lut a, amah leh an hnam chhanchhuahna ropui a thleng!
Aw le, tunah hian Chawlhni hi Pathian biak nan kan serh tak meuh em? Tihtakzetin Pathian kan bia em? Kristiante hian chawlhni hi thinlung taka Pathian biak nan kan hmang em? Fiahna kan tawk mek a nih hi. MKHC te, Party te leh NGO pawl hrang hrangten antih theih zawng an tih hnuah Vote chhiar tura Sawrkarin a ruatten kan nihna diktak kan lantir ve a ṭul. Chawlhni hi Pathian kan biakna ni a nih avangin min ruat ang hian ka thawk thei lo han ti ngam ṭheuh ila, vote chhiar a khaihlak ang em? Tun hi engkim chunga thuneitu Pathian bia kan ni tih lantirna hun remchang atan Pathianin a ruat a ni ah ngai ila. Pathian nge kan hlauh leia ro rel turte?
- Pc Muankima , Saitual
Ph : 9862816516