AMC leh Aizawl khawpui
Aizawl Municipal Council chuan Aizawl khawpui chu hun rei tak chhung a lo enkawl ta, hmasawnna a awm tam aiin kher neuh neuh chuan thil fel lo pawh a tam hle tih a lang a, he AMC hi a kal tluan theihna turin rawtna tlem neih ve ka duh.
Cheng vaibelchhe 114.79 lai budget nei an nih avang hian mipuiin kan 'check' deuh an ngai. Party pawhin Candidate tur hi ṭha tak tak theh chhuah a hun tawh, Councillor /Corporator hlawh kan hriat chin a tlem nen hian term thar an hman zawh chuan lirthei an nei deuh fur an tihna kha a rei deuh tawh. Sum hi a awm tlat a, mipui hian kan ngaihven a ngai a ni.
BAWLHHLAWH PAIH: AMC hnuaiah hian PPP Mode in khawtlang nena ṭangrualin bawlhhlawh paih a ni. Bawlhhlawh paih tur hi ṭawih thei leh ṭawih thei lova thliar a nih laiin hman deuhah (2019 khan a ni) khan a hmunah opposition politician ten an va endik khan, an lo paih pawlh tih an va hmu chhuak kha a mak ve mai mai. Bawlhhlawh paih leh sawngbawl dan hi an zir nasa a, state pawnah an kal thul a. Foreign thleng thleng pawhin mipui pawisa hmangin opposition leh ruling Councillor an zin ho dual dual khan kan bawlhhlawh paih dan hi a la chingfel tawk lo a, bawlhhlawh paih dan fel zawk hi duan chhuah a ngai hle a ni.
PARKING PAWISA: Parking Fee khawn dan hi ennawn a ngai. Parking fee pekah hian 'ei nei' an awm tih hi titi satliah hian kan hre ṭhin a, politics-a inpuhna mai mai a nih a rinawm. Parking fee hi to deuh far se, motor ken chhuah hi tím ila, public transport hi hmang nasa ila, parking phal lohna hi tam bawk se, Pu Zoramthanga dream traffic jam awm lohna khawpui nih kan hnaih thei ang. PAHOSS vangin parking-na pakhat pawh a pung si lo, sorkar pawisa hmangin mi hausa Garage kan sa ta mai mai a ni.
INENKAWLNA SUM: AMC pawisa hmanna hi 'check' uluk a ngai. Office meeting ei leh in senso te, office inrelbawlna sum senso hrim hrim a tam hle tih a ni tawh a, AMC inthlan dawn khan an sawi nasa hle a ni. AMC chu mipui kan inti ta-tu bîk si a, pawisa hi lo hmang fimkhur se, sorkar pumpui entawntlak turin lo awm se, Christina Roluahpuii Sailo angin Councillor sum hmanna pawh ziak chhuak ngam se, ZPM Councillor dangte pawhin ti ve ngam se a ṭha ang.
- Lalhmuchhuaka