KRISMAS DAWNA KAWN CHEI LEH KRISMAS RUAI ṬHEH HI
Kan Lalpa Isua Krista piancham, 'mas dawna kawn leh kawngpui kan chei ṭhin hi sawisel an awm leh zauh ṭhin a, an sawiselna hi thui tak chu dikin a lang a; mahse, a ṭha rih khawp lo'm ni, tiin ka'n rawn sawi thung teh ang. A ṭhatna ṭhenkhatte:
1. Lei leh Vana Lal ber pian cham lawmna leh amah chawimawina entirna leh belhchhahna a ni.
2. Krismas leh Kum Thar vuakvet velah hian hian inkhawm loh kara mi nawlpui leh chhungkaw tan han len khawthawnna kan neih tam loh avangin, ṭhalai mai ni lo, puitling leh naupangte pawhin hetiang kawn leh kawtthler/kawngpui mawi taka chei hi-Pathian faka inkhawm loh laia hetianga thianghlim taka mi'n an lo tlawha an lo hlimpui viau hi, he Hun Ropui nen pawh hian a inhmeh hlein a hriat a ni.
Sawiseltute sawiselna ber nia lang chu: 'a chei nan sum ṭhahnem tak a luang ral a, kawtthler/kawn/kawngpui chei nana pawisa hmante hi mi rethei ṭanpui nan hman ni zawk ta se' tih te niin a lang a; dik pawh a dik thawkhat ang chu. Kawng danga sawi erawh chuan, Krismas dawna kawn cheitute hian kawn hi chei lo ta ang se la, an sum sen zat hi mi rethei ṭanpui nan an hmang kher ang em tih ngaihtuah theih tak a ni tho mai. Keini Presbyterian Kohhran hi chuan ka awm tawhna leh ka thawh tawhna Veng hrang hrang leh khaw hrang hrangah hian, kohhranho hian kohhran kal tlangin mi rethei an ṭanpui ṭhin a, kohhran dangte pawhin an ti vekin a rinawm e. Sawma pakhat Pathian ram thawhlawma chhùn hnu leh tuk anga Krismas thawhlawm pek hnua (ṭhenkhat chuan heng bakah hian mi retheite pual thawhlawm an la nei hrang niin a lang a, a ṭha vek mai) a nei deuh leh mi thil phal deuhten kawn leh kawthler chei nana an sum an la seng thei a nih chuan, kei chuan hlu ka tiin sawisel ka hreh khawp mai; thlarau hnathawh dan hi chi hrang hrang a awm a, kohhrana inhmang leh inhmang lutuk lem lo, Krista piancham denchhena Amah chawimawi entir nana kawn, in leh kawtthler ilote cheia tha leh sumpai seng a; kohhran mipui chet chhuahna hi Kristiante inlungrualna ṭha tak tling bawkin a lang.
'MAS RUAI ṬHEH LEH KÀWN CHEI CHU: Mizoram hmun hrang hranga Mautàm Ṭam a tlak vang khan ṭàm tuarte tuarpui nan Govt Complex Veng (Tuna Ainawn Veng ni ta) Presbyterian Kohhran chuan kum 2007 Krismas khan ruai an ṭheh lo va, a lo ṭha khawpin ka hria. May 3, 2023 aṭanga dik lo tak leh dan kalha Meitei chalrángte hleilenna vanga Manipur-a kan unau Zo hnahthlakte tuarna chi hrang hrang vang erawh hi chuan, Krismas ruai ṭheh leh kawn chei lamah hi chuan kumin hi chu insúm deuh thei ila a ṭha ang em aw, tiin VANGLAINI Chanchinbu aṭang hian kan rawt chhin thung a nih hi; 'insum deuh' ka'n tih chhan pawh a nihphung renga ruai ṭheh loh tawp emaw, kawn chei loh tawp emaw lam ni lovin, hun danglam rapthlâk tak (specific case) thlen vanga 'insùm deuh' kan sawina a ni zawk mah a, sawiho chi tak a nih hmèl e.
- Dt J.T.Vanlalngheta