An tih àwm tak an ti a ni

Kumin 2023 Mizoram Legislative Assembly inthlanpuia vote chhiar hun tura ruat, December 3, 2023 chu Pathianni a nih avangin kohhran hrang hrang inzawm khawm te, tlawmngai pawl intél khawmte leh political party hrang hrangte'n sawn an duh thu Election Commission of India (ECI) ziakin an thlen a; an tih àwm tak an ti a ni.

ECI aṭanga chhànna a awm loh avangin Mizoram Kohhran Hruaitute Committee (MKHC)-in hma hruaiin hmalak zui a ni a, MKHC hmingin vawi thum lai dilna ECI-ah thlen a ni tawh. MKHC hian an tih àwm tak, an tih ngei tur an ti a ni. Na zawka ECI han nawr zel chu kohhran tih atan a fuh tawh loin an hriat a ni ang, MKHC chuan NGO Coordination Committee bawhzui turin an kutah an dah zui a; NGO-te pawhin an bawhzui mek zel a. NGO-te pawh hian an tih àwm tak an ti a ni.

Kum 2013 inthlanpui kha:

Kum 2013-a Mizoram MLA inthlanpui kha October 4, 2013-ah ECI hotute'n an puang a; inthlan ni tura tih chu December 4, 2013 (Nilaini) a ni a, vote chhiar hun tura tih chu December 8, 2013 (Pathianni) a ni.

Vote thlak ní leh vote chhiar ní hi Synod inkhawmpui lai ve ve a ni a, vote chhiar ní phei chu Pathianni a ni bawk. Khatih lai khan, Mizoram Synod hruaitute lamin inthlanpui chu Synod inkhawmpui nena inbawh buai lo turin ECI-ah an thlen a, kohhrante bakah, political party leh páwl dangte pawhin Pathiannia vote chhiar tura ruahman tawh chu sawn turin ngenna an thlen bawk.

Tichuan, ECI chuan October 23, 2013-ah Press Note (thuchhuah) an tichhuak a; vote thlak ní chu November 25, 2023, Thawhṭanni (Synod inkhawmpui ṭan hma)-ah leh, vote chhiar ní chu December 9, 2013, Thawhṭanni-ah sawn a nih thu an puang a ni.

Press Note-ah chuan ECI chuan, vote thlak ní leh vote chhiar ní sawn tura ngenna Mizorama political party leh pawl hrang hrang aṭangin an dawn thu te, vote thlak ní tura ruat 4.12.2013-ah mi tam takin vote an thlâk theih dawn loh thu leh 8.11.2013-a vote chhiar chu Pathianni a nih avangin a remchan loh thute an dawng tih tarlan a ni a. Chungte avang chuan inthlan vote thlak hun leh vote chhiar hun chu tihdanglam a nih tâk thu ECI chuan an tarlang bawk.

Thil theih loh díl an ni lo:

Kum 2013 inthlanpuiah khan vote chhiar ní atan Pathianni (Dec. 8) ruat a lo ni tawh a, mahse, kohhran leh pawl hrang hrangte ngenna avangin Thawhṭanni (Dec. 9)-ah sawn a ni tih kan hria. Sawn a nih chhan ber pawh–Mizorama kohhran leh pawl hrang hrang aṭanga ngenna a awm vang leh, Pathiannia vote chhiar chu remchang loa ngaih a nih vang a ni.

Kum 2013-a mi ang chiah kha kumin 2023-ah hian vote chhiar hun chungchangah kan tawng leh ta a. Kum 2013 ang thoin kohhran leh pawl hrang hrangin vote chhiar hun tura ruat December 3 (Pathianni) chu hun dang, Pathianni leh Inrinni ni loah sawn turin ECI an ngen leh ta chiah bawk. Kuminah hian ngennate chu ECI lamin an tihlawhtling mai lo bawk nen, kum 2013-a ai mahin kohhran leh pawl hrang hrangte chu an ngên ngáwl zawk tawh a; vawi khat aia tam ngenna/dilna an thlen hial tawh a ni. NGO Coordination Committee phei chuan Delhi-a ECI pisapuiah ngei hmuh tumin an kal chilh ta hial a nih hi.

Kohhran, tlawmngai pawl leh political party-te'n vote chhiar hun sawn tur leh Pathianni leh Inrinni ni lo ruat tura an ngen hi an tih àwm tak a ni a, an tih tur tak an ti a ni. Thil theih loh dila ngen an ni lo a, thil tih theih, tun hma pawha an lo tih tawh ang ngena dil an ni, tih hi Mizoram mipuiin kan hriatpui a ṭha. Kum 2013 inthlanpuiah pawh vote chhiar ni tura ruat chu Pathianni a nih avangin, sawn tura ngenna an dawn avangin ECI chuan a lo sawn tawh tlat a ni.

Mizo mipui rilru?

Mizorama kohhran bakah, political party leh tlawmngai pawl kan neih lian ber berte'n Pathiannia vote chhiar loh theih an duh a, vote chhiar hun sawn tura ECI an ngen laiin, an member-te (mipui) ngaihdan erawh a inang lo zung niin a lang. Mizorama Mizo zawng zawngte hi chu vote chhiar hun sawn tura ngentu pawl zinga a eng emaw bera tel kan ni vekin a rinawm a; kan telna páwl hruaitute hmalakna pawm lêm lo mi eng emaw zat kan awm tihna a ni.

Mi ṭhenkhatin an sawi chu, Mizo Kristiante hian Pathianni kan serh tak tak lo tih te, kan tih duh chu kan ti hreh lo tih te, exam, zin chhuah leh thil dang eng eng emawte pawh Pathianni-ah tih kan hreh lo tihte a ni hlawm. Mimala kan inen chuan, Pathianni kan serh dan a inchen lo hle. Pathianni serh miah lo leh serh tum miah lo eng emaw zat an awm a, Pathianni a nih avanga inkhawm pawh tum phah miah lo mi eng emaw zat an awm. Chutih laiin, Pathianni serhtu, inkhawm tluan parh parh, thil dang tih tum lo mi tam tak an la awm ve bawk.

Pathiannia exam kan hreh lo tih hi a dik viau mai a. Mizorama kan lo tihdanglam leh kan sawn mai mai theih loh, India ram pum huapa a ruala tih ngai a nih ṭhin avangin Pathianni-ah exam tur, an tih chuan, kan exam ve mai a ngai ṭhin. Mizoram inthlanpuia vote chhiar hun erawh India ram pum emaw, state dang nena inkaihhnawihna nei thûk lem lo a ni thung a, India ram hmun dang nena a ruala tih kher ngai lo, Mizoram bik chauh tan hun bithliah theih a niin a lang.

Eng exam emaw leh vote chhiar ní hi khaikhin theih a ni mai thei a, khaikhin remchang lo a ni thei bawk; a chhan chu–a nghawng a inlen hleih em em a, ngaihventu an intam hle em em bawk. Mi ṭhenkhatin Pathiannia exam an sawite hian mipui náwlpui a nghawng miah lo a, ngaihventu leh a nghawng chu mi tlemtê an ni. Media-te'n a puanzar loh phei chuan mipui náwlpuiin exam a awm a ni tih pawh an hre lo. Vote chhiar erawh chu mi tin ngaihven, mi zawng zawngin hriat thuai thuai an châk zek zek tawh a ni a, a nghawng pawh a lian tak zet bawk. State pum leh hnam pumpui huap a ni a, chuvangin, vote chhiar leh eng emaw exam hi tehkhin a rem lutuk lo.

Pathianni-ah vote ni se, vote chhiarnaa mawhphurhna nei chu mi tlemtê an ni, inkhawm duhte chu an inkhawm thei, tih hi mi thenkhat sawi a ni. A dik chiah. Pathianniah vote chhiar a ni emaw, ni lo emaw, inkhawm chuang lo tur tam tak an awm, chu'ng mite chuan Pathiannia vote chhiar hi pawi an ti lo tlangpui niin a lang. Inkhawm chuang lo turte'n vote chhiar leh inthlan result an ngaihven a, hriat thuai thuai ang châk ang thoin inkhawm ṭhin, Pathiannia inkhawm ngei duh leh inkhawmnaa tih tur leh mawhphurhna neite pawhin vote chhiar an ngaihven ve em em a, result hriat hlân an nghakhlel ve tho a ni tih kan inhriatpui a ṭha.

Sawn se duhthusam:

Inthlan puan hmaa ECI hotute Mizorama an rawn kal khan MKHC leh pawl dang ṭhenkhatin Pathianni leh Inrinni-ah inthlan ti lo turin an lo ngen a; MKHC bik chuan vote chhiar hun chungchang an lo hmaih palh a ni àwm e. Chuti chung chuan, inthlan hun puan hnuah ECI an ngen leh tawh tho a, kohhran mai bakah NGOCC leh political party lian zawng zawngin vote chhiar ní atana Pathianni ruat tawh chu sawn turin an ngen vek a. Zahawm takin, Pathiannia vote chhiar an duh loh chhan fiah taka ziakin an ngen a ni.

Vote chhiar ni sawn tura ngentute hi belh khawm vek phei chuan Mizote aiawh zo tak an ni. State pakhata hnam tam ber Mizo zawng zawng aiawh zo tak pawl hrang hrangte ngenna ngaih pawimawh hi mipui tana ding sorkar leh ECI tih àwm tak a ni. An ngennate tihhlawhtlin leh vote chhiar ní sawn hi ECI tan tihhlawhtlin theih loh tawp thil a ni bik lo bawk a, kum 2013-a an lo tih tawh ang khan Mizo mipui ngenna hi han tihlawhtling hram thei se chu a va lawmawm dawn em.

Pathiannia vote chhiar a nih hian inkhawm ngai lote a tihbuai miah loh laiin, inkhawm ngei duh leh tih tur pawimawh neite erawh rilru khingbai tak leh phâwklêk ru takin an awm ngeiin a rinawm. Pathianni ni loah vote chhiar a nih erawh chuan, inkhawm ṭhinte leh inkhawm ngai lote'n kan hriat châk leh nghahhlelh tlàn vek–inthlan result chu zalên takin kan ngaihven tlang thei dawn zu nia!

Eng sakhua pawh ni se, an ni serh leh ni pawimawh inzahsak hi thil ṭha a ni a; tute emaw sakhaw ni serhah hnam/ram pum huap nghawng thil ti lo tura insiam rem hi sorkar leh sorkar agency-te tih àwm tak a ni. Eng pawh ni se, ECI hian rilru zau tak nen Mizo mipui náwlpui rilru an hriatthiam i beisei phawt mai teh ang u.

- K. Zothanpara