Leiba min hnutchhiahtute kan hre reng ang che u

Leiba leiba leiba tih hi kan hriat tlan a nih lai hian kan lo va han ngah em em ve le. Mizoram sorkar leiba neih dan kan hriat hian tute huan nge rul dâwn ve le? Tute nge ni he Mizoram leiba hu rul zo ang?

MNF hi lo sorkar leh ta se a rulhna lam hi eng a mah hi an duan kan hre si lova an bat belh awn awn dawn tih hi a rin lawk theih a ni. Leiba kan ngah em em chung hian Chief Minister berin thla tira hlawh lak leh thla chawhnu lama lak chu a pawisa zat a ngai reng a han ti a, inthlan hma kha chuan a theih ang ang kha an rulh kan lo duh teh lul nen an la bat belh zel si a, MNF an tlin chuan ba hmun kan ni zel dawn.

A ZPM hi lo sorkar tehreng pawh ni se beisei vak tur an awm chuang lo. ZPM hian MNF hriat loh pawisa tih punna an hriat loh chuan kalphung thar min tiamtute hian anchhia an la dawng zui dawn a ni. ZPM hian pawisa sem tih tawp hi tum pawh ni se a awm sâ hi a tlem a, pawisa lakluh dan an hre dâwn bîk chuang lo. Huaisen taka chhiah an lak belh loh chuan ZPM hi an tawn san lai ber hmang zovin term khat zawhah an tla ang.

Congress hi chu sorkar tum chi an ni tawh lo va, an tlachhe tawh a, anni pawh an sorkar chhung zozai khan pawisa lakluh dan an hre lo va, a hman leh sem an thiam em em a, kan ram a buai zo tawh. Kan ram dinhmun ngaihtuah hian lung a awi lo asin.

Hetianga leiba leiba leiba kan tih lai hian kan Politician te an husa thur thur si. Tuna election affidavit kha chu ka awih loh dan chu Minister ka hriat chian tak chuan ama ram ngei tia an sawi luai luai pahnih chu a tar lang lo phawt. Ruling MLA dang pakhat pawhin a pawisa neih zat dik tak a tarlang lo tih an sawi ve leh tlat a, Ruling lo candidate zingah rin phak baka hausa awm bawk nen a buaithlak kual a ni.

Mizorama leina min hnutchhiahtute hi kan hriat reng an ngai, he ram chawmhlawm rama Politician hausa uchuak tak lo awm ṭeuh mai hi chu in eizawnna leh in pawisa, in motor, in building neih zozai, in huan leh ram hi a inmil lo, mipui thin tiurtu in la ni ang.

- Malawma, Kulikawn