MAHUA MOITRA LOK SABHA MP AṬANGIN BAN TURA RAWT A NI

All India Trinamool Congress MP hmel ṭha tak, Parliament session a Central Sorkar leh Prime Minister a sawiselna video tawi pawh Mizoram aṭang meuh pawhin kan hmuh fo kha, nang pawhin i lo hmu fo tawh maithei. A hming chu Moitra Mahua a ni.

A hmel a ṭha a, lehkha zir chhuahnain a zir bawk a, English a thiamin a dang a nal ṭha hle a, Opposition MP nih pawh a tling zo hle tih loh rual a ni lo. BJP Sorkar leh PM Modi dik lohna a hriat te pehhel leh sumkar awm hauh loin a a sawi phiar phiar ṭhin a. He a thu sawi video tawi hi a darh nasa viau mai. India ram mi tam tak heng a thu sawi huaisen tak leh a hmelṭhatna belhkhawm avang hian a zunah an uai a ni.

He nu Mahua Moitra zun hian a lo phuar che a nih pawhin a mak lo. Ni leh thla a lo rei deuh a, public darling MP ni ṭhin kha English a thiam leh dang nalna chu ngeiawm lamah a kal ta tih loh rual lohin ziak ngai kher lo a, online hmanga Parliament-a zawhna zawh theihna MP te chauh hriat tur password/login ID chu, Central sorkar hnuaia tlatlum lo zet sumdawng hnenah sumdawng lian inerna leh, Adani Group tih chhiat theihna tura hrilhin, chu a thil hrilh man atan chuan pawisa leh hmeichhe incheina mi nazawng neih phak loh man tam tak tak leh, tlereuh a dawng ngei tih Supreme Court advocate pakhat leh, chumi behchhana BJP MP pakhatin ziakin Lok Sabha Speaker hnenah a thlen a.

Hei mai hi a ni lo, sumdawng lian Parliament password a rawlruk ngei mai chuan a lamah ṭang loin a password hrilh a nih dante a puang ta vek mai. October 14, 2023 aṭang khan ni tin deuh thaw National newspaper lian hoin an ziak chho deuh zut reng a, a tawi thei ang berin a chepa kai aṭangin i han hrut thuak thuak teh ang.

Tu nge a nih?

Mahua Moitra hi October 12,1974 khan Bengali Brahmin chhungkua aṭangin Labac, Cachar Dist, Assam ah a apiang a, a naupan laiin Calcutta ah an pem.

Zirna bul hi Gokhale Memorial school, Kolkata ah a ṭan a, kum 1998 khan Mount Holyoke College, Massachusets USA aṭangin Economics, Mathematics ah a graduate a. JPMorgan Chase, New York, London ah te Investment Banker hna a thawk a, London a awm lai hian vice president a ni phak hial a ni.

London ah hian Bank-a thawk ve tho Denmark tlangval Lars Brorson chu pasal atan a nei a, rei an innei lo. A pasal nen an inṭhen hma kum thumah Advocate Jai Anant Dahaidrai a ruktea inkawpa ngaih an ni. (NavBharat Times 28/10/23). He advocate hi tuna MP a nihna aṭanga ban tura thu buai theh luttu a ni.

Politics kawng a zawh

Mahua Moitra hian JPMorgan Chase-a hna ṭha tak a thawh chu kum 2009 khan bansanin London aṭangin India ram politics khel turin a lo haw a. Kum 2009 hian Indian National Congress party a zawm nghal a, mi thiam tak a nih avangin Rahul Gandhi lakah pawh a tlatlum nghal hle a, ṭhalai hruaitu atan chher chhoh ngei a tum mek laiin kum 2010 ah Congress party chu chhuahsanin All India Trinamool Congress party ah a lut a. Kum 2016 khan Karimpur constituency, W Bengal aṭangin MLA atan thlan a ni a, kum 2019 khan Krishnanagar bial aṭangin AITC party ticket bawkin MP atan thlan tlin a ni.

Boruak a nei nghal hat

Mahua Moitra hi MP atan thlan tlin a nih aṭanga thla khat hnu lawk June 26, 2019 khan BJP sorkar Narendra Modi kaihhruai chu mimal thuneihna (fascism) a a luh theihna dan kawng sarih a sawi a, he thu hi national media lamah sawi leh chai a hlawh hle nghal a ni.

Kum 2020 December thla khan India ram thu thar thehdarhtute chu uchuak taka sum an ngainatzia sawiin an hming lemah 2 paisa a phuah a. Hei zet hi chuan India media mite thin a khei kher mai. An thinrim chuan Mahua Moitra chungchang thu chhuah tawh lo turin thutlukna siamin an dodal (boycott) nghal rap a nih kha. He a thusawi hi a awmna party pawhin an party MP a nihna anga sawi a nih loh thu leh, a lakah hian an kut an silsan nghe nghe a ni.

February 8, 2021 ah tuna Central sorkar leh India ram dan lam rorelna (Judiciary) chu nasa takin a sawisel a. Hei mai hi a ni lo, Parliament House chhung leh pawn lamah Central sorkar diriamna leh sawiselna chu ṭawngkam hriam tak tak hmangin a sawi chhuak fo a, a zavai chuan sawi vek lo mai ang.

Hindu Pathian Kali chu a hnena thil pek hlan atan ZU pawmtu a nih thu a sawi chuan Hindu-ho a tithinrim kher mai. He thu a sawi pawh hi Trinamool Congress chuan thuchhuah siamin an party ngaihdan a nih loh thu an chhuah leh a ni.

Cash for money

October 14, 2023 khan Supreme Court advocate Jai Anant Dahadrai (a pasal neih laia a kawp kha) chuan CBI hnenah Mahua Moitra chungchang thubuai FIR theh lutin, Mahua Moitra chu chhui chiang turin a thlen a. Mahua Moitra chhui chiang tura a thlen chu sum chhehrelh thu (money laundering) leh corruption a ni. Advocate Dehadrai hian he lehkha hi Lok Sabha Speaker Om Birla hnenah leh Lok Sabha Ethics Committee hnenah a thlen tel bawk.

Advocate Anant Dehadrai hian Mahua Moitra chu sumdawng lian tak a hming Darshan Hiranandani hnen aṭangin sumdawng lian a elpui, Adani Group tih chhiat theihna tur Parliament-ah zawhna zawhsak man sum a dawng a ni (Cash for query) tiin Mahua Moitra hi a puh a. Advocate Dehadrai thu behchhan hian Nishikant Dubey BJP MP Bihar lam mi chuan Mahua Moitra MP chhui chiang tur hian Lok Sabha Speaker leh Parliament Ethics Committee ah a thlen ve bawk.

October 19, 2023 khan a thurualpui sumdawng Hiranandani chu a beisei loh tawp thil a ti ta tlat mai le. Mahua Moitra thubuai thlentute lam ṭang leh an thu hretu leh an thu thlen chu a dik a ni titu (approver) atan a ṭan thu affidavit hmangin a theh lut ta tlat mai. Hiranandani hian Mahua Moitra MP hminga Parliament-a chhan tur amah ngeiin a ziah (type) ṭhin tih thu a nemnghet ta tlat mai.

Hetiang hi thleng mah se, Mahua Moitra chu a la zam awzawng lo mai. Amah an puhna chu intih hmingchhiat tumna mai leh thil dik lo a nih thu huai takin a sawi a, Media lam lah an phur nasa mai. Parliamentary Ethics Committee leh CBI chhui chian ngei pawh a inhuam thu leh a lawm thu a sawi.

Bui chhia laih lohin a inpuang ta

October 28, 2023 khan Mahua Moitra chu a ṭang zo ta lo. Parliament Member te chauhin an hriat tur password/ID (Parliamentary login credentials) chu Darshan Hiranandani hnenah zawhna zawh/chhut theihna turin (for typing questions) a pe tih a puang ta nge nge a ni. A hnen aṭang hian thil pek holàm te te nghawng awrh (scarf), hnawih sen (lipstic) etc a dawn thu pawh a sawi, heng thil pek a dawnte hi mimala inṭhianṭha an nih vanga a dawn a nih thu a la sawi fan tho. (Times of India 28/10/23)

Parliamentary Ethics Committee hian Mahua Moitra chungchang hi October 26, 2023 khan amah koin an ngaihtuah a, he Committee member te laka a lungawi lohna thu ṭawngkam dengkhawng tak tak te, a tihtauh chungchang te leh an thu leh hla tam tak sawi vek sen loh a awm. Amah khingtu a bialpa hlui (ex partner) Advocate Anant Dehadrai nen an inkar thu te leh thil tam tak a sawi bawk.

MP aṭangin an ban dawn

November 9, 2023 khan Ethics Committee chuan Mahua Moitra chu Lok Sabha MP a nihna hlihsak turin thu an titlu a, he an thutlukna a siam, he rawtna (recommendations) hi Winter Session of Parliament pawm turin an thlen ang.

A mak em?

Darshan Hiranandani hi Parliament ah hian Mahua Moitra password/ID hmang vawi 47 a lut tih Ministry of Electronic and Information Technology chuan an finfiah. Mahua Moitra parliamentary login ID, password hi hmun thum aṭanga hman a ni – Dubai (UAE), New Jersey (USA), Bengaluru (India). Mahua Moitra hminga Parliament account-a a luh lai hian Moitra hi Kolkata, Delhi-ah te a awm lai a ni. (India Today 24/11/23)

Mahua Moitra hi MP a nih hnu hian ram dangah vawi 14 a zin chhuak – UK 4, USA 3, UAE 3, France 2, Nepal 1, Bangladesh 1 (India Tovawiday 1/11/23)

Parliament session

Parliament Thlasik ṭhutkhawm (Winter session of Parliament) chu state 5 Assembly inthlan result chhiar tuk December 4-20, 2023 hian koh a ni. Parliamentary Ethics Committee report "Cash for query" vanga Trinamool Congress MP Mahua Moitra Lok Sabha Member a nihna aṭanga ban tura an pawm (recommendations) chu pawm a ni ang. (The Hindu 9/11/23)

- Huna Kawlvawm