BETHLEHEM TLAWMNA MIDANG TAN
Chungnung bera, thlarauva awm, mihringte hmuh theih loha chu a mite rawn lam turin Bethlehem-ah hmuh theihin a lo lang ta a. A lalthuthleng rawn kalsanin mahni leh mahni intitlawmin bawih anga insiam in a lo kal a. Mite hriat lar loh, miten engahmah an ngaih loh, thinlung leh rilru tlawm, nuntlawm Mari, chungnung bera ngaiha mi thianghlim hnenah chuan a lo kal a. Mari hnen aṭang ngei chuan Pa famal ni turin a lo piang ta a ni.
A mite lam tura lei leh van Lal ropui ber inphah hnuaina leh a tlawmna chu a ropui zia te, a thukin a san zia te chu bawhchhetu lei mihringte hriat sen rual a ni lo. Pa famal neih chhun hmun tlawm ber Bethlehem daireh a lo piang ta mai chuan lei leh van a nghawr nghing a, a tlawmna chuan khawvel a hneh a, a ngam ta a ni.
Bethlehem a nun tlawm, khawvela a hneha a ngamna kan Lalpain nei ve tura min duh chu kan nunah kan lakluh hun chuan kan nun leh ṭawngkam chuan mite thinglung, rilru leh nundan a hneh ang a, mite Lalpa lamah kan hruai thei dawn a lo ni. Thinlung leh nundan chapo chuan mi te nun a hneh thei lova. Lal thar lo piang, kan tana ranthlenga mu tlawmna puan nem sin tlawmna chauh chu mi te nun hnehtu dik awm chhun Bethlehem thuril ber chu a ni.
Remna Lal lo piang chu lawm turin dawrah thil ṭha leh mawi te kan lei a, thian te kan in present thin a. Chumi piah lamah chuan Bethlehem aṭanga kan chhawm, chhungril lam aṭanga lo chhuak ṭawngkam tlawm te, nun tlawm te hmangin kan tana nau lo piang a chu chibai buk nan mi harsa zawk te tan kan neih rohlu te present ila a va hlimawm dawn em !
He hun duhawmah hian kalkawngah ngawi renga inpel mai lovin, a be hmasatu zawk ah ṭang ila, “ I dam em? Krismas Chibai “ tiin chibai inbuk tawn ila a va nuam dawn em!
Krismas thurelkhawmna ah mahni ngaihdan kaltlang pui tum ṭalh lo in thiante thurawn ngaichang thiam ila, chungte chu Bethlehem aṭanga nun tlawm lo lang, kan nun a kan chhawm luh tur te chu an ni.
Itsiknate, mahni hmasialnate, chaponate, mi chanai itnate, duhamnate hi Bethlehem-a tlawmna nun lo langah chuan an leng ve lo a ni.
Servant of God te, Government Servant te, Public Servant te hian Bethlehem aṭanga tlawmna nun lo lang “Ngaiteh Lalpa Bawihnu ka ni, I thu ang zelin ka chungah thleng rawh se” tih hi an nunah an sengluh hun chuan, min hruaitu kan ram tana hnathawk lai mipui te zingah chhiahhlawh emaw tia kan hmuh hunah hringnun hi a lo nuam anga, chutih hunah chuan Lalpa’n kan hma a dawhkanah eisen loh min la chhawp sak ngei ang.
“Krista nun tlawm ringtute nun kawng zawh tur chu,
Mi te hnehtu I nun tlawm chu.
Lalpa min chantir ve ang che “
tichungin Bethlehem lam I pan zel ang.
- H.Neihchungnunga, Durtlang North