ECHS : EX-SERVICEMEN TE HEALTH CARE SYSTEM

1. Ex-Servicemen Contributory Health Scheme, ‘ECHS’ tia kan hriat lar zawk hi India rama Healthcare system, changtlung tak si, hriathlawh tawk lo zinga langsar ber ani hial awm e. Chuti taka hriat a hlawh lohna chhan chu engdang vang ni lovin Ex-Servicemen(ESM) te leh an chhungte tan bik liau liaua duan anih avang ani. ECHS dinna hi kum 20 awrh chauh ala ni chung hian India ram pumpui ah member Nuai 52 vel a nei thei ani.

2. Kum 2022 thleng khan ESM te chuan damlo inenkawl nan Armed Forces Group Insurance Scheme an hmang ṭhin a. He Insurance Scheme hnuaiah hian natna enkawl theih bik a awm avang leh Central Health Scheme dangte aiin a changtlun tawk loh avangin damlo te inenkawlna changtlung tak, ram pum huap thei ni thei turin ECHS hi ni 01 April 2003 khan din alo ni ta ani. ESM te hi hmun dang, mahni khua ni lem lo a khawsa chhunzawm ta an tam avangin ECHS chuan a huap zau thei ang ber turin hma a la zel a. ESM te tam deuhna hmun ah Polyclinic te a din a, an tam lutuk lem lohna ah chuan Mobile Medical Unit hmang ten damlo inentirna a kalpui ṭhin thung ani.

3. Hun reilo te chhungin ECHS chuan Polyclinic 426 te alo din a, Regional Centre pawh 28 ngawt din alo ni ta ani. ECHS changtlun em em na pakhat chu damlo te enkawl nan SOP chipchiar tak a nei hi ani. A chungnun em em lehna chhan chu Health Care scheme dang ang lo takin inenkawlna sum senso ah ‘LIMIT’ a nei ve lo hi ani.

4. India rama Health Care System hrang hrang te chuan an thawhpui Hospital te kaltlangin damlo inenkawlna an kalpui a, ahranpa in clinic an nei ngai lo. ECHS ah erawh chuan a bik taka ESM leh an chhungte damlo lo enkawl lawk nan Polyclinic a nei a, he Polyclinic ah hian Doctor leh Dentist te an awm a, Laboratory leh Pharmacy te a awm tel bawk ani. Polyclinic ah hian damlo 60% vel hi chu enkawl theih anni tlangpui a, thisen test leh an damdawi mamawh pawh heta pek chhuah vek an ni. Damlo te damdawi mamawh pawh, Polyclinic Pharmacy a awm lo pawh heta ṭang hian an chahsak thei bawk. Polyclinic in a enkawl theih piah lamte chu Military Hospital ah emaw Empanelled hospital ah te refer leh niin enkawl chhunzawm anni ṭhin.

5. Aizawl leh Lunglei ah te pawh ECHS Polyclinic din alo ni ve ta hial a, hengte hi Type ‘D’ Polyclinic a chhiar niin Doctor leh Dentist pakhat ve ve an awm ani. Polyclinic hi ESM pantute an tam dan azirin a lianin a changtlung zel thei a. Pantu an tam chuan tuna Mizorama Polyclinic awmte hi Type ‘D’ aṭang Type ‘C’ ah te pawh a inhlangkai thei a, chutiang anih chuan Doctor pawh 2 an awm thei anga, Specialist Doctor te thleng pawhin a rawn ṭhutchilh thei dawn ani.

6. Tun hnai khan ECHS chuan State Referral Hospital/ Zoram Medical College chu a empanel a. Tunah chuan ECHS member zawng zawngte’n ZMC ah a thlawnin an inentir thei tawh ani. ZMC a inentir tur hian Polyclinic aṭanga Referral lak hmasak a ngai a, he referral lehkha hmang hian ZMC a awm, kan ECHS Staff va hmu in ani chuan damlo te inentir dan tur leh an senso te alo buaipui chhunzawm leh ṭhin ani.

7. Inentirna hi ZMC ah chauh a tih theih tihna ani lova, Polyclinic aṭanga referral nei te tan North East states a ECHS Empanelled Hospital a an duhna Hospital ah an inentir thei. An case a zirin India ram hmun lian zawk ah te pawh a inentir theih lehzel.

8. Empanelled Hospital neih hi a pawimawh em em na chu mahni sum sen ngai lova treatment lak theih anih vang ani a, thil hlu tak ani. Chutih rualin Empanelled Hospital ni lo, Private Hospital ah pawh inenkawlna hi a kalpui theih tho a, mahse chutiang ah chuan mahni sum lo hman hmasak a, a hnu a bill let leh a ngai thung. Bill erawh Central Government Health Scheme (CGHS) rate awm sa hi rin anih avangin, chutiang ang zat chuan pek let anni ṭhin. Government Hospital, Empanelled lo ani erawh chuan CGHS rate hi hman ni lovin, 100% in bill pek let leh anni thung ang.

9. Emergency thil ah damlo te hian an tana pan remchang ber Hospital an pan thei a, Polyclinic atanga Referral lak hmasak pawh a ngai lem lo. Amaherawchu Hospital luh aṭanga darkar 48 chhung ngeiin Polyclinic an rawn hriattir tur ani. Damlo lo enkawltu Doctor khan ziakin ‘Emergency’ case ani ngei ani tih certificate a pek a ngai bawk a, chutiang anih chuan Empanelled Hospital a an lo luh chuan sum sen a ngai lo anga, Empanelled Hospital anih loh chuan CGHS rate a reimburse sak anni ang.

10. Ex-Servicemen leh an chhungte hi India hian a ngai pawimawh hle a, an pual liau liau hian Ministry of Defence hnuaiah Ex-Servicemen Welfare Directorate te a din hial ani. Chumi Directorate hnuaiah chuan ECHS pawh hi dah ani a, a ngaihhlutawm hle mai. Tunah hian Mizoram ah ECHS hmangtute hi 6000 pawh kan la tling lo a, a hmang thei, rawn la hmang lo hi 6000 aia tam an la awma hriat ani. He Health Care Scheme hlu tak hi a hmang tur dik tak te hian rawn hmangin a hlutna te hi rawn hre nawn leh se a duhawm hle. A hmang thei, rawn la hmang lo te pawh hian rawn hmang se, kan Polyclinic te hi a rawn changtlung chho leh zel thei dawn ani.

- Wing Commander HL Risanga (Retd)