Punjabi tlangval leh Mizo nula inhmangaihna chu !
Tu Zopa thluak hian nge kan Mizo nula ngei maiin, Indian Cinema khawvelah a changtunu ber dinhmun a la luah turzia ngaihtuah phâk tawh ngai ang ni! Mahse, chu chu a thleng tlat si a ni.
Punjabi tlangval, Amritsar khaw chhuak Vikrama leh ri mawia eizawng Mizo nula Puii (Nunui Rualleng) inkârah, inngaihzawnna leh inhmangaihna lo piang chuan, Lal Isua lo pian dâwna harsatna lo thleng tluk thuak tur kawng bumboh a zawh a ngai ta tlat mai.
India rama hnam peng hrang hrang zingah pawh, hnam chungnung leh changkang Punjabi hnam leh tribal hnam inan lohzia, nunphung danglamzia leh khawsak inthlauhzia chu sawi hranpa a ngai tawh lo, mi tin hriat a ni!
Vikrama chhûngte hi hnam tihdan phungthlu zet mai an ni a. An hnam chin ṭhan dan angin, Vikrama pawh hian an mi leh sa zinga mi ngei nupui nei tura beisei lâwk diam a ni.
Mahse, a tum lâwk hauh lohin ri mawi a ngainatna chuan, ri mawi khawvela cheng mêk tribal nula Puii a hmêlhriattir ta nawlh mai a. Hmêlhriat satliah ngawtah duhtâwk lovin, ri mawi leh Puii zûnah a uai kawp ta!
Hnam ze inang lo lutuk, nunphung, khawsazia, hmaifang thlenga chhim leh hmar ang hlauha danglam leh inanna reng nei lo, hmangaihnain zâi khata a luan duntirna chuan eng ang harsatna namênlo nge a paltlang a ngaih dâwn le?
Amazon MiniTv lamah JAR Pictures chuan December ni 1 aṭangin, Romantic Drama Series Ishqyapa (Hmangaihna) chu a thlawna en theihin a tichhuak dâwn ta e. Trailer aṭang rengin he series hi en a châkawm nghal zek zek a.
Nunui chetla vel pawh a hmuhnawmin, Hindi ngeia han ṭawng bawih hnâp pawh a thiam hmel khawp mai. Kan Mizo nula ngei maiin hetiang hlawhtlinna a han chang ta mai hi, a chhuanawm takzet zet a ni e.
- Lalremliana Pachuau