Inthlan Boruak: Aizawl Bial thum thlirlawkna

A Boruak Thlirna

Kumin inthlan chu politik bazaar ah policy zuar an ṭhahnem deuh bawk a, inrinsiak thawm a thang nasa leh hle mai. Thlir dan chi thum lian tak tak a awm a, chung te chu – MNF hi an sawrkar leh ngei ang; ZPM an sawrkar ang; leh Sawrkar inṭawm (coalition government) a awm ang tih a ni. Kum 2018 khan Congress khan MLA 34 neiin chak takin rorel lai an ni a, mi tam tak khan Sawrkar inṭawm a awm loh vek pawhin Congress kha ala sawrkar phak kan la ring fur awm e. Amaherawhchu, kumin inthlan ah hi chuan Congress sawrkar ring hi chu an tam lo hle tih hi vantlang titi lian ber niin a lang.

MNF rorel lai hi kum 2018 a Congress rorel lai ai khan an che ṭha zawk awm mange tih tur a ni a. Tin, Congress MLA te ai chuan MNF MLA te hi an zuan pawh a zang tlang zawk niin a lang. Khawpui leh mipui bit deuhna hmun ah chuan politik thlir dan te a lo danglam a, an hawiher danglam vang nge ni ang tling tur a rin leh duh ah hian MNF la thlang fur ho hian CM leh a chekkawi te vanga MNF tlin rin tawh lohna hi a awm niin a lang.

Tin, Congress hi an candidate te en hian mi chhuanawm tak tak an awm nual a, zirna lamah pawh mi thiam chungchuang te, sum enkawl lamah pawh mi hmingṭha takin a ho a, sawrkar inrelbawlna lamah pawh a lu ber ni ṭhin in a tuipui a, TV lam a mi lar tak leh thawm lian tak in a belh leh bawk. Hengte avang hian a mimal tak chuan an iai awm loh hle a ni. Nimahsela, politik chu boruak nei, thli beng lam nei a nih angin kum 2018 inthlanpui zawh aṭanga inthlan te sep awm zawng zawng deuh thaw ah Congress hi an che ṭha thei reng reng loa. Heng te hi thil thleng mek a nih avangin kumin MLA inthlan ah hian an rawn chet ṭhat phut hi rin pui a har hle.

ZPM hi kum 2017 a din, a kum leh a inthlan hmachhawn nghal an ni a, MLA seat 8 lai an rawn la thei a. Aizawl bial 11 awm ah bial 6-ah chakna an chang phak a ni. Party indin thar mai nisi heti tak a seat an rawn la tam thei hi mipui tamtak zawhna pawh a ni mek reng a, engvang nge ni ang? A chhanna remchang tlawngawl ber chu ‘MNF leh Congress hne tawh vang’ a ni. Hei hi rorel lai chuan an hmu thiam a ni chek ang chu an sawrkar tuk aṭangin Congress do ta lo chuan ZPM chu social media, TV, chanchinbu leh Party thuchhuah hrang hrang ah ZPM do na leh beihna kan hmu ta tluar tluar a ni.

Serchhip Inthlan Ṭhat

Tun hnai tê khan Rahul Gandhi chu a thusawina pakhat ah “Ruktu te hi an hming ah Modi tih a tel zel” tih a sawi avangin hek a tawk a, MP a nihna aṭangin ban a ni nghe nghe a nih kha. Ngun zawk a ngaihtuah chuan MP aṭanga ban phah nan meuh chuan a ho angreng hle a, dan lairil a bawhchhiat hmuh tur a awm loa, a ṭawngkam an huat avang maia hek tawk a ang mah zawk. A thiam lohna hmuh tluantlin a nih loh vang a ni chek ang chu MP a nihna pawh pek kir leh niin kha mi hnu aṭang khan vung takin India ram hmun hrang hrang ah campaign beihpui a thlak a, phai hmunpui lam Congress chu a tuai thar leh hle tih hi phat rual a nilo. Hmanni lawk a Mizoram a rawn tlawh pawh khan ngaihlu tu zirlai leh ṭhalai tam tak an awm a, MP aṭanga an ban dan te leh BJP ten an tih duh dahna zawng zawng tuar chhuak a pachang taka politik a thil thar a tawng ta hi kan lawmpui hlawm a ni chek ang chu. Chu chu MPCC te chuan Mizorama sawrkarna chan phahna tlak ah an lo ngai ve mek bawk a. Khawnge Congress politik thlir thiam kan tih te kha an awm zawh tak.........? tih mai a awl ṭhin.

Serchhip inthlan ṭhat lo awm chhan kha ngun taka ngaihtuah chuan a mak tih loh rual a nilo. Rahul Gandhi hian MP a nihna bansan phahna tur hial khawp in dan lairil a bawhchhe lo ang chiah khan Pu Duha khan MLA aṭanga ban a nihna tur khan khawi dan lairil mah a bawhchhe lo a ni. Inthlan hma pawh a ZPM hminga campaign na na na ‘a ZPM lutuk’ tih vanga han hek tlat mai kha chu a dâwn tawi thlak a, a totalitarian lam rawngkai lek lek zawk a ni.

Kha inbanna leh inthlan ṭhat khan Pu Duha hrim hrim bak ah ZPM boruak a ti alh zual a, rorel lai MNF huatna leh duh lohna kha Serchhip bial chauh nilo Mizoram pum mipui te ah a tuh thar a tih loh theih loh. Khata ṭang khan Congress chuan party ah chuan pathumna an nih an nemnghet a tih theih a, MNF lah inthlan tesep ah an chak tlem ta hret hret niin a lang bawk.

A boruak kal zel leh LMC inthlan

LMC inthlan kha sawi telloh theih a nilo a, khati tak maia Municipal inthlan a inhnehna nasa kha India ram hmun dangah hian thleng ve tak maw. Congress an campaign hma hle a, boruak pawh an nei lian hma a, chak tura rinna pawh a lian viau. MNF chu rorel lai an nih angin campaign tur a thawk phei pawh an hraw hle a, Hnam Run lam aṭangin campaign beihpui thlak tur an in ruat zuk a, ruling tha nen an beih avang khan chak loh kha thil har tak tur zawk niin alang. ZPM va campaign ve kha thil danglam teh chiam a awm hriat a ni loa, Pu PL Liandinga thu va sawi tawite kori tu hmel zet leh Assembly House a Dr Vanlalthlana thusawi chhimbial hmangaihna âwka ni awm fahran kha a tla na a ni chek ang chu bial zawng zawng an hui fai kelh a nih kha.

Mak angreng takin LMC inthlan leh Serchhip bye-election kha boruak a huau huau loa. Mipui an phur lo deuh em ni chu aw tih theih a ni. Nimahsela, Serchhip bye-election ah te kha chuan vote tla kha 80 per cent chunglam a ni daih mai a, khata tanga lang chiang tak chu mipui khan ngawi rengin ngaihdan nghet tak an siam tawh a. ‘Party chu an thak thak in lo thak sela, kan vote tur chu kan sawhsawn tawh chuang lo ang’ an ti ni berin a lang.

He boruak ang deuh hi tunlai Aizawl bial hrang hrang 11 ah pawh hian a in mung mek niin a hmuh theih. Mipui hi kan phur lo nge kan tui lo nge vote tur kan hre hlawl lo zawk ni ang tih tur a ni. Mi han zawh kual vel hian ‘ka hre thiam lo’ an ti fur a; Youtube eng chanel-nel emaw ten mipui ngaihdan/opinion poll an lak lah hian a sakechek nazawng hian ‘ZPM’ hi an ti hlur zel mai bawk si. Ṭhenkhat tan hi chuan ‘a awihawm em em loh’ tih loh rual a nilo.

Aizawl khawpui bial 11 ah tunge chak ang?

Han awih loh sak ngawt dawn a ni thei si lo, awih dawn a ni thei chiah bawk si lo. Kumin inthlan boruak zet chu thlir thiam a har nek nek hle mai. Hetiang hi a nih nuai avangin kum 2018 a Tuichang biala zirchianna ang te, Serchhip inthlan ṭhat te, AMC inthlan te, leh Tuirial inthlan ṭhat a zirchianna ang te neih leh a ni a. Hetianga zirchianna hi Aizawl bial paruk ah kum 2022 khan neih a lo ni tawh a. Hemi ṭum hian Aizawl East – I, Aizawl South – II, Aizawl South – III, Aizawl West – I, Aizawl West – II, Aizawl West – III te luhchilh bik an ni. Heng bial paruk ah te hian ZPM chak tur a ring leh chak tura duh hi a sang deuh vek a. Amaherawhchu, Aizawl West – II ah erawh ZPM leh MNF inthlauhna hi 2 per cent lek a ni. Hemi awmzia chu Aizawl West – II ah hian MNF hi an la chak hle tihna a nih chu. Chutiang bawk in Aizawl South – III ah pawh ZPM chak tur a duh an tam rualin MNF chak tur a ring hi an la ṭhahnem zawk. Hemi awmzia chu Aizawl South – III bial ah chuan kum 2022 thleng kha chuan MNF dinhmun ala ṭha zawk tihna a nih chu.

Bial dang 4-ah te chuan ZPM hi chak turin an duh a, an ring ber bawk a, party dang tan um phak rual loh turin an vung a ni. Amaherawhchu, boruak hi danglam thei a nih avangin kumin October tha khan bial thar pahnih – Aizawl North – II, Aizawl North – III leh Aizawl West – II bawk hi luhchilh nawn leh an ni a. Heng zirchianna hnuhnung ber in a tarlan dan ah chuan Aizawl North – II ah ZPM candidate hian vote tla zawng zawng aṭanga 45-50 per cent vote hmu in chak tur a ni a; Aizawl North – III ah ZPM candidate hian vote tla zawng zawng aṭanga 35-40 per cent vote hmu in chak tur a ni a; Aizawl West – II ah ZPM candidate hian vote tla zawng zawng aṭanga 37-43 per cent vote hmu in chak tur a ni bawk.

Aizawl North – II bik ah hi chuan ZPM candidate hi a sang fal hle a, tu han umphak chi zia zang a nilo, majority vote a hmuh theih hial a rinawm. Aizawl North – III bik ah hian ZPM leh MNF candidate hi an in bei tawk hle mai a. Amaherawhchu, ZPM candidate hian MNF candidate hi vote 1500 – 2000 in a hneh zawk ang. Tin, Aizawl West – II pawh hi ZPM leh MNF in bei tawk tak tur tho an ni a. Zirchianna hmasa in a tarlan dan phei chuan ZPM candidate hi vote 200-400 vel a chak chang chang chauh tur a nih laiin tunhnai boruak rawn alh chho hi MNF lamah nilo in ZPM candidate lam ah a alh kai zel a, hei hian ZPM candidate chak tur hi a hril chiang ta chauh a ni. Chutichuan, Aizawl West – II ah hian ZPM candidate hian MNF candidate hi vote 2500 – 3000 in a hneh ang.

Heti hian Aizawl bial 8 bik hi luhchilh a ni ta a, bial tin ah ZPM a sang fal hle a. Chu chuan tun hnai Zemabawk Local Council inthlan ṭhat te, Durtlang te leh hmun dang dang a inthlan ṭhat ah te khan vung a chhuah a tih theih awm e. Tin, heti hi thil nihphung a nih tak avangin Aizawl khawpui bial 11 ah hian ZPM hi an chak vek a rinawm hle a; chak fai vek ni sela thil mak a ni tawh lo ang.

- Engkima Chawngthu, Chhiahtlang. lalengkima@iumizoram.edu.in