Thlirna Tlang Dang: COVID-19 Hlâwkna

A mak teh e maw! Khawvêl huapin hripui a leng a, kan buai mup mup a, kan phu mur mur a. Novel Coronavirus, COVID-19 hi kan va retheihpui êm! He hripui vanga ram hrang hrang sum leh pai dinhmun tlachhe mek te hi a râpthlak lutuk. Chuti chunga COVID-19 hlâwkna lo ziah chu thil buaithlâk lam lam pawh a ni thei maithei. Mahse, i rin loh lam daih a ni thei asin!

Nikum kum tawp lamah China ram khawpui pakhat Wuhan-ah hrawk lama harsatna thlen chi, thâwkna lam tibuai thei hri thar an hmuchhuak a. He hri hi a tirah chuan China ram mipuiten an thihpui nghâl sup sup angin kan hria a, he hri kai enkawltu doctor-te pawh an thi a, kan hlau lutuk - kan khur zawih zawih deuh vek mai a nih kha. 

'India ramah hri kai an awm ve tawh a ni awm e' tih a rîk hnuah phei chuan kan va hlau lehzual tak! He hri - Novel Coronavirus - hi kan khua leh kan vengah a rawn lût ve ang a, kan tlu nghâl tawp tawp mai ang tih kan hlau a. Veng hrang hrangah palkawngkhar kan siam a, hrui kan pawt a, veng khat aṭanga veng lehlam kal turin phalna lehkha ken a ngai a; kan inmelh rum hial a! 

Kan han hre chiang deuh a, chu hripui chu chuti taka thihpui tham a lo ni mang hauh lo mai a. Chu hripui vanga thi ni-a an sawi tam zawk daih chu natna dang an vei avanga thi ta an ni zawk mah a; an swab sample-ah cornavirus thar chu a awm ni-a hriat a nih chuan cancer te, zunthlum te, BP sang te, TB vei te, eng natna vei pawh ni se 'Covid-19 vanga thi' a ni ta vek mai a ni tihte kan hre ta a. 

Chuti taka Covid-19 vanga thi ni tura natna dang vanga dam lote pawh an hrawk leh an hnar hawlh zêl an ni chung pawhin, India ram, mihring tluklehdingawn khat leh vaibelchhe thum aia tam awmna rama Covid-19 vanga thi chhinchiat zat chu - Covid-19 hri kai hmuhchhuah atanga za zêla pahnih pawh an tling si lo! Mahse, kan hlau lo thei si lo! 

Chuti fakauva kan hlauh chhan chu eng nge? He hripui hi a hlauhawm lutuk a, a kai apiang mai an dam chhuak tawh lo va, a dam chhuak chhun te pawh biak tlâk an ni tawh lo. Chu mai a ni lo, chhungkaw pakhata mi pakhatin a kai tawh chuan a chhungte zawng zawng nen an na nghâl vek a, chu mite venga mi dangte pawhin an kai nghâl vek a. A kai tawhte chu eng damdawi mahin a chhan thei lo va, thih ngei ngeina - ramtuileilova chhuahna a nih vang em ni? Ni lo! Ni miah lo! 

He hri hi a hlauhawm an ti a, nasa taka sawiṭhaih kan ni. He hri kai thar zât, hri kai tawh zawng zawng belhkhâwm zât, he hri avanga thi tawh zât chu englai pawha hrilh kan ni bawk. 

Kan hlau lo ang tih hi an hlauhawm êm êm a ni ang, media zawng zawngah COVID-19 hlauhawmzia chu englai pawha hrilh kan ni a. Phone hmanga mi kan biak dawn pawhin a hlauhawmzia min hrilh hrep reng ringawt mai a ni.

Chutiang chu a nih a, kan buai nuaih nuaih lai chuan China chuan Coronavirus chi thar kai leh kai lo hmuhchhuak thei khawl - Test Kit chu an hralh chhuak chur chur a. India ramah pawh lâk luh a ni a, a la lûttu company chuan pakhat cheng 245-in an la lût a, cheng 600-in an hralh chhuak leh an ti a. Pakhata 145% zet mai an lo ei chu a dik lo tiin court-ah an inkhing uaih uaih mai a. Chumi hnuah chuan pakhat cheng 400-a hralh a ni ta a, state hrang hrangin kan lei chur chur a. An dam emaw dam lo emaw, an hmelah hriat theih hek loh, rinhlelh kai thei tura ngaih theih dek tawh chu kan test hmiah hmiah mai a ni. 

Covid test kit hi pakhat Rs. 400 man ang a ni ta a, pakhat hi mi pakhat test-na a ni. India ramah December ni 7 thleng khan sample 14,77,87,656 test an ni tawh a, a test nan hian Rs. 23,646,024,960,000 (14,77,87,656 x 400) kan hmang tawh tihna a ni a. Chu pawisa chu tute account-ah emaw chuan a lût ngei ngei dawn chiang a ni. Hei hi India ram chauh a ni a, ram dang kan sawi lo. 

Tûnah hian khawvel puma Covid-19 Rapid Test Kit sumdawnna hlut zawng hi US dollar maktaduai 14,000 aia tam (Chu chu India pawisain cheng maktaduai hlîr 1,022,000 a ni - US dollar 1 leh kan cheng 73 vel a intluk mek) a ni mek an ti a. Kum 2023-ah chuan a test tur ang ang chu kan in-test zo vek tawh tura ngaih a ni. 

Rapid Test Kit market value hi US dollar maktaduai 1,300 vel chauh a ni tawh dawn an ti. Chu pawh chu ni se, India pawisa chuan cheng tlûkleh­dingâwn 94 hu vel a la ni hrim hrim! 

Tuna COVID-19 vaccine siam chhuah tawh zinga lâr ber, Pfizer leh BioNTech-te siam hi Britain-ah chuan hman tan a ni tawh a. He vaccine hian Covid-19 hri hi za zêla 90 vel a veng thei an ti. USA chuan he vaccine hi dose maktaduai 100 a lei dawn a, hemi atan hian Pfizer leh BioNTech hian dollar tlûklehdingâwn 1.95 an dawng dawn a ni.

Pfizer leh BioNTech chuan kum 2021 chhungin he vaccine hi dose tlûklehdingâwn 1.3 vel siam hman an tum a, dose maktaduai 100 man dollar tlûklehdingâwn hnih dawn a nih chuan, dose maktaduai sângkhat aia tam daih man tur chu ka sawi seng lo!

US drugmaker Pfizer leh German biotech firm BioNTech-te hian nakkumah chuan vaccine hralhna aṭang hian dollar tlûklehdingâwn 13 dawn an hmu thei dawn niin an sawi a. Heti zat sum hi heng company pahnihte hian a inzâtin an insem dawn niin US investment bank Morgan Stanley chuan an sawi. 

Nikum mai khan Pfizer hian pneumonia vaccine atangin dollar tlûklehdingâwn 5.8 an lei chhuak a, Covid-19 vaccine an hralh leh ang a, Pfizer CEO Albert Boura chu khawvela Vety doctor zingah a hausa ber dawn chiang hian ka ring!

He vaccine hi vawi khat inchiu a tâwk lo va, vawi hnih a ngai an ti. Vawi khat inchiu man hi dollar 19.50 a ni a, chu chu India pawisain Rs. 1500 vêl a ni a; course khat cheng sâng thum man vêl tihna a nih chu! India rama mihring awm zawng zawng zâtve tling lo, maktaduai 500 hian Covid-19 vaccine hi la ta vek ila, vaccine man atanga a siamtute pawisa hmuh tur chu han chhût teh - 50,00,00,000 x 3,000 = ?

He sumdawnna hlâwk lutuk vang hi nge, khawvêl mihringte hi kan damlo ang tih an hlauh vang ni ang, BioNTech - kum khata Euro maktaduai 109 vel sum thawk chhuak ṭhin chuan risk an la tawp mai a. European Investment Bank aṭangin Euro maktaduai 100 an pûk a, Germany sorkarin Euro maktaduai 375-in an pui bawk a; an hausak phah nasa dawnin i hre ve em?

Mask, Hand Sanitizer, Personal Protective Equipment, nachhâwkna, etc. Covid-19 avanga kan mamawhna sang ta êm êm maite hian hetiang lam sumdawnna a tihhlâwk lehzual dan tur kan ngaihtuah fo ang. Noida-a PPE siamtu ‘Karam’ chu cheng nuai hnih leka bul ṭan an ni a, Covid-19 vang hian tuna an sumdawnna chu cheng vaibelchhe 520 hu a ni tawh zu nia! Sawi tur a tam. He Covid-19 avanga kan hloh a, kan tawrh nasat tak zet lai hian a lehlamah chuan mi ṭhenkhat chuan hlâwkna turu buru lutuk an lo nei a. Chu chu thil kalphung pangngai ni tur a ni mai thei.

Kan sawi tawh ang khian, India ram emaw, khawvel pum huap emaw pawh ni se, natna dang vanga thi ngei ngei tura ngaih pawh, Covid-19 test a positive tawh phawt chuan 'Covid-19 vanga thi' tia chhiar an ni vek chung pawha he hri kai zinga za zêla pahnih pawh tling lo chauh an thi chunga kan buaizia hi, a buaithlak ka ti tak zet a ni.

Engtik lai aṭang khan nge khawvêl hian hetiang hri, a kai zinga zaa pahnih pawh thihna thlen si lo hi hripui tia a hlauh tâk chiam le aw?! Heti tak maia kan buaipui te, kan hlaute hi a hlauhawm êm êm vang ai hian thil dang awm a lo ni palh hlauh ang em tih ngaihtuahna hian min vilh ngar ngar reng mai a, ka inthiam lo ngawt mai.