Written by
- Mamuantea Libra
"Raju awm ta lo ve!" tih kha
Pu/ Tv Lalchhandama thu ziak "Raju awm ta lo ve!" (Ramriah kan tlawm chiang a ni lo vem ni?) tih kha ngun takin ka chhiar chhuak a. Ka beisei loh lam zawngin thu rawn vaw thlu mahse a thu ken kha a ril ka tiin ngaihtuah zui zel a ṭha khawp mai, a bik takin Mizo ṭhalai lehkhathiam chin tan ngaihven zui zel tlak a niin ka hria.
Kha thuziakah khan ngun deuha kan chhiara kan hmuh chu tun hnaia kan buaina kha 'Ramri Buaina' ni lovin 'kawng pin buaina' angin a sawi theih a, a nih loh ber pawhin 'Thlam halsak buaina' a ni berin a lang. Kha kha a reh rual rualin kan ramri la fel miah lo leh a hma aia buai ta zawk chu mipuiin kan sawi zui leh miah si lo.
Thlam an rawn hal khan kan thin a ur em em a, mahse thlam haltu Hailakandi DC Pu Ambanmuthan MP chu Mamit DC nen meeting turin Mizoramah a hnu lawk khan a lo lut a, khatiang zawk kha kan Police te khan lo dang se ṭha tur a ni.
Kan tlawm chian em emna hmun pakhat chu Lailapur kutah a ni leh tlat mai kha thinlung chhung ril ber hi a zak a ni tiin ziak hial ila a mak lovang. Lailapur khan Mizoram state pumpui kha min dang bet reng a ni. Silchar sumdawng hausate leh Bagha lam chuan Mizorama an bungraw lut thei lo avangin an chân nasa a, Mizoram kawng ping kha an support ve lova, nimahsela Lailapur khan Mizoram min hrek buai kha an duh avangin min dang ta a ni.
Min danna chhak lawk lung vawm phak velah chuan kan IR Sipaite chu silai ṭha tawk nen an duty a, an silaite chu Vairam lam hawiin tin sawmsarih mahse Raju-a pawlten kawng min dan khan engmah an zuk ti reng reng lova, chu chu sipai dawihzep vang ni lovin kan sorkar khan Lailapur kha a tawn ngam ngang si lova (BJP kaihhruai Assam sorkar kâp thei kan ni lova, NEDA lamah kan sorkarna siamtu MNF te nen an thawkho vek si a ni). Chutih lai chuan kan MLA te leh kan Minister te chuan Vairengte an tlawh a, thlalak an thehdarh chuai chuai ngam a, a thlang lawka Raju-a leh Lailapur lama min dang chunga thla an la ngam te kha thil inhmeh lo tak a ni a ni.
Kan buaina kha Pu Lalchhandama ziah ang khan han chhui kir ta ila. Kan sorkar cabinet meeting-in kan ram chin kan tih 1875 ramri thlen phak chu sawi loh chumi chhunga Lailapur pawh thleng ngam lovin 1875 ramri kan sawi hi chu lemchanna a ang khawp mai.
Kum 1875 ramri hi kan pawm a nih chuan Mizoram Police hi Dholai (Lailapur piah daih a la ni) bulah va duty daih zawk tur an ni e.