ZPM–Fimkhur ang che aw!

Mizoram inthlanpui 2023 result chu kan hre ta, mipui tam takin an lo beisei leh rin lawk ang ngeiin ZPM chu hneh taka thlan tlin an ni a, an lakah beiseina a sangin an hmabak pawh a hautak dawn takzet tih a chiang reng mai.

Tun inthlana ZPM chakna hi chhut chiang ila, party mal chakna a ni lo tih hi chiang taka sawi ngam a ni a, party-a inziak lut lem lo leh mipui leh an ṭhiante bula ZPM an nih thu sawi lem lo, mahse rorelna ṭha leh dik beisei tute vote hmanga chak an ni tih an inhriat a pawimawh. Party chhung chauh ni loin, party awn lam nei lo vote thlak site chungah lawmthu sawi nachang hria se, anmahni vanga hlawhtlinna chang an ni tih an hriat a, lawmthu sawi nachang an hriat chuan inthlan lehpek thlenga nghawng nei thei tur a ni.

Party mi leh sa chu an awm ngei mai, a thawkhah leh bul tumtu an ni. Kan sawi fo tawh ṭhin angin, Mizoramah hian party ruhrel lian leh party nghelnghet an awm thu hi sawi ṭhin a ni, amaherawchu a khaikhawm nan chuan 'Neutral' lamin an bawh hi an chak zel a, chak zel bawk se la tih hi ka duh dan a nih a, kan ramin kan ṭhatpui ngei pawh ka beisei. Hei hi party dang pawhin hria se la, mahni party mal induhsakna uchuak leh mi dang lawm loh khawpa intihbinga thil thi a tawpa a tuartu chu anmahni party bawk kha an ni tih hria se a ṭha khawp ang.

ZPM tan hna pawimawh hmasa chu leiba tih tlem a ni ang a, hemi kawnga hmalakna tur pawimawh pakhat chu inrenchem a ni. Sorkar hotute an inrenchem a nih chuan mipuiah nghawng a nei dawn, hei mi mipui pawhin kan hriatthiam a, kan dawhtheih ve deuh pawh a ngai dawn tih kan hriat a ṭha ang, kan lo harsa rih hret a nih pawhin kan ram sum leh pai dinhmun siamṭhatna tur a nih phawt chuan rei lote chhung hrehawm tuar kan huam ve pawh a ṭha ang.

Ram economy siamṭhat theihna hnaivai tak a awm, chu chu kan education system siamṭhat hi a ni. High School chinah chuan sorkar school a luh kan hreh lo, kan hreh lo mai ni loin kan inchuh zawk emawni tih mai tur a ni, a hnuai lam middle school leh primary school hi siamṭhat ni se la, sorkar school-ah kan fate kan kaltir ngam a nih ngat chuan, chhungkaw tin hian thla tin cheng sing chuang kan hman ral ṭhinna kha a kiam dawn tihna a ni a, hei hian chhungkhaw khawsak harsa zualpui a tihzaiawm theih a rinawm.

'Ka Eiru Lo ang' tia sawi ṭhinte thlan nachang hretu Mizo mipui tam tak kan awm hi a lawmawm. Sawrkar laipui aṭanga hmasawnna hnathawhna tur lo kal ṭhin hi, a nihna tur ang taka hman a nih chuan hmasawnpui tham a ni, chuvangin ram hruaitu atana thlan tharte pawh hian inthlan hmaa an intiamna kha vawng reng se la, mipui lamin kan beisei ang ngeiin eiru suh se, chu chu hma kan sawnna tur pawimawh a ni. Eiruk loh a, sum hi a hmanna tur dika hman a nih chuan Mizoram hian sorkar term khat chhung lek pawhin hma a sawn thei ngei ang.

A pawimawh berah chuan – Pathian ṭihtu hruaitu kan mamawh a, chumite chuan Pathian rinchhan chunga ro an rel a, an eiruk loh chuan Mizoram thar kan hmu ngei ang. Mahni chakna leh theihna a ni lo a, Pathian leh Mizo mipuite vanga roreltu ni thei tur an ni tih inhria se la, dik leh fel taka rorel turin duhsakna ka hlan.

- Lalthansanga