MAHNI INTHUNUN HI

Mi tam tak hlawhchhamna ni fo chu mahni an inthunun theih loh vang a ni fo. Mi hlawhtling leh ding chhuak kan tih tam tak hi mahni inthunun thei an ni deuh zel bawk.

Sikul naupang chuan a hna ber chu lehkha zir a ni a, lehkha ṭha taka a zir chuan ṭha takin a pass ang a, a len hunah hna ṭha tak a la hmu ang a, chhungte tibuai lovin mahni inenkawla inchawm chungin mi dang a ṭanpui thei bawk ang, chu chu a thil tum bulpui ber a ni ṭhin. Mahse, zirlai ni si a, lehkha zir lova party na leh huau huauna hmuna a kal fo chuan a zirlaiah pass a harsa hle ang. Hlawhtling tur chuan party naa kal chák ve hle mah se, study room-ah a inkhung luih ngar ngar a ngai a, a taksa leh rilru lehkha zir tura a thunun a ngai ṭhin.

Pian nalh nei tur chuan ei leh inah insum a ngai a, exercise lak ṭhat a ngai a, mahni taksa vawn uluk a, taimak a ngai a. TV-a model leh pian nalh hmuh avanga neih ve ngawt theih a ni lo va, dul kiar tireh tur chuan insum a ngai a. Chu tak chu harsa kan tih ber a ni lawi si! Ei leh ina insum tur hian mahni inthunun bawk a pawimawh! Kan chák zawng, kan duhzawng zawng zawng tih a rem lo.

Kan thiltihna kawng tinrengah hian hlawhtling tur chuan mahni inthunun thei mi nih a ngai. Mahni inthunun tur hian hengte hi a pawimawh:-

▶ Kan rilru tiphur thei thil, kan tum tihhlawhtlinna kawnga min pui thei, hriat, ngaihthlak, hmuh tam a ṭha.

▶ Zana mut ṭhat a pawimawh.

▶ Mahniah kan hmasawnna inenlet fo a, hma lam ka pan nge; ka hnungtawlh tih inenfiah fo a ṭha.

▶ Taksa sawizawi peih a ṭangkai.

▶ Digital lam thil (smartphones etc.) khawih chin tawk neih thiam tum tur.

▶ Mahniah tum (goal) fel tak neih a, chumi chu tinzawn ngar ngar tur.

Bible-a rawngbawltu ropui Tirhkoh Paula meuh pawh khan he mahni inthununna hi a ngai pawimawh ngang mai, Paul-a thuchah leh a testimony hi mahni inhneh tur leh mahni inthunun tura fuihna ṭha tak a ni:

"Chutichuan tiam chin lam panin ka tlán ngat ngat a ni, boruak mai hnek lovin mahni ka inhnek zawk ṭhin a. Chuvang chuan ka taksa ka thuhnuaiah ka dah tawh a ni," (I Kor 9.26-27). Paula hian hmun danga mahnia inthunun dan thuruk a sawi chhuah danah chuan, "Thil engkim tih ka tan a thiang a, nimahsela thil engkim tih a ṭha kher lo; thil engkim tih ka tan a thiang a, nimahsela eng bawihah mah ka inphal lo," a ti (I kor 6.12). Kan hmaah hian engkim tih theihna zalenna kan nei a, mahse thil zawng zawng tih ve vek kher hi kan tan a ṭha lo tia mahni kan inthunun theih chhung chuan keimahni kan inhneh tihna a ni.

Mi tam tak harsatna chu Paul-a ang hian kan taksa hi kan thuhnuaiah dah harsa kan ti, kan châk zawng tih duhna thuhnuaiah kan dah tlat a, chu chuan mahni min inthununtir thei lo.

A tak takah chuan thil ṭha engkim mai hi thlantui fara hlawhchhuah a ngai a, he kan chenna khawvel hi hlawh chhuah khawvel a ni. A thawkrim leh taima apiang an ding chhuak ang a, a thatchhia leh zelthel apiang an tlusawp mai dawn a ni.

Khai le, he hlawhchhuah khawvelah hian i tum tipuitling tur leh i duhzawng puitlin turin mahni inthununin bul ṭan rawh le.

- PC Nghaklianmawia