ZOFATE RILRU A NA

Pu Lalduhoma, Mizo­ramin MLA kan neih tawh zinga ṭha ber pawla kan ngaih; a bik takin opposition MLA ah phei chuan ruling legislator-te fuihtu, khalh ngil hram hram tumtu, finchhuahtu, chiktu, zilhtu, khaktu leh chachhuahtu,  a ni aia ṭha la awm miah lo nia kan hriat mek laiin November  27, 2020 khan ban a lo ni ta. Hei hi Australia aṭanga Burma, Nepal aṭanga USA, khawvel puma Zofate rilru a tina em em a ni. 

Hetiang a lo nih rup rup takah chuan tu mahin Pu Duhoma hi dan mit aṭanga thlirin 'sawisel bo a ni e' an ti kher lo a ni thei. Amah pawhin a inti bik kher lo mahna. 

Amaherawhchu, a din­hmunah hian tu pawh ding ila, fihlim theih a ni kher lo ang. A chhan chu hetiang taka thikthu chhiatna leh inkeuhthluk a, in knock out duhna thinlung hi tun hmain a la awm ngai tlat lo. Dik tak chuan hetiang tak hian a chunga roreltute hi a lakah an invilik duhin, a chhe ber hi a chungah an ti duh ang tih amah ngei pawh hian a ring phak bik kher lo ang. 

Zep hauh lovin sawi ta ila, Zofate tumahin chutiang ti turin MNF ministry hi kan ring phalin ka ring lo.  

Pu Duha dinhmunah hian mi tam tak an lo ding tawh a. Tuma'n hetiang hi an la hmachhawn ngai lo va, tu man hetiang tak hian an MLA pui an la beih rawn ngai tlat lo. Tuna rorel mek laite pawh hi chutiang dinhmuna lo ding tawh chu an ni ve tho a, 'Pu Duha hi a dik lo a ni' an ti a nih chuan an ni pawh lo dik lo hrep tawh an ni ve tho tih a puang nawn mai a ni. Chu chu upain "Zawlbuka e tang ṭheuh ṭheuh" an tih chu a ni. 

Tunah pawh amah ang hi mi dang an la awm nual a, ngaimawh erawh an hlawh ve lem lo. Dan ngai pawimawh tak angin MNF MLA te hi insawi mahse;  hengte hian nasa taka  dan an palzut lawi sizia a tilang tho si. An rorelna fair lohzia bak kawh a nei lo va. Dan chu dan anga kalpui tur a nih chuan a ṭhena ni sat tir a, a ṭhena ruah an surtir avangin Pu Duha rorelsaktute hi fair taka roreltute an ni lo tih mi mawl ber pawhin a hmu pha. 

Pu Duha ṭan hrim hrim vang pawh ni lo vin, Mizo mipuiin MNF ministry rorel dan kan ngaihthiam loh em em chhan leh ngaihthiam awm a nih theih miah loh chhan chu, 'na taka rorelsaktute hi mi chunga na taka kut han lek tur em chuan sawisel bo niin kan hmu bik lo' atin a ni. 

MNF ministry hi eirukna chung changah te, ramri humhalh leh mahni policy tihhlawhtlinna lamah te, hleih nei lo taka ram mipuite chunga rorelsakna kawngah te, thil awm ang lo leh dawt finfiah mai theih tur sawi mai mai kawngah te tal hian fihlim ni se chuan, an tih tur tak ti ni pawhin kan hre mahna. 

Amaherawhchu, a engah mah an fihlim lo chang ni lo vin, chumi kawnga an kal zelna tur lo check tumtu 'dah ṭhat' an tum tlat zel hi a vanduaithlak na lai leh mipui rilru tinatu chu a ni.

Mathaia 7: 3-5 chuan Lal Isua'n chiang fek fawkin, he thu hi min chah. Mahni inenfiah fo nan ṭha tak a ni. "Engati nge mahni mita khanchhuk awm chu ngaihtuah si lo vin, i unau mita hmawlh te tak te awm chu i hmuh ni? Engtin nge i unau hnenah 'i mit ata hmawlh te tak te kha mi lak chhuahtir rawh' i tih theih ang? Ngai teh nangma mit ngeiah khanchhuk a awm reng si a. Mi vervek! I mit ata khanchhuk kha la chhuak hmasa rawh; chuti chuan i unau mit ata hmawlh te tak te lak chhuah tur chu fiah takin i hmu thei ang." 

Dan dah lal a ṭha, dan anga ro rel pawh a ṭha e. Chumi ti tur chuan roreltute pawh dan bawhchhiatna lakah fihlim ve ngei a ṭha. 

Fin leh felna lamah te, rem hriat leh rintlakna lam te, thawhrim leh tei rei peihna lamah te, ṭhatna leh ṭha­hnemngaihna lamah tute emaw kan tluk loh vang maia mahni tlinlohna hmu lo leka midang fellohna chhe te changchawi a, arpa chan kanchan laia lal hrawt kan chin chuan kan inkawk tawn nasa dawn a, kan hnam hi a ding chhuak miah lo ang.  Mi tinin tlinlohna kan neih ṭheuh avangin tuna MNF MLA ho zingah ngei pawh hian ZPM hian duh se chuan hek tur an hmu ve ṭeuh ngei ang. 

Chutianga kan kal laklawh chuan kan vai tuar dawn a, kan ram leh hnam a mualpho hle dawn a ni. 'A pawi' tih bak sawi tur a vang ang a, a bulṭantu leh mawhphurtute hriat reng an hlawh ang a; tin, dik lo taka sualna nei lo ang hrima tute emaw den hlum tuartute chu kum khuain Zofate history-ah ngaihzawnawm taka chhinchhiah an ni thung ang.