BLUE CHRISTMAS

Elvis Presley-a ngei maiin, “I’ll have a blue Christmas without you,” tih a han sa mai hi chu a pui teh e. “I'll be so blue,” tia a han kíu raih raih phei hi chuan khawvel pum pui hi a kûrpui ruih ruih mai niin a lang. 

Blue Christmas hla hi lunglenpui viau e ti lo chuan keini ang duang chuan a awmzia tak tak hi kan pawh vak lo. A hla chanchin hmuh theih chhun chhun han chhiar a, han inhâi ven ve deuh îk chuan lungrun viau tur chu a nih hi a tih loh theih loh. 

Blue Christmas hi a ni bik meuh reka an lo serh zinga mi lo ni rengin! Kum khata ni rei ni ber hi ‘Lalmanga nu hlawh (lawm) rawih ni kan ti a,’ kan hre lar viau va; zan rei ber zan erawh chu barah kan khawn lo. 

Mak deuh maiin zan rei ber zan hi “Blue Christmas” tia serh ṭhin kohhran an awm tlat mai. Keinin December 31 zana hmangaih kal tate kan sun ang hian khawthlang lam kohhrante chuan December 21 zanah hmangaih kal tate hriatrengna leh sunna hun an hmang a, biak in dar vuain an lo inkhawm ve lát lát ṭhin a ni. An la urhsun viau ni maw, Lalpa Zanriahte hial an kilho va. Blue Christmas tih hi lengzem hla aṭanga hriat lar ve ni mah se, kohhran tradition 

urhsun zinga mi a lo nih reng chu. 

He zan hian Sappui thinlung mu hnu pawh a kai tho nasa ve hle e. Indopui pahnihna hnua Krismas hla chhuak, a chhuah hnua reh tih ni nei tawh lo, Blue Christmas tih hla phuahtu Billy Hayes leh Jay W. Johnson te hian eng rilru puakchhuaka an phuah nge tih ka la chhiar fu lo nà a, hmangaih duhlai ṭânga bei loh laia phuah a nih chu a hriat ve mai a. Rokunga'n, “A ṭhen thinlai na pawh hi dam rawh se” a tih ang deuhvin anni pawh hian dam lai lusunte pualin an tho chhuak ve ni maw. A chang tawp ber hi chu a ‘blue’ ṭha zawt zawt tak a ni:  

You’ll be doing all right,

With your Christmas of white;

But I’ll have a blue, blue, blue, blue Christmas.

December 21 hi a ‘cial’ êm avangin  Sapho hi chuan sawi dan hrang pawh an nei nual a. Kohhran huang pawnah chuan Winter Solstice tih te, Hiemal Solstice tih te, Hibernal Solstice tih tein an sawi ṭhin. Ni leh kan awmna lei inhlat ber zan a nih avangin thlasik vang lai tia sawi theih a ni reng lah tak a. 

Zan khaw thim rei ber zan hi a ni miau avangin lungngaihna lam hawia hun hman chu a àwm viau e. Kohhran ṭhenkhat chuan Isua zirtir zinga mi Thoma pualin hun an bawk a. Rinhlelhna ruama zankhaw tlaitluana mittui nena ṭhu Thoma puala serh hi àwm riauvin an hria a ni mahna.  

Blue Christmas hi nuam taka hman tum chi pawh a ni lo ve sa hrim hrim a. Tuarna leh lungngaihna leih buak zan, beisein mei sí nena hma lam thlir zan a ni ber a. Bati chhit a langsar hle a, Christmas Wreath-a phah kual bati chhitnaah bati an chhi alh fir fer a. Kohhran mi mual liam tate an rilruah a lang lian ber a. Kum hmasa lama boral tawhte pawh an theihnghilh lo va, a hma kum chiaha kalte pualin biak in ṭhutthleng ṭhenkhat an dah ruak nghe nghe ṭhin.

Keini chuan zan hran rekin Blue Christmas chu hmang chiah lo mah ila, Krismas kan ùr dan hi chu ‘blue’ vat vat tak a ni ve. Kum tin maia kan hla sak duh ber zinga mi pawh:

Awmlai vei leh lusun fate chan tawk hi dawn ve teh,

Hnutiang mual liam hnu ngaiin an tap e;

Par ang an lawm hnu he ni ropui lo thlen hian,

Chhung kim dar ang len lai kha ngai zualin,

Tapin luaithlipui an nul ngei ang,

tih a ni a. Krismas vuakvet chhung zawng hi chu kan ‘pawl’ vat reng a ni zawk. 

Khawvel pumpui thlirin kum 2020 phei hi chu ‘thih rùnpui kum’ tih mai tur khawpin hripuiin khawvel a suasam kum a ni bawk si a, Blue Christmas hian ngaihven a hlawh viau mai awm mang e.