Ration Card chungchang thilmak

Ni 26, March 2016 (Saturday) zingah chuan Vanglaini chanchinbu rawn thleng thar chu ka han chhiar a. Chutah chuan Vanglaini zirchianna huangah hian "Food Security leh Ration Card dik lo" tih hi ka zuk chhiar ta a, tichuan mak hi ka ti ta em em mai a!

Mak tih pakhatna. He End to end Computerization of PDS hi keini NIC (National Informatics Centre) Mizo-ramah chuan a buaipuitu ber ka ni ve a. Chuti chunga 'zirchianna' ni ve si a engmah min zawt ve lo leh kan hotute tal pawh zawt si loa lo zirchian ngawt chu a mak hi ka ti lo thei lo a ni.

Vanglaini hian an zirchiang tak tak nge? Tu emaw mi pakhat thusawi an ziak chhawng ta vel mai mai ni ang le. Kei ka lo ngaih ve dan chuan an zirchiang dawn a nih chuan FCSCA Directorate mai bakah a software siamtu keini NIC te, Computerization pual hrim hrima an rawih consultants te, DCSO te leh a data entry khawihtu ber Technical Assistant ho te pawh an kawm kual anga chuta
ṭang chuan thu dik an zawng turah ka lo ngai a. Hetiang ang hi chuan eng thil mah hi zir chiang tawh lo se a ṭha ka ti hle mai. Journalism hlutna ti hmelhemtu an ni palh mai ang tih a hlauhawm.

Mak tih pahnihna. Vanglaini-ah hian NFSA leh he Computerization chungchang hi ka lo chhiar ve fo tawh
ṭhin a. Tuna hetia mipui lamin a sawiselna an awm hma kha chuan a software siamtu keini NIC lam hi kan lan ve ngai pawh hi ka hre lo. Chutah Ration Card a lo chhuak a, sawiselna a lo nasa ta. Chutah chiah chuan kan hming hi sawi lan a lo ni nasa ta a. He zirchiannaah phei hi chuan vawi ruk lai NIC tih an ri ta hi a mak ka ti thar em em bawk. A hmaa kan hming tilang duh miah lo khan kan lan loh hi an hlau thar ta em em mai a nih hmel!

Mak tih pathumna. Paragraph 7 naa, "Hetih lai hian, pian ni, thla leh kum ziah tur a nih laia kum chiah ziah lan a tam chungchang leh an software hnathawh dante chu ration card tihchhuah tawh hnu, March 15, 2016 khan NIC-a State Informatics Officer chuan FCSCA Director hnenah ziakin a thlen chauh thung," tih lai phei hi chu mak ka tih mai piah lamah ka helh deuh tlat. Kum 2 chuang data entry hi kalpui a ni tawh a, Date of birth enter loa Age zawk an enter chuan a bul maia DOB box-ah khan 1/1/yyyy in a lo lang mai tih kha an hmuh hmaih char char em ni le? Tunge kum aṭang ringawtin mi pian ni leh thla hre thei tehlul ang ni. Hei hi chu software kalphung pangngai a ni e.

Tuna Technical Staff ho an lak thar ṭum pawh khan Chanmari YMA Hall-ah training kan neih puinaah pawh kei ngei hian kum ringawt in enter chuan January ni khat angin a kal dawn tih te pawh ka sawi kha mawle. Chu mai a la ni lo, Ration Card hi print a nih hmain a software aṭang hian PDF file-in lak chhuah (extract) vek a ni. Chumi hna chu Directorate-ah ngei hian an ti a, DOB dik lo chu an la hmuh hmaih leh ta zel em ni le? Mak tak a ni.

Tichuan, cheng nuai tam senga Ration Card an han print tak hnua mipui lam aṭanga sawiselna nasa tak a awm hnuah chuan Director thar a lo awm ta a. Ani chuan he DOB dik lo hi sawi fiah turin lehkha min rawn thawn ta a. Tichuan, kan SIO-in a hrilhfiahna a siam ta a ni. Chumi remchanga hmang a, kan hrilh tlai avanga ti dik lo anga ngaih theih tura an han ziak leh zel phei hi chu a mak a ni.

Heng lo pawh hi mak tih chu ka ngah a, duhtawk phawt teh ang. A ṭul leh kan la chhunzawm leh ang chu.

- Lallawmkima

Scientific Officer, National Informatics Centre,

Mizoram State Centre