Midangte eizawnna kan zah sak a ngai

Inzahtawnna leh inhriatthiam tawnna hi mihring min ti hlutu a ni a. Hawihhawm taka midangte eizawnna zah sak hi kan tihphung tur a ni.

Kan hmel hriat an nih vang ngawta an theih zawng leh an eizawnna, kut thlawna chhawr tum ngawt hi kan tih loh tawp tur niin a lang. Hun hi a hlu a, tangka ai mah pawha hlu a ni. Kan mamawhna vanga midang hun kan khawhral hian, a phu tawk sum leh pai pek thiamte hi a ṭha.

Mi ṭha kan chhawr a, 'ka lawm hle mai', 'i fel hle mai' han tih ngawt te hi a fel ber lo. I hun ka khawhral sak che avangin hei hi lawmthu sawi nan tia, lawmthu sawi paha pawisa pek te hi a hlu. Tunlai hunah chuan, tute mai pawh hi kan buai tawh a. Han che hlek ila, sum a nih nghal zel avangin midangte hun kan khawral a, an tha kan chhawr a nih chuan, hawihhawm takin an kut hah man kan pe zel tur a ni.

Auto rickshaw driver pakhat sawi ka hriat reng chu, 'kan han service a, kan hmelhriatten min lo phar a, ka lo chuang ve an ti a. An duh chen an chuang a, an duhna hmun kan han thleng a, chhuk pahin, 'ka lawm e' an han ti ngawt ṭhin hi chu' tiin a sawi a. Midangte sumdawnnaah a thlawna tih sak tum fo hi chin tam loh a
ṭha. Miin, 'a ngai love' an ti a nih erawh chuan a lawmawm a ni mai a.

Kan thawmhnaw duhzawng leh it zawng leina tur chuan pawisa hi kan ui lo. Facial tih nan ringawt pawh pawisa hi kan seng tam hlein a rinawm. Mizote hian thil pawimawh leh ṭula sum sen hi kan harsat tlang hle mai. Ṭul vak lo, kan mamawh em em pawh ni lo, kan it satliah thilah erawh kan inseng ngam viau ṭhin niin a hriat theih.

Nurse-te pawh hi ka ti ṭhin, kan hmelhriat an nih vang ngawta a thlawna mahni ina ko a, kan mamawhnaa min jection emaw drip min khai sak ngawt tur an ni lo. Hun rei tak sum tam tak sengin, tha leh zung sengin an zir a. Kan hmelhriat an ni a, an rate pangngai ang em em kan pe chiah lo a nih pawhin, engemaw zat chu kan pe ve ṭhin tur a ni.

Miin hnaa an neih, eizawnna bera an hman thil reng reng hi chu, kohhran, khawtlang leh sorkar pawm thil a nih chuan kan hlutpui a, kan zah sak a ngai takzet a ni. Midangte thiam thil leh theih thil hi kan hlutpui thiam loh a, kan inzahsak tawn loh chuan, eng eizawnna mah hi a hlu thei dawn lo tihna a ni. Hawihhawm taka indawr tawn te hi kan hnam tihphung tur a ni.

- Biaksiamtluanga