SORKAR THAR LAKA BEISEINA
Miin Politics a luhchilh chhan chu mipui aiawha rorel te, thuneihna a duh vangte a ni lo thei lo a, chumi chin chu a chhe ngawt hek lo.
Thuneihna nen lo phei chuan ram rawngbawl te, ṭha nia hriat tihhlawhtlinte hi thil theih loh tluk a ni a. Mi tam tak, thil ṭha duh, politics-a lût thei lo, duh lo, ngam lo, huphurh an awm a, a duh leh a ngam tan pawh MLA nih te, Minister nihte hi harsa tak a ni.
Mizoramin a la neih ngai loh sorkar thar kan nei dawn ta a. Kum 1984 aṭanga Mizoram politics tualzâwl lo bawhbel ve fê tawh, Party hrang hrangah pawh Candidate ni a, a beisei ang pha ngai si lo, ZPM Leader leh an Chief Ministerial Candidate, Pu Lalduhoma chuan a tei rei peihna leh, han hlawhchham châng te pawh ngah bawk hle mah se, beidawng duh loa a beih zêlna rah duhawm tak chu a ban phâkah a lo inchhawp fel ve ta! Hetiang dinhmuna ding tura a sual rei zia te ngaihtuahin a lawmpuiawm takzet.
"KALPHUNG THAR" (Mipui Sorkar) tih thu mawi tak (propaganda) neitu, Pu Lalduhoma kaihhruai sorkar kan hmu dawn ta a ni a. Youtube leh Chanchinbu, TV leh Social Media hrang hrangah an thusawi leh thil tum kan hre bel viau tawh a. An ṭhat hmel hle.
Party pahnih Sorkar inchhâwk kan hmu tawh ṭhin a. Anni paw'n Mizoram tan thil ropui tak tak tih leh hnutchhiah an nei a. Tuna mi tharte'na an Manifesto leh an thil tum an dahkhawmna, 'Sustainable Development & Reform Policy' an tih pawh kan chhiar ngun tawh a. Thil ṭha hlir an vawmkhawm emaw tih tur hial a ni.
Corruption laka fihlim leh hnawh bo kawngah te, ram hmasawnna leh sorkar sum ṭul lo taka luanralna tih tawp leh, leiba tih tlemte hi a ṭha hlawm hle. Tin, kuthnathawktute thlai thar lei an tum dan pawh a ṭhat hmêl khawp mai. An tum ang leh duh ang diak diakin kal thei lo pawh ni ta se la, a zualzawpui an tihhlawhtlin theih phawt chuan ram tan hmasawnna thui tak kan hmu thei awm e.
Chutiang ni lo a, an tih tura an sawi angte an tih si loh chuan anmahni thlang tlingtu mipuite bawk hian kâr lovah kan thlak leh mai dawn a ni tih inhre bawk se la.
Sorkar hnathawk hlawh leh inrelbawlna (Revenue Expenditure) atana budget-a pawisa awm dan (72%) vel te, hmasawnna hnathawhna tur (Capital Expenditure -28%) lam te ngaihtuahpui chuan, an insawi ang hian an ri rum rum thei kherin a rinawm lo va.
Central pawisa ring kan nih dan te, thawhchhuah mumal nei lo, state pachhe tak, kan budget pumpui aṭanga kan thawhchhuah zat pawh 11% vêl lek a nih dan te chhûtpui ila. Sum harsatnate hre reng chungin mipuiin ṭha taka kan ṭawiawm phawt hi kan tih tur hmasa a ni awm e.
A pawimawh pakhatah chuan ram leh mipuite rawngbawl duh nia insawi politician tam tak thil tum hi chu, 'Minister/MLA ni-a mipui rawngbawl'tak tak lam aiin, 'Minister/MLA nih ve hrim hrim' hi a ni tawp mai hian a lang ṭhin. Inthlana kan tlin tawh ber chuan kan thil tum chu kan hlen chhuak nia ngai a, hlawhtling inti taka bawp phût chunga faifûk hlerh hlerh-ah kan tawp vaih chuan, sorkar thar hian buan a chak dawn lo hle a. Chutiang ni lo vin, hnathawh kawr há an ni tih inhriatna nen thlan tui luang khawpin ram rawng han bâwl se la. Anmahni pawh an tlo zui ngei ang.
- Zobiakvela (Masena)