Ngaihtuahna tithui - ZPM Hrangturzo W Block Vice President bâng ta Pu Chawia kha!

“Mamawh chu nei lo thei kan ni lo, contract lamah ka rilru a kal lo, ka it ngai lo,”

"Thim hlimah khan social media-ah ZPM aṭanga a bânna thu tawi tê ka hmu a, a ziah dan ngai ngaiin, “Hrangturzo mipuite hnena hriattirna. Kan ram inthlanpui result puan a lo ni ta a, Pathian hruainain ZPM-in hnehna changin seat 27 lai kan chang thei a, a va lawmawm em. Hetiang te kan din hmun a lo nih takah chuan ka thla a muang ta hle mai a, politics hi chawlhsan ka tum ta a, tun aṭang hian ZPM party chu ka chuahsan ta tih mipuiten min lo hriatsak ve dawn nia. Lalchawiliana kawlni, Hmunzawl,” tih a ni.

He thu hian min barakhaih a, a dangdai a, mak pawh ka ti riau! Ama ká ngei aṭanga hriat ka tum a. Ṭum hnih biak ka tum a, ka beidawng a. ZPM Hrangturzo East Block President Pu Taia, N Vanlaiphai ka be leh a, ani puihna zarah Pu Chawia nen chuan kan inbe ta a, ka lawm hle.

ZPM aṭanga a bân chhan a sawifiah zau loh avângin chu tak chu hriat ka duh a, ka zâwt a, min chhanna hi a dangdai a ni a, “Tunhma aṭanga ka tum dan a ni, Unit leh Block hruaitute phei chuan an hriatna a rei tawh a, an tan thu thar a ni hran lo. Ka rilru dik takah chuan, ZPM a sorkar chuan kan kut hnathawhte, kan thlai tharte man man zawk leh rate hresaa min leisak theih chuan engmah beisei tur dang a awm tawh lo, hei hi kan innghahna tur a ni tih hi ka rilruah a lian ber a. Kalphung thar, mipui sorkar pawh hi an tih theih ngei ka ring a. Ka ngaih a ṭha a, ka thla a muang a, Pu Lalduhoma sorkarna hnuaiah chuan an tih ngei pawh ka ring a. An ti lo a nih chuan engah mah ka ngai dawn lo,” a ti.

Kum 62 chauha upa Pu Lalchawiliana Kawlni hian ZPM hotute chungah rinna a nghah dan sawi lehin, “An ti ngei turah ka ngaih avângin rinna ka nghat lian a, party-ah hian inhnamhnawih ngaiin ka hre ta lo a, thlamuang takin ka chawlhsan ta a ni,” a ti.

Pu Lalchawiliana hian kum 1998-ah Hmunzawlah MNF ‘N’/ZNP Unit a din thu a sawi a, kut hna thawka eizawng a ni. Hrangturzo W Block a Vice President thlan a ni a, ZPM sorkar hnuaiah hnate chhuak se, chungte chu a mamawh ve lo em ni tia ka zawhna chu, “Mamawhte chu kan nei ve vek a, hetiang lam hi chu ka rilru hian a ít lo. Pathianin ni tin ei khawp chaw min pe a, kan intuam lumna tur min pe ve zel a, Pathianah innghat tlatin, rualawt hauh loin, In chhe têah kan awm a, ei leh barah hian chhung khat leh ṭhenawm khawveng tihbuai hi ka hreh a, ka dilna hi Pathianin min ṭanpui ṭhin a, kan nung ve ṭawk ṭawk a ni e,” a ti.

Dec ni 11, 2023 (Thawhṭanni) ah Hrangturzo ZPM Joint Block Committee an nei dawn a, a chawlhna hi thehluh a tumsa tho tih sawiin, “Ka rilruah a lian deuh a, ka whatsapp ta ringawt a lawm le,” tiin nui hak hakin a sawi. An party hotute hian lo pawmsak lo ta se tih chu, 'Ka rilrua ka tum tawh laklawh a ni a, hei hi chu min lo hrethiam mai teh u,' ka tih ka ring," a ti zui bawk. Mizoram Politics leh Pu Chawia rilru hian ngaihtuahna a tizau thui hlein ka hria!

- Lalnunṭawma Fanai