Thlasik Thlifim–II

Nipuia kan ài peih loh leh a sat êm vanga kan phunsan fo ṭhin kha, thlasik thlifim a lo thawt meuh chuan sîkni eng hlutna kan ngaihhlu thar leh a, a hlutna kan hloh phal loh hun lai a lo ni thar a, a eng kan ai a, a eng kan àm hun lai a lo ni thar leh ta.

A ni, chu hun chu rilru riang lo, rilru thawveng leh rilru ipikna tam zawk kian hun a ni. Mahse ka rilru leh thinlung chu a pikin a chhah mup a. Kei ang thova zoram dung leh vanga thlasik thlifimin a chhem mipuite chu engtin awm ve ang maw(?) tiin suangtuahna chu a kal dingin a kal chhuk chho vû vû a. A chhanna lah ka dawng hleithei si lo. Kei erawh Zoram thlasik zeldinin rilru mu leh mal pawh pu loin, khumah te, chair-ah te, kitchen-ah te chuan ka mawng ka hung sawn sek a.

Kan mi hmasate'n thlasik hunpui puala an thu leh hla keuh thlûkte pawn mi rawn zem bawk. Mahse chutiang thu leh hla pawh chuan ka rilru rianna leh manganna chu a hnemin a dum zo bawk si lo. Lungthlu lo tak chunga 'Thlirtu' nih bak tih theih a tlem hle.

Sana chek ri ang zelin ngaihtuahna pawh a vak thui zel a; mahni lunglen thu theihtawp leh thiampatawpa puang thiam lo nih chu, eng ang mi nge maw ka nih le? Mahni lunglen thu awlsam te, a nih ang anga han puan chhuah pawh thiam loh chu, mi tlaktlai lo leh tlawk tlaw tak zawng ka va ni em.

Thu belh tlak lo, thu nung lo, thu puarpawleng mai mai buaipuia patling ka han awm chu a tlawmthlak ka ti em em a. Pàwltu leh zemtu tawk inti sia thu benglut lo ka bùan fan hi–thlasik thlifim chuan chhungrilah min tlâwm tih ka man thiam ta!

Zingkhua a lo var ta a. Zing ní chhuah ruala chu thlifim a lo thawt phei chuan ka tlawm nasa zual ting a. Dai tla leh daifim mai pawh hian Siamtu remruat ropui zia min hmuh fiahtir zel vangin, kei Siamtu duan engmah ni lo chu ka tlawm nawn awn awn a. Lei hausakna chhuan tur nei lo ka ke baipui riangvai tam takte nen tual khatah chengin, he hunpuiah hian Krista lam aiin khawvel thilah kan tlâwm nasa zawk dawn tihte pawh ka man thiam chho leh ta.

Nun awhawm nei ngai lo tur, dam kum a tam zawh poh leh damchhung hrehawm tam turte, neih leh neih loh pawh sawi lova mahni phak ang tawka mawi tum te, lalna leh thuneihna chanvo chang ngai lo tur pachhiate, lungkham leh manganna khawvela cheng kan nih hrethiam te leh, Bible thu "a tuk atan lungkham suh u..." tih pawh zawm hlei thei lo khawpa a tuk lungkham reng renga damkhaw chhuah tuma beite nen pawh, kan tlawmza leh dawn tih ka chiang thar leh ta.

Mahse, lawmna thuruk erawh kan nei. Thlasik thlifimin kum sang tam kaltaa ran chaw pekna thlenga chu thlifim a tlehpui ṭum a, tlâwmna nun a tlehpui ang khan, keini mi sual leh sual kawng zawh mekte tan chu thlifim chu a rawn tlèhpui leh dâwn tih a chiang reng mai.

Chawl loin lo tlèh zel se la. Rilru mawi leh thianghlim pu a, tlawmna nun kan chan theihna'n, nang pawh a changtu zinga i tel theihna'n – chu thlifim chu lo tlèh zel rawh se.

I thàwm a nat a, i thàwm ri a rin lutuk chang te, mangang leh thlabara i awm changte hian chu thlifim chu lo dawng ve la. Vawilehkhatah thil zawng zawng fel duakin kám duak lo mah se, thil ṭhenkhat hi chu a chhem bo tial tial ang a. Hringnun i chhiar thiam telh telh ngei ang.

A chhan chu; nang leh kei hi vaivuta siam kan ni a. Vaivuta kir leh mai tur kan ni. Kan kir hmain nun tak leh rilru tak kan neih theihna'n thlifim hmanga kan sual thawi damte, chu thlasik thlifim hmanga kan sual chhêm kian tîm reng reng lo tu hi a awm – chu chu, chu mawlh chu a ni ropui chu!

Zoram dung leh vanga mi te hian chu thlasik thlifim mawlh chu inchhemtiri'n han fimpui thei ṭheuh ila aw... tih duhsam chung chuan ka zâl riai riai ta a.

- Lalsiamkima Sàmte