Politician ṭha lote vanneihna ram
Mipui tena hunbi tuka kan aiawha rorel tur kan thlanna ram, hna an thawh ṭhat loh vanga midang kan thlan lehna ṭhin ram hi mipui rorelna (democracy) ti pawhin a sawi theih awm e.
Delhli sawrkara party nau-pang takin party lian pahnih BJP leh Congress lehthala chiang taka AAP-in sawrkar a siam theih chhan khu mipuiten sawrkarna siam tawh party pahnih rorel dan an chik aṭanga rorel leh tura an duh tawh loh vang a ni. Delhli mipui tena an ram tana ṭha tur nia an hriat vanga party naupang tak pawh an sawrkar tir theih chuan BJP leh Cong-ress chuan inthlan leh pekah chuan candidate leh ram kaih-hruai an tum dan (policy) pawh an fimkhurin an uluk tawh khawp ang.
Mizoramah ve thung chuan kan vote tura te kha ram tana hnathawk ṭha tur a ni ang em? tih lama teh ta loin kan party an nih leh nih loh lam kha mi tam tak tena kan vote leh vote loh tehna a la nih tlat avangin mi state hnungah kawl ek kan la thai tluang hrih zel a ni. Electric power kan mamawh khawp pawh min la pe thei lotute tho kan la thlan tlat ṭhin avangin tun thlengin electric power kan la intodelh a. Kawngpui ṭha pawh min pe thei lo.
Kan rama politician-te hian hna an thawh ṭhat leh thawh ṭhat loh a zira tling leh tla ṭhin an ni lo tih an inchian em avangin an ngaih a ngam a, an thla a muang a. Kan kristianna te, harhna kan chan zozai pawh hian an laka kan rilru puthmang hi a thlak dawn lo tih an inchian em vang pawh a ni ang, ram tana hnathawh chhenfakawm em em thawh nei lem lo chung leh neih tum em em lo pawha term thum sawrkarna siam theih an inrin thu an sawi rik ngam hi!
Mizoram tana hmasawnna ruhrel lian thawhna hun tam tak neia thawh em em nei chuang lo chunga rorel leh tura rin berte pawh hian sawrkarna an siam huna an thawh tur lam aia an tlin theihna dan tur lam ringawt buaipuia sum sem an han sawirite hian Mizo mipui tam takte rillru puthmang a tilang ngawt mai!
India ram state dangte ngaihtuaha mihring la tlem na tak, hnam kaihhruai nuam, a mi tam zawkte kristian, kohhran mumal taka awmna nei deuh vek, tlawmngai pawl leh pawl hrang hrang tam tak awmna leh harhna thlen ṭhinna Mizorama chengte hian dikna, rinawmna leh taihmakna hi kan Pathian thu nen pawh thuk taka a inzawm tih kan hriat fiah a, keimahniah ṭheuh kan seng luh huna kan aiawha rorel tur kan thlan hunah pawh kan party an nih leh nih lohah teh tawh loin dikna a ngaina em? a rinawm em? a taima em? tih hmangin kan teh tawh ang.
Chutih hunah chuan kan political party hruaitute pawhin mipui duhzawng MLA, minis-ter leh chief minister tur chauh an theh chhuak tawh ang a, politician ṭha lote vanneihna pawh tihtawp a ni tawh ang.
- V.Lalchhanhima, Chhiahtlang