MIZOTE LEH KRISMAS HMASA

Kristiantena kan hunpui ber Krismas chu kan hma lawkah hian kan lo thleng leh dawn ta reng mai.Tun ṭum ah hian Mizoten a Krismas kan lo hman ṭan dan ṭhenkhat ka rawn ziak leh a, thuziah dik loh lai ka lo nei a nih chuan chhiartute hnenah in mi ngaihdamna ka rawn dil hmasa a ni.

Mizoten a Krismas kan lo hman ṭan dan hi ṭhangthar mai bakah nu leh pa tam zawk teah hian hre lo tam tak an awm tawh awm e.

Krismas tih hi a awmzia tak chu kan Lal Isua lo pian ni tihna niin, chanchin zir mite chuan Disembar ni sawm hnih panga hi Isua pian ni niin an sawi a ni. Hemi ni hi Kristiante chuan kan ngai hluin kan ngai pawimawh em em a, kum tinin Kristian te chuan awmni khamin hemi ni kan lawm ziah ṭhin a ni. Mizorama sawrkar kan neih hi Kristian sawrkar a nih avangin he Krismas ni lawm hian sawrkar hnathawk zawng zawngten Krismas hun hlim awm takte hmangin ruaite kan ṭheh a, Mizorama sawrkar hnathawk Kristian ni ve lote pawhin he Krismas ni hi chawlh hahdam nan an hmang a ni.

Ni 25.12.1904 khan Mizoramah hian Krismas hman ṭan niin Mizorama zosap rawn thleng hmasa zinga pahnih te chuan, an nupui ve vete hruaiin ni 23.12.1904 khan Aizawlah pheiin vawk pathum leh thil dang te leiin, Disembar ni 27-ah Krismas lawmna ruai te ṭhehin, Pathian biak inkhawmnate neiin Zosap te chuan Mizorama an rawn kal hmasak thu te sawiin, an chanchin sawina leh lawmthu sawinate neiin a hnu lawkah bawrhsap inah chhunah Sapho hnen aṭangin Pathian thusawina ngaihthlakna hun te hmangin, Pathian biak inkhawmna an hmang leh a, hemi ṭum hian sap hmeichhia 6 leh sap mipa 9 bakah Mizo 11, khasi 7 leh Bengali 3 an tel a ni awm e. Zosap zinga pakhat chuan Isua a lo pian tirh ata a thih thleng chungchang thu sawina a hmang nghal a ni.

Hemi ni zan hian sapho chuan bawrhsap inah Pathian biak inkhawmna hun hmang leh a, Pathian biak inkhawmna hmun an neihna chhungah chuan Far kung te phunin a zar tinah chuan khawnvar te an khai thluah a. Chumi bulah chuan sap 15 te zaiin an zai ngaihthlak a nawm em avang leh an zai thiam em avangin, babu Office-a mite pawh rawn kalkhawmin an zai chu mawi an ti hle a ni awm e. Tin Bawrhsap chuan a chaw ei dawhkanah khasi ho chu thingpui te inpuiin, dar sava ennawmte siamin dar zaiin an chaih a, hmuhnawm an ti hle a ni.

Zosap te hian hmun hrang hrangah hun an hman zawh hnu hian ni 2.1.1905 ah Aizawla Krismas hmanga chám; sapho chu hawin kum 1905 aṭangin Zosapthara hovin kan Mizo mi hmasaten Krismas an lo hman chhunzawm tih chu thu ṭhenkhat kan hriat theih dan chu a ni e.

- George L.Ralte

Member

Mizo Academy of Letters