KALPHUNG THAR, MIPUI SORKAR DEKHEGA!!!

Kum 2018 MLA inthlanpui kan hmachhawn aṭanga boruak nei ru tawh, khatih laia a mihring (candidate) lam ngaihtuah hauh lova bial ṭhenkhata Vote hmu ṭha em em Zoram Peoples Movement (Independent Candidate) te chuan kum 2018 MLA inthlanah Vote an hmuh ṭhat avangin an Party Registered pawmsak an ni a. Pawl hrang hrang intelkhawmte chuan kum 2023 a lo her chhuah meuh chuan ZPM Party anga Candidate an ni ta a. An inbeiseina aia sânga chakin Mizoramah sorkar thar an siam ta! Ka lawmpuiin duhsakna sâng ber ka hlan e.

Mipui mimir thinlungah MNF hruaitu ngai kaihhruai ninna leh Congress hruaitu thar kaihhruai la rin tawk lohna (mipui vote-ah a lang vek) nasa tak avangin chiang fahranin Mizoram mipuiten ZPM an thlang tling a. MNF leh Congress insawrkar chhawk nin tawhna thli (wave) avangin leh hmasawnna thar a thlen ngei beiseiin mipuiin VOTE an thlak ta niin a lang.

Pu Lalduhoma, Chief Minister (fr. 8.12.2023) chuan ZPM sorkar aṭanga ni 100 chhunga an tih tur ruahmanna a puante kha a va ṭha hlawm tak êm! Ti hlawhtling ngei se a duhawm hle a ni. Mizoram mipuite hian ram tana an thil tih tum daltu ni lo va, vaiho Politics ṭhing lutuk ang chhawma inchirhtheh chiam chiam a, buan hmaa kherh an tih ang deuha hna an thawh tak tak hmaa eng emaw hlek sawisel chînte hi sim daih ang u.

Social Media kan hman dan pawh hian Kalphung Tharah chuan awmzia nei chho se a duhawm hle a. Mipuite hi kan rilru ngaihtuahna tihmasawna siam ṭha (Moral Reform) zel turin inbuatsaih ang u. Party ni ve tho, ZPM pawh âtchilh kher lo bawk ila, chuti lo zawng an hnawl hnu Lal Isua iangin Party experience lo nei tawh zawkte kha kan ngai leh chung ang tih a hlauhawm a, ngaih lêt vawng vawng pawh an ṭul hial thei bawk a. ZPM sorkar hi kan thlir ang a, an tih ṭhat kan fak ang a, an kal sual venpui turin "Kalphung Thar, Mipui Sorkar" Dekhega!!!

Mihring (candidate) thlir râna inthlang chu ni ngat ila, ZPM MLA ni ta zingah hian tling lo tur an awm ve nawk a. Ṭhenkhat hi chu tlinpui kum vanneihpui ve tak tak an ni a. Tin, MNF MLA ṭha tak tak ṭhenkhat an tla phuk phuk maite kha an uiawm hlein a hriat. Congress erawh Opposition MLA 5 aṭangin pakhat chauh neiin an tla duai duai bawk a. Mahse, Party Senior leh Experience nei MNF leh Congress tan insiam ṭha chunga tho leh tur chuan, tluk bawksawp hmasak a ngai tih an hriat thar lehna ṭha tak a ni âwm e. Chapona tlâng ata inphahhniam tharte pawh an mamawh viauin a lang.

ZPM-in sorkarna a chan tâk avanga ka rilrua rawn lang dawt dawt thil pakhat lian deuh a awm a. Ka bengah hian darbenthek ri thum mi ang te, darbenthek ri fiak mi angte'n ring takin a ri nawn tluk tluk lehnghal a ni. Aizawl District Volleyball Association chuan April 29, 2023, Season Ending Tournament 2022-2023 Final, Luangmual Branch YMA Hall-a an neih ṭumin Khuallian atan Pu Lalduhoma, Chief Minister zahawm tak ni ta hi an sawm a. ADVA te'n Mizoram Volleyball Association min sawm tel angin kei leh kan thawhpui pakhatin MVA ai kan awh bawk. Chuta a thusawi chu a ni Volleyball tuimi, hruaitu, Club neitu leh Player-te tana RIMAWI ROPUI BER chu!

Pu Lalduhoma chuan, "Mizoram Volleyball pual liau liaua Volleyball khelhna tur Indoor (National Standard Size) in la nei lo hi pawi ka ti hle a. January 7, 2021 khan Republic Veng, Pitarte tlangah Indoor Stadium sakna tur hi Pu Tawnluia, Deputy CM leh Pu Robert Romawia Royte, Sports Minister hovin lung in phum a, mahse tun thlenga a hlawhtlinna in hmu lo hi pawi ka tiin nâ ka ti takzet a ni. ZPM kan sorkar a nih chuan Mizoram Volleyball hruaitu, club, players leh a tuimite hman ṭangkai turin Volleyball Indoor changtlung tak (National Standard Size) hi tihpuitlin ngei kan tum ang," a ti a. Volleyball tuimi kalkhawmte'n ring leh uar takin kut kan beng dur dur a ni.

Mizoram hmun hrang hrangah Volleyball tuimi leh a khel ṭhin an ṭhahnem em em a. Thingtlangah pawh feh haw paha khelh mai theih a nih avangin Iptepui an nghat rawp a, an khel mai ṭhin a, game awlsam leh nuam tak a ni bawk. Kan Chief Minister zahawm tak ni ta thusawi kha Mizoram Volleyball tuimi te tan a hlawhtlinna a taka hmuh ngei beiseiin, Tlumtea thlir takin kan lo thlir reng dawn a. Mizo infiammi, Volleyball kheltute tihnualtu ni lo va, tiphur a, tihmasawntu an nih ngei theih nan duhsakna sâng ber hlan chungin kan ring kan lo fân ve iâk iâk e.

- David Zochhuanmawia

(Vida Hrahsel Saza)