Zirna siamṭha ang

December 8, Zirtawpni Vanglaini chhuak kha ka lo chhiar a, chutah chuan fakna (advertisement) chhuah lohin kum 2018-19 hnu lamah zirtirtu mi 1135 lak thu a inziak, hei hi mak tak a ni! Chhiar thuakin a mak thuak a, chhiar nawn lehin a mak nawn a, chhiar uluk chuan a mak uluk a ni ber mai!

Ram changkangah chuan zirna an ngaipawimawh a, engkim bul ṭanna, a kailawn pawimawh a nihzia an hrechiang. Mihring hi naupang kan nih laia kaihhruai theih tak kan ni a, chutiang tura siam pawh chu kan ni. Puitling nih hnuah erawh ngaihdan leh pawm dan, nunphung inthlaksak a harsa hle.

Chuvangin naupan lai hun hi a pawimawh a, chumi avang chuan zirna in, a bikin a hniam lam a pawimawh zual emaw ni tih mai tur a ni. Chutianga pawimawh tak ni se, eng vanga zirtirtu hna lak chu uluk lo a, kalpah mai mai nge maw an nih le tih hi ka ngaihtuah chhuak thiam lo a, mak tiin hun la hmang reng mai zawng a nih hi.

Ngaihtuah chiang mah teh u, kum 2018 aṭanga kum 2024 inkarah khan zirtirtu mi 2272 lak an ni a, chung zinga mi 1135 chu advertisement chhuah loa lak an ni, a awmzia tawi tea a sawi dawn chuan, mahni duhsak zawng thun nan an hmang a, midang leh a thiam ve tam takin hna dil ve lo se, mi tlemte chauhin hnaruak hria se, tihna nen a inang–a dawng tur hresaa Tender chhuah nen a danglam tam lo bawk ang.

Hna hi advertisement chhuaha lak tur a ni a, a chhan chu fakna a chhuah chuan hnaruak hretu an tam ang a, hna dil an tamin a thiam leh a ṭha ber berte an tling thei dawn tihna a ni a, fakna a chhuak lo a nih erawh chuan hetiang hi a theih dawn loh a, a letling thawkin thil a kal dawn tihna a ni – naupang nun leh thiamna siamṭhatna tur bulpui bera thawktu kan lak dan hi a fuh mawlh lo a ni.

Sawrkar thar a piang a, anni chuan Kalphung Thar–Mipui Sawrkar min tiam, an intiam ang ngeiin thleng se tih hi Mizo mipuite beiseina a ni. A hmasa ber atan chuan zirna hi min siamṭhatsak lul teh se tih hi ka ngen tak meuh meuh.

Mizoram thlir ila, high school chinah chuan sawrkar school a luh kan hreh lo a ni satliah lo a, kan inchuh emaw ni tih zawk mai tur a ni. Higher Secondary leh College chinah ngat phei chuan sawrkar hnuaia awm kan thlahlelin kan duh em em vek.

Kan ṭhianpa pakhat chuan 'ti hian a ti a, "Fa pathum kan nei a, pakhat tan thla khatah school free Rs 2500 zel ka chawi a, pathum chu an hautak ve khawp mai. An fee bakah senso tur tam tak a la awm bawk, sawrkar school hi luhna tlakin ṭha se la chuan heng kan pawisa sen hi kan seng lo thei dawn a, khawsak a awlsam phah ngei ka beisei," a ti.

A thusawi hian ngaihtuah a ti thui a, chik taka ngaihtuah chuan a dik ka ti hle bawk. Mizoram sum leh pai dinhmun hi thawk leh khatah kan siamṭha thut dawn lo a, zawimuanga siamṭhat ngai tur niin a lang. Chutiangah tak chuan kan hmanralna ṭhin ṭhenkhat kan tih tlem a ngai.

Sawrkar school-ah zirtirtu hlawh tam tak tak an awmsa vek a, anni hian an school chu an fate luhna tlakin siam thei se la, tichuan mipuiin kan chhawr mai dawn a ni. Sawrkar tan a hrana sum hman leh sen tur a tam dawn lo, awlsam leh harsa vak loa sum khawl theihna leh senso tih tlem theihna hnai, kan khawtlang nun siamṭhat nghal theihna ni bawk si a ni ang.

- Sanga, Aizawl