SAKHUANA VANGA SUM LEH THAHRUI SENRAL HI!

Sakhuana kan tih hian Kohhran kha kan rilruah lang tel se la. Tun hma Mizo nunhluiah Bawlpu leh Sadawt hun lai pawhin he Sakhuana avang hian sum leh thahrui sen ral a ni tawh ṭhin. Mahse, tunlai Mizoram ang em em a, Sakhuana vanga sum leh thahrui kan sen ral hi a awm lo vang tih ngam a ni.

MAHNI HNA AIIN SAKHUANAAH:

Sakhuana lama inhmang ṭhalai tam tak chu intodelh hleithei lovin, hlawh tlem téa thawkin an awm ta fur mai. Mahni kea ding turin thawhrim a ngai si a, thawkrim tura an hun tam zawk lah Sakhuanain a eiral mek si. Inkhawm chu darkar khat lek tih ni mah se, inkhawm tura in lama haw vang vang ngai te, hun bakah petrol leh tha senralte chhût tel a ngai. Tin, Ṭhalai pawla inhmang active tak tan phei chuan zan awl hi a tam lo thei khawp mai an ti. Chuvang chu a ni mahna, Ṭhalai meng rei chhungkaw tana chhawrna tur tlem tak si, zing tho hma ngai reng reng lo hi kan kawl ta ṭun a ni ang. Zing hun ṭhaah kan mu bo daih hlawm a nih hi maw!

Tun hma deuha hna latu ṭhenkhatin, "Kan hnuaia thawk tur chuan Kohhran Ṭhalai lama inhmang kan duh lo," tih an sawi lan khan, Sakhaw mi ṭhenkhat chuan an haw viau a. Mahse, tun hnaia sumdawng lian hian chu chu an pawm deuh vek tawh ang. Thawkrim tur chuan hun a ngai si. Sakhuana lama inhmang thawkrim duhte pawhin, "Active hman ka ni lo," "Ka inkhawm ṭha hman lo," etc, an ti zel tawh mai a ni. Chu chu eng dang vang a ni lo va, intodelh a, mi dang ring reng lova nun an duh ve a ni. A ni reng lah tak a, private firm lama inhlawh tan chuan Ṭhalai activity lama inlan ve reng khan mahni hna a chhiat phah ta ṭhin a ni ang. Mahni hnaa kal si, haw hma deuh te, lengchhuak lawk te, chawlh la reng te, hriatthiam ngai bik rengte hi Sawrkar hnathawkah pawh an tam. Office hour chhung ngei pawha dawr hleihtheih loh an tam a ni. Sakhuana vang ni vek mah suh se, tam tak hi chu Sakhuanain a nghawng tih theih a ni ang. Mahni hna thawk ṭha si lo, Khawtlang/Sakhua lama kan hna chu ṭha takin kan hlen leh lawi si. Sakhuana hi inphèn mawi nan kan hmang mai chauh a tih theih ang a, hna tak tak kan thawk lo a tih theih bawk ang.

SAKHUANA VANGA SUM SENRAL A TAM:

Sakhuana vanga kan sum senral hi chik taka zir tan chuan a ṭhahnem hle a ni. Pathian ram thawhlawm ip leh thawhlawm dang aṭanga sum lut hi thla tin an puang a, Kohhran chanchinbuah te an chhuah ziah ṭhin. Chutah chuan Ramthar pual hi sawi ta bik ila. Pathian ram ipah hian Ramthar pual column a awm a, tin, Missionary chawmna ip hran siam a ni bawk. Work camp hi Ramthar field lamah kan nei kum tin a, Synod lam chuan Work camp project list siamin sum thawh tur an rawn ti thar zui. Ramthar field ṭhenkhatten, 'Inkhawmpui kan dawng dawn si a,' etc, tiin Kohhranah thil an rawn zawrhtir thlazen bawk si. Kohhran ṭhenkhat chu Ramthar field bik nei kan awm nual a, Para church kan la nei ṭeuh zui. Mizoram pawnah hian Sakhuana vangin kan sum a chhuak hum hum mek a ni. Chutih laiin Ramthar field ṭhenkhatah chuan Mizoram aia ṭha ṭha sikul/craft centre/Tuition centre etc an nei daih zawk nia. Ramthar field ṭhenkhat lah kan luhna rei tawh tak, kum 10-30 chuang hnuah pawh Kohhran ngelnghet din thei si lo chungin sum kan seng ral kum tin ṭhin. Kan chhuahsan ngam chiah si lo. Sum chuangliam kan seng reng a ni.

Synod inkhawmpui hian sum renchem an sawi ṭhin na chu, a ren lo ber ber an ni lawi a. Inkhawmpui tènaute nen inkhawmpui awm zawng zawng chhui lèt ringawt pawh hian hei hi sawi ngam a ni ang. Pastor Retreat lam sum an senral zat leh Lay Workers retreat an sum senral inthlauh dan chu a chhui peih tan dah ta zawk ila.

Sakhuana vang hian ṭul lo takin sum kan seng ral ṭeuh tih ngam a ni. Thawhlawm thawh ṭhintute lah mi rethei té tè an ni nawk bawk si. Chhungkuaa Kohhrana inhmang tan phei chuan thla tin Kohhrana sum thehluh hi ṭhahnem tham tak a ni. Pathian ram/Missionary chawmna/ Faith promise (KṬP/Pavalai/Kohhran hmeichhia,etc)/Kohhran hmeichhe thla thar thawhlawm/charity pual leh a dang dangte hi thla tin a chhuak a. Inkhawm Thawhlawmah hian Rs 50 puitlingin thawh ṭhin ta se, chhungkaw member 5 chuan thla khatah Rs 2000 chuang a ni daih ang. Kṭp/Pavalai/Kohhran hmeichhia inkhawm bil thawhlawm a la tel lo zui.

TLIPNA: Sakhuana vang hian sum leh thahrui ṭhahnem tak alo thlawnin a luang ral nasa hle a ni kan tih hian Sakhuana nuai bo emaw, inhnuh hniam lam sawi hi ka duh ber a ni lo va, siam ṭhat ngai thil awm anga sawi theihho hi ennawn atan a duhawm hle zawk a, siam rem theih a awm nual bawk ang.

Hna thawk ve viau anga lang chung si hian kan intodelh hlei thei lo va. Ṭhalai pawla hruaitu lu chin tan phei chuan hna dang thawk miah lo pawh ni se, inkhawm hrang hrang baka an pawla tihtur hrang hrang kha Pastor hna aiin a hautak fe zawk ang em aw? tih theih a ni. Hunpui dawn hnaih phei chuan zan tin hla zir leh drama zir enpui an ngai a. Mahni in luma fate kuah hman lo an awm nawk a, fate kilkawi hman mang lovin an awm fo bawk a ni. Chuvang chuan Sakhuana vanga kan sum leh tharui luang ral hi ennawn a hun viau chuan a lang.

- Kima Mivam