Hlawh lak dan hi enfiah a ṭha

Mizoram sorkar pachhe tak hnuaiah Sorkar hnathawkte pawhin a kuma kum hlawh lak hun mumal lo takin hlawh an la a, a changin thla chanveah te, a changin thla tawpah te an la a nih kha.

Sorkar hnathawk hlawh lak hi kan Chief Minister kalchhuak ta khan, "Thla thar nikhat leh ni 15 a lak nen a inang reng," a ti zauh khan sorkar hnathawkte Beng a tithlep hle a ni tih; vote kan han thlak khan a chiang ta a ni.

Sorkar hnathawk hi mipuite tana thawk, mipuite rawih an ni tak meuh mai. Chutih laiin hlawh neia chhawr an nih miau avangin an hlawh hi a hun taka hmu tur chu an ni. Pu Zoramthanga sorkarah khan board neuh neuh an siam hnem em em e, sorkar sum kal ralna a tam em avangin a rawih hnathawktute pawhin a hunah hlawh an la thei ngai lo tih a chiang reng a ni.

Sorkar hian hmasawnna hna engpawh thawk se, a hnathawk hlawh chu a pe tur a ni. A pe tur a ni mai lo a, a hun takah a pe tur a ni. Miin an hlawh lak veleh thla thar tirhah emaw, ni bituk neiin loan an lak te, an leiba hrim hrim te, mi in luah an nih pawhin thla tira pe tur an nih vangin thla thar tirah an thawh hlawh chu an la ngei tur a ni ringawt.

ZPM an han sorkar a, sorkar sum awmdan an han zir thuai a, sorkar hnathawk hlawh tur chu a lo awm nameuh mai. Thutiam an chham tuk lawkah hlawh an pechhuak thei nghal pang mai a, a lawmawm ngawt mai. Hetiang hian thla thar ni 2/3 ral hma ngei hian sorkar hnathawkten hlawh an lak ngei theih zel beisei phawt teh ang.

Sorkar hnathawk hlawh hian nghawng tam tak a nei a, an hnuaiah mi inhlawhna te, sumdawng hrang hrang leh dawr neitute mai bakah, a mimir zawng zawng hi sorkar hnathawk hlawhah kan innghat a ni.

Chuvangin, kan sorkar thar pawh hian hmasawnna liantham ni lem loa sum a sen vak vak ṭhin hi ennawn ṭha se, a hun takah hlawh an lak zel theih nan hma han la zel teh se.

- Lalkhirhvela