RAN CHAW PEKNA THLENG

Lal Immanuela chuan a mite rawn lam turin a rawn intitlawm a, bawih angah a insiam a, mihringte suangtuahna aia thukin a rawn intitlawm ta a. Amah chuan hmel mawina reng reng a nei ta lo a. Bethlehem dai rehah, ran chaw pekna thlengah a rawn mu a ni.

Tun hma khan Biak In ropui takah te, In ropui takah te, khum nuam takah te Amah chu hmuh tumin ka lo au ṭhin a. Mahse, ka Lalpa chu a awmna a hniam em avangin mi rawn ban phak ta lo a. Ka awmna aṭang chuan ka chhuk thla a, ka chhuk zel a, nakinah chuan ran chaw pekna thlenga mu, ka Lal; ka tana lo kal chu ka va hmu ta a.

Ran chaw pekna thleng, bawlhhlawh tak leh rimchhe tinreng, natna hrikte awmna hmunah ka Lal lo mu chuan bawlhhlawh tinreng a lo kai a. Keimah chu ka han inen a, ka fai si a, chutih lai chuan ka thinlungah mi fai leh fel takte lam tura lo kal ni loin, mi bawlhlhawh leh misualte lam tur zawka lo kal a ni tih ka hre chhuak ta a. Thianghlim famkim, keimah avanga bawlhhlawh kai bulah chuan ka zuk mu ve ta a, ka taksa a lo bawlhhlawh zo ta a. Chu veleh Ani chuan hmangaih takin min lo kuangkuah a, ka taksaa bawlhhlawh kaite chu min thenfaisak a, Amahah chuan a inbel ta a, keimah chu Amah avangin ka lo fai ta a. Amah chuan tisa sual ang pu chungin ka tisaa sualna awm chu thiam loh a rawn chantir ta a ni.

Tun hma khan Lalpa zarah ka khawsak nawm tehlul nen, chuta ṭang chuan aia ṭha zawk leh sang zawk beiseiin ka lo dil ṭhin a, a chang chuan ka suangtuahnate chu tihpuitlin ka tum a, nasa takin ka bei ṭhin a, chu chuan rilru chiaina te, taksaah natnate a rawn thlen ṭhin. Heng hringnun ram te hian hahchawlhna reng a nei lo.

Tun aṭang chuan ran chaw pekna thleng ṭawp takah chuan ka Lal; ka tana lo kal mutna bulah ni tin zan tin ka mu ve ta a. Ka tisa hahna leh ka rilru hahna zawng zawngte chu Ani'n min lo chhawk ta a ni.

- H. Neihchungnunga Durtlang North