SAWRKAR TANA HMAN NGHAL THEIH MIPUI SUM REMCHEN DAN
Sawrkar sum tia kan sawi fo hi a nihna taka chuan mipui sum (public money) a ni a, General Financial Rules leh sawrkar thuchhuakah te pawh public money tia sawi ṭhin a ni. Sawrkar hnathawkte hian mipui sum aṭangin hlawh kan la a, chuvangin mipui sum renchem taka hman leh office bungruate dimdawi taka enkawl hi kan tih makmawh a ni. Sawrkar office bika sum remchen dan tur sawrkar laipuiin a duante bakah a dang tlem azawng kan han thai lang ang e.
Paper chungchang: Sawrkar hi paper hmang ral hnem bertute zinga mi niin, ngaihtuahna seng mang lova paper kan hman ral duak duak hian ṭul lovah mipui sum a kal ral nasat bakah, thing leh mau hmanga siam a nih avangin environment-ah nghawng ṭha lo a neih nasat phah hle. Sawrkarin stationery atana a sum sen zingah hian paper man hi a tam ber bawk ang. Ministry of Finance-in 22.08.2014-a sawrkar office-a paper hman dan chungchanga a thuchhuah hi tlemin sawi zau ila:
1. Paper leh note sheet-ah both side in print vek tur a ni:
Both side-a print hi a har lo. Xerox pawhin both side-in xerox mai tur a ni. Note sheet hi a tira notes put up hmasatu leh comments thui deuh neite tan chuan print hian paper a hek loh bik bakah a felfai a, chhiar a nuam bik bawk. Print-na tur format hi siam lawkin a soft copy inthawn kual mai theih a ni. Note sheet-a theih chin chin print a, paper both side-a hman bawk chuan file a chhah chak lo bik hle. Both side hlira hmang hram hram ṭhinin paper ream 5 a hman laiin ti ve peih lovin ream 10 vel a hmang tihna a nia. Entirnan, paper leina cheng nuai 10 hi nuai 5-6 velah a tla thla thei tihna a ni. Print sualna paper, a lehlam blank hi confidential leh sensitive information a awm a nih loh chuan draft print nan te, CL ziah nan te a la ṭangkai em em.
2. Typing hi single space-in tih tur a ni.
3. Sawrkar policy/OM te a tlem thei ang ber hard copy sem chhuah tur a ni a. Official website ah dah tur a ni:
Hei hi chu a taka kalpui nasat tawh a ni. Chutih rualin office tam takah email kan la hmang ṭangkai tawk lo hlein a hriat a, Internet connection ṭha a ngai ve thung. Central Govt office leh department/organization te hi email-a in-communicate vek tawh an ni a, hna a chak bik em em. Keini state ah hian department pakhatin department dangte paper hmang kherin thuchhuah inpek leh sem chhuah a la tam viauin a hriat a. An lo print leh dawn tho va, paper a hek loh phah lo kan ti mai thei. Mahse, dák runner kal kualna emaw daka thawnna bakah lehkha hmuh har/lehkha kawngbo awm thei ṭhin hi email hmanga pumpelh theih a ni. Phone hmangin 'Email-ah kan lo thawn e' tia inhrilh mai a awlsam zawk em em. Lehkha pawimawh inpek kher ngai chi chu thuhran ni se.
4. Draft put up-ah siam ṭhat a lo awm a nih pawhin chhiar theih a nih chuan office copy atan hman nghal tur a ni: Hei hi kan ramah chuan kan zawm tha viau ang.
5. Forms, reports leh manual hrang hrangte a taka submit ngai tih tlem a, online-a tih tum tur a ni: Hei hi kan state sawrkarin a ti ṭha hle. Report bakah hian form hrang hrang, MR bill form, TA bill form, EL dilna form adt. hi website-ah download theiha dah hian a ṭangkai a. Xerox làwk ṭeuh emaw, man chawia print lawktir vak hi sum sen ralna pakhat a ni. Sawrkarin a tih danglam emaw, a update-in a hlui paih vek a ngaih phah ṭhin. Damlo phaia kalte tan phei chuan download theih hi a ṭangkai em em.
Heng bakah hian, 04.09.2020-a Ministry of Finance thuchhuak chuan lehkhabu leh document dang print nana imported paper hman hi a phal lo bawk a ni.
Printer leh toner cartridge chungchang: Sawrkar office leh sumdawngte pawhin an hman tlanglawn laser printer té deuh ho hian toner cartridge an hmang a. Hman zawh a nih hian a thara thlak lovin vawi eng emaw zat refill theih a ni. A thar man hi 3000 vel ni ta se, refill-na man hi 400 vel a ni. Aizawlah refill thiam tak tak an awm. Sumdawn nana hmangte pawhin refill hi an tihdan a ni a, a print quality a chhe chuang lo tihna a ni. Printer lian leh sensitive deuh, original cartridge kher hman ngaihna chu a awm ang.
Seminar/Conference/Meeting adt: Mi pawimawh hova meeting neihnaah hman khat daih plastic bottle chhawp loh emaw, tui chhawp miah lohna te, hman nawn theih bottle/jug leh no an chhawp hmuh tur a tam hle a. Hei hi hmuh a nuamin changkanna ṭha tak a ni. Kan intihhmuh zel hian sum a hek loh zawk bakah bawlhhlawh ṭawih thei lo a tih tlem phah ve zel bawk ang. Conference hall-ah LED panel kan dah tawh a nih chuan flex/cloth banner tar tel kher hi ṭul lova mipui sum khawhralna a nih bakah, environment lam ngaihtuahin tih tlem theih a nih a beiseiawm.
Meeting/seminar adt ah ni khat daih pangpar khawi aiin, a hmun azirin potted plants emaw, tuia khawi emaw rem mai hi intihhmuh chi tak a ni. Union Minister hova an meeting kan lo hmuh leh ṭhinah pawh hmuh tur a awm ṭhin hi. Ram changkang zawka political leader-te meeting-te hi en ila, fresh flower hi an khawi a nih pawhin buk deuhva khawi luk aiin, te reuh té smart deuhvin an khawi mai zel. Tam takah phei chuan an dah lem lo.
Inrenchem sawi hian ṭhenkhat chu kan nuih a za deuh ṭhin. Hetiang thil te tak te tea langah pawh inrenchem kan peih loh chuan a tam thamah phei chuan a har hle ang. Inrenchem hi sawrkar bakah chhungkua pawhin kan phak tawkah kan mamawh vek zawk a ni. Mimal, chhungkua leh sawrkar pawh ni se, a hlut zawng (net worth) tehna hi sum lakluh zat ni lovin, THIL NEIH HLUT ZAWNG 'MINUS' BA NEIH ZAT a ni tlat si a.
- RSC Rohmingliani, Chaltlang Lily Veng