Lunglei khaw chhûng kawng siam mêk a lungchhiatthlâk!
Tunlai hian Lunglei khaw chhûng kawngte chu siam (re-surfacing) mêk an ni a. Kawngpui an luanna hi a pan hleng hlawng hle! Kum tinin kawngpui hi kum tawp lamah re-surfacing an ni ṭhin a. Aizawl leh Lunglei kawngpui luan inthlauhzia hmuh hian, rilru a na lo thei lo!
Tun hnai maiah Tripura ka zuk kal a, hmar lam Thingtlâng khaw kawng ka rin ai daihin an lo ṭha. Aizawl aṭanga Lunglei panna kawng pawh, Aizawl Dist huamchin zawng a mam ṭhain alkatra an chulh chhah hle. Tichuan, Thenzawl kan han thleng ta a. Kawng a lo chhe ta bik êm êm mai a nih hi!
PWD lamin pawisa hi kawngpui thui zawng (km) emaw, kawngpui tam lam emaw aṭanga chhut lovin Dist. zau zawngin an sem (allocate) a. Hei vang hian nasa takin Aizawl leh Lunglei pawisa dawn a inthlauh phah a ni. Lunglei Dist. hi a zauin kawngpui a tam êm êm mai a, chu chuan sum indaih lohna a thlen nasa hle.
Kan pawisa dawn ang chhun pawh sem sawm a han ni leh a, khawi kawngpui mah hi alkatra chhah telh tawlha han zulh ngaihna a awm ngang lo a ni ber. Awm pawh ni se, tih tumna tun thlengin a la awm lo kum tin chu a nih ber hi. A siamtute lah hian rûn dálah an siam ve lek fang emaw tih mai tur a ni ziah bawk!
Aizawl to Lunglei kawngpui hi han thlir ta ila. Hmuifang Area bik hian a hranin pawisa an dawn miau avangin Aizawl tân chuan Maubuang vel thleng bak khawih a ngai lo, tihna ang velah lo ngai ta ila. Lunglei tân erawh Thenzawl aṭanga Pukpui thleng rawkin siam a ngai ta bik a ni!
Hei hi ZPM MLA tling tharte pawh hian an hriat a ṭha hle ang. Lunglei Area bik kawngpui chhe bik êm êm reng hi a rilru natthlâk kumkhua reng dâwn em ni? MNF leh Congress MLA rualte kha englai mahin Lunglei tân an ṭang tlâng thei ngai lo a. Lunglei hamṭhatna turah takngial pawh an ṭangho ngam ngai lo a nih kha!
ZPM MLA rualte lakah hian Lunglei mipuite hian beiseina kan nei sâng hle a. A ṭul hunah chuan Aizawl lama an hotute pawh kalh rap rap ngam turin kan duh dâwn a ni. A ni lova, MNF leh Congress MLA-te ang leka Aizawl lama an hotute mawng liah hreh lo ang kha an nih vaih chuan, mipuite hian kan ngai thiam tawh hauh lo ang tih ka ring tlat a ni.
- Lalremliana Pachuau