CHATUAN SALEM KAWNGKHAR ROPUI CHU KAN TAN A RAWN HAWNG LEH TA

Ni e, kum sawm chuang liam ta Mizoten kan tana Lal thar lo piang kan lo hmuah leh kan lo lawm ṭhin dan te kha, tun hunahte hian mitthlaah a thar uai uai ṭhin.

Hun leh ni a lo her danglam zel a, hun eng emaw ti aṭang khan Krismas lo thleng tur kan lo hmuah dan leh lawmdan te chu a lo danglam zo ta, heng zawng zawngte hi ngun takin han zirchiang ila, lungawi a va har ta em.

Tunlai changkanna hnuaia Krismas lo thleng tur kan lo hmuah dan tlangpui chu chhung tin hian kan hrechiang hle awm e. Chhungkaw tam takah chuan, "Lungngaih hapta a ni e," an lo ti; mathlawn lovin. Kan Tu leh Fate'n mahni in chhung lum aṭanga urlawk duhtawk mai lo va, khawii maw lai aṭang khera an lo hmuah ṭhinna chuan chhungkaw tam takah lungngaihna leh manganna thlenin, nu leh pa tam tak tan lungngaih haptaah kan chantir ta hlauh zawk ṭhin ta a nih hi.

Hmuah dan duhawm lo leh lungchhiatthlak tak taka kan lo hmuah, kan Chhandamtu-lo-pianga chu thinlung lama lo lawm lovin ṭhalai tam tak zingah kan nu leh pa, chhungkuate pawhin min remtihpui hauh loh tur lam hawiin, hun kan hmang a, kan thinlung a lam a hawng lovin, khawvel lawmna leh mawina lama kan thinlungte hawng zawkin he Kristiante'n kan hunpui hlutawm tak hi kan hmangral fo ta mai, a va uiawm em. Urlawk zante chu Kohhran hote zaikhawmna lam a thawl em em laiin, a behbawm lamah ve thung chuan kan zi huai huai ang lawi a. Kan hlim chhan kan Chhandamtu hian engtin ngai ang maw?

A thui lutuk dawn. Tunhma Krismas lo thleng tur ve thungah kha chuan nula leh tlangvalten masi thing tur an phur/pu a, tlangvalten masi ruai ṭhehna tur changel hnah an la a, urlawk hma ni 2/3 vel la awmah Sial kaiin ropui taka khawchhung rawn luhpuiin, sial lu; a ki leh ki inkarah te Shillong tlangsam parte tar chuaiin, Pitar/ Putar/naupang thlengin an lo hmuak ṭhin. Urlawk zan ni se, zanlai thlen hmain khawi khawiah emaw zo chhangban; kurtai nen pir hnuin zaikhawmna lamah tui takin, nula leh tlangvalte pawh an zaikhawm tlaivar mai ṭhin. Chu'ngte avang chuan nau piang lawma Kohhran inkhawm (Masi Ni) an tlem phah ngai chuang awm lo ve.

Tunhma Masi zaikhawmna kha mimal Inah nghah a ni ṭhin a, Urlawk zan aṭanga kumhlui thlah zan thleng tlaivar ṭhinte pawh an awm sup ṭhin, ṭhenkhat tlaivarte chu "Pawngsen tlaivar" te pawh an lo inti ve ṭhin reng a ni.

Mimal thlirna aṭang chuan Krismas hunah hi chuan khawpui lam ai hian khawpui pawn lam Kohhran hrang hrang hian kan Chhandamtu lo piang kan lawm dan hi a hlawkthlak deuh zawk em aw? tiin ka ngaihtuah ṭhin.

Min tlantu Lal ber thar lo pianga chu a hming Lal Krista Imanuela tia mas zaikhawmna Ina zai dup dup thawm hian, kei zawng ka lung min la len reng dawn zawng a nih hi.

- Lawta Khiangte