WAYNE COLE - II By : Joe Ngurdawla

A thu ziak tingaihnawm tura a character-te inbiaktawnna inhmeh taka thuzeh a thiam a. American poet John Keats-a thukhawchang pawh mawi takin a rawn zep a. “Ka thil duhzawng leh ngaihtuahnate hi buhzema ka sengkhawm hma hian famchan ka hlau thin mang e,”tiin mawi takin a dah a. A chang leh William Shakspeare-a hming a lam a, Italian lemziak thiam leh hmingthang Leonardo da Vinci pawh a hmaih chuang lo. English poet leh Playwright, Robert Browning-a poem ‘The Last Ride Together pawh ‘Di nena ramchuan hnuhnung ber’ tiin mawi takin Texas Star Johny a sawichhuahtir bawk.

A thawnthu hian hmasanga Texas leh Mexican cowboy hoin zana awmtual mei,camp fire, ai taih chunga ṭingṭang nena lungleng taka an zaite min mitthlatir a. A hunlai mil zelin hla pawh a dah thiam a. Cowboy hla, 'Coming Home From the Hill' tih pawh 'Tlangnuam aṭangin in lam ka rawn pan e,' tiin a dah a. He hla hi hmasanga cowboy-ho ramchhuah hla a nih thu pawh min hrilh nghe nghe. A thuziakah hian a setting a hre chiang a,chutah chuan chhiartute min chenpui ṭhin. Kan ziak mi, muangin chawl se, Lalhmingliana Saiawi khan, "Thawnthu kan ziahin, hunlai nei a nih chuan a veng hming te, a hunlaia mipui vantlang titi tlanglawn te, a hunlaia thil lar te, hla leh ennawm pawh, a hunlaia mi ang zel a ni tur a ni," a tih ang khan, Joe Ngurdawla pawh hian Wayne Cole-a thawnthu a ziah hian zirchianna, research works, a uluk hle tih a hriat.

Poetry zar pakhat, Ballad, chu chanchin sawina hla tiin he thawnthuah hian min hrilh daih tawh a. Mizoa ballad kan neih lar deuh chu, Rairahtea, Hrawva phuah a ni a. Kha tih lai daih tawha ballad awmzia a lo man lutuk tawh te khan literature kawtthlera a kawngbo lohzia a tichiang hle.

Heng bakah hian sapṭawng ṭhenkhat Mizo ṭawng mawi tak, tawi fel siin a dah nual bawk a. 'Meet Me in Texas Moonlight' - Texas chhawrthla eng hnuaiah min tawk ang che, ‘Love me Tender’ - Dawhthei takin min hmangaih teh, The Sun Shines Bright’ - Turni a eng ngei mai, ‘Flying Kiss’ - Inral fawh, rala infawh, ‘Stranger When We Meet’ - Mikhual takin kan inhmu, ‘Don’t say it’s too late’ - A tlai deuh ti lul teh suh, ‘They fought well’ - An pasalṭha tlang hle, ‘Just out of reach’ - Kawlvalenchham. Hetianga mawi tak, tawi te si, a awmzia fiah taka a dah mai thei hian thu leh hlaa a rilzia leh a thiamzia a tarlang chiang hle a ni.

Lehkhabu pakhat, Literature Lamtluang-ah khan H.Laldinmawia chuan, ‘Buaina leh harsatna tel lo mihring nun tluang purh hi thawnthu ngaihnawm a ni ngai lo. Chuvangin, buaina/harsatna [conflict] thlen dan ngaihnawm leh buarchuar, awihawm bawk si hi a chhiartu tan a ngaihnawm’ a lo tih ang khan, he thawnthu hi buaina leh harsatna hrang hrangin a zem chuat a, conflict-in a khat a ni ber a. Chutih laiin chhiartute tana ngaihnawm tawk chauhin suspense a dah thiam hle bawk.

A ziaktu hi a feminist thawkhatin ka hre bawk. A thawnthuah hian hmeichhiate hi mipa tluk thoin insual thiamah te, finna kawngah leh remhriatna kawngah te a dah a, a dah hniam bik lo. 1970 chho daih tawha hetiang mindset a nei ringawt pawh hi û tak a ni. Tin, hmeichhe tisa mawina te hi a chik a, he lehkhabu-ah pawh hian a tlangaupui awl lo. West Ocean Club, Marmont Restaurant, Nordic Nightmare Hotel vela nula, mawngbawr nalh leh fuke sei thlerhthlawrh, an han lam leh inthing vel,a sexy thei ang bera an han inpho kual vel te hi mitthla nghal theih khawpin chhiartute a boruakah min chentir thei hial ṭhin.

A thawnthubu hmasa ber Meet Me in Texas Moonlight ah khan Wayne Cole-a hmel a la lang rih lo a, Spy Thriller tia sawi theih a la ni lo a. Hetah hi chuan hmangaihna chungchang - Johny te chhungkua hlimzia leh a nupui, Mrs Mitchelle nen an inhmangaihzia te kan hmu a. Johny-a a zinchhuah ṭuma Hotel Delight-a Kelly, nula nalh leh zei tak chu hotel-a zai ṭhin nen an intawn a, hmangaihna khura an tluk dun tak chanchin leh, chumi nghawng chu kan hmu bawk a. Chuvangin, hemi bu hi chu Romance lam a ni mah zawk. Hetah hian kawppui neih tawh hnua hmangaihna khura a tluk luh theih dan te, chumi avanga a boral phah hial theih thute kan hmu a, chumi piah lamah hmangaihnain ramri a kham lohzia kan hmu bawk. Hmangaihna ziarang hrang hrang thiam takin a tarlang a. Nu leh fate inkara hmangaihna chu Sam-a leh a nu Mrs Mitchelle aṭangin kan hre thei a. A pa Johny-a’n nula zuna an chhungkua a uai bosan hnu a, Sam-a, kum sawm chauha upa felzia, a nu leh a naute tana innghahna tlak a nih dan leh a thlamuanpuiawmzia kan hmu. Hei hian Mizo society-ah pawh mipafa dinhmun pawimawhzia min hriattir awm e.

(Issue dangah chhunzawm a ni)

- Robert Laltinchhawna