WAYNE COLE - III By : Joe Ngurdawla

Lehkhabu ziaktu hian chhiartute hi thu ngaiah rei tak min chenpui ngai lo. Entir nan, Berlin,Tokyo leh hmun dang hotel-a Wayne-a teho khabe ruh thlawk deuhthaw leh ring tliak hnawp khawpa an inkhawih chawrh chawrh min thlirtir a. Rei vak lo hnuah club leh hotel lama nula sexy tak tak, mawngbawr thing khur vel leh hmuhnawm taka an lam a, rimawi nena an ri dup dup min han thlirpui leh a. Chumi phenah chuan thumbawhkaihsawih ang maia mawiin, hmangaihna ṭawngkam mawi tak min ngaihthlaktir leh a. Johny a han ṭawngchhuahtir dante hi, ‘Pangpar mawina leh hlutzia kan hriat tak tak hmain kan thliak a, hun a lo inher zel a, pangpar mawi lainatna kan lo nei a, kan thinlunga a mawi apiangte duhna a lo awm a, kan thliah tawh par a chuai a, pangpar khawi kan la duh si. Kan lo fimkhur lo deuh a, thliah tawh par hlingin min chhun a, a vuai turin kan lung a tileng leh a, kan ṭap ṭhin a ni’. Hmathlir thui tak a neihzia pawh family planning chungchang a sawi aṭang hian a hriat theih.

‘America rama mingo hoin family planning hmanga fa pakhat emaw, pahnih emaw lek lek an neih si chuan, tun aṭanga kum sawmnga velah chuan America ramah hian mi dumho hi majority an lo ni ang a, mi ngoho hi duh duhin an la sawisa ve ngei ang’ tih te hian ram chakna leh dinhmun hriltu pawimawh tak chu, mihringte kan ni tih a lo hmu fiah daih tawh tih a lantir.

Thil tam tak min hrilh a, min finchhuaha min zirtir bakah min chawk hlim leh zauh ṭhin. Berlin’s Calling [Berlin Kohna] a sawifiahna te hian Berlin khawpuia feh chhuak tura kohna, a dawngtu tana huphurhawm tawp, a chhiartu tan erawh a ṭihbaiawmnaah hlimna min pe hlauh thung a. Han chhiar mah ila - ‘Berlin kohna chanchin hi sorkar lian mi huaisen leh pasalṭha pawh an khurh ṭhinna hmun, tleitiri sakhmel ṭha leh ṭangnem vanga hmelmaten American pasalṭha an tukdaihna hmun, inchona ri leh invauna ri chamchi karah chengrang an kau ṭhin’ tih te hian Berlina kohna dawng ve riakah chhiartute min chan a. Chutih rual chuan chu kohnain a ken tel inpekna tak tak, ram chhanna pasalṭha rilru put a ṭulzia min ngaihtuahzuitir awm e.

A bu chhunga mite inbiakna hi ngaihnawm takin a sawi thiam lehzel a. Nina Fleming leh Wayne Cole- a te fing taka a tititir dan te hi. Nina Fleming chuan, “Mi fak derna kawngah hian Doctor nihna certificate i nei hial lo maw ?” melh deuh ralh chung hian a han ti a. Wayne Cole-a chuan, “Fak derna kan tih hi a der hlei nem, an hnen aṭanga thil hmuh kan duhte chauh hi a ni kan fak peih ni. Kutdawh khawlaia vak mai mai, ‘I pian a nalh,' tiin emaw, 'I hmel a ṭha' tiin emaw fak ta hi ka hre ngai lo,” a ti a. Hetiang hi ‘truism,’ thudik tlanglawnsa a ni a, a hmanna awm leh hman hun a hre ṭhin.

Joe Ngurdawla hian ṭawngkam hman uar bik a nei a, mihring quality sawi nan, heng-fa mai, fe mai, kher mai tih te hi a hmang uar a. Hmelṭha kher mai a lo kal a, Hawaii guitar ri chu a mawi kher mai, Ring fe mai hian a sawi a, tih angte hi. Siamkima Khawhring sawi danin, vawiina he lehkhabu kan tlangzarh hnu hian - kher mai, fa mai, fe mai tihte hi hmangtu kan pun belh chuan literature-ah contribution a neih belh leh dawn tihna a ni a. Vawiin thlenga kan ṭawngkam hman lar tak pakhat Ramhuai Speed tih pawh hi amah Joe Ngurdawla kamchhuak, he lehkhabu aṭanga kan chharchhuaha kan hman zui tak a ni a, a awmzia a fiah nghalin a tawi fel a, hre lo pawh kan awm awm lo e.

Khawvel hmun hrang hrang chanchin min titipui laiin Mizopa tapchhak zawlah titi khawchang min han sawipui leh daih bawk a. Wayne Cole-a leh Breadly [Russian uisathiam] invehtawn a, inthah tum rana an inpeltawn laiin, Breadly chu Tokyo lamah a lo put boru leh daih mai a. Breadly-a tlanchhia[?], pitbo daih Wayne Cole-a’n a han ṭawngkhum zui dante hi a Mizopa ṭawngkam ngawih ngawih mai. ‘Nizan lam khan sazu fing deuh chu buhzem aṭanga tlan chhuah a hun tawh reng a ni, Breadly-a zawng sazu fing tak a lo nih awm hi,’ han tihte hi tapchhakzawl titi dik tak a ni.

A thawnthua character-te hi a hmei a pain, a awm tawk, mawi leh nalh si hian a fak thiam leh bawk a. Wayne Cole-a a han sawi dan te hi- ‘Pangpar buk aṭang chuan suit buang ha hian Wayne-a dik tak, finna rang lutuk leh thiamna chintawk neitu, hlauhna hi khawiah nge a awmm tih pawh hre ngai lo chu a lo chhuak phawng a’. Heta ṭang mai pawh hian Wayne Cole-a hi eng ang mi nge a nih kan hre thei nghal awm e.

Joe Ngurdawla hi thu leh hla leh hriatna lam mai ni lo, insual dan thlenga hre hneh leh namai lo tak a ni leh zel em ni aw? tih mai turin insual dawna hisap leh rilru put dan tur a sawite hi han ngaihthla ila. “Ṭek tla anga rangin i hmelma i khawihna lai tur leh i inven dan tur lo hisap la, second khatah i hisap chu a dik dawn leh dawn loh ngaihtuah hman la, i rilruah darthlalanga i inhmuh anga chianga i beih dan tur i hmuh chian hnuah Pathian a ran tluka rangin che la. Bible[Christian thurin]-a Diabola, van aṭanga an paihthlak pawh a la zam chuang lo a, Pathian a la do ṭang ṭang ang hian huaisenna nei ang che,” tia mite fuih tur chuan a taka thiam nih a ngaih hmel tlat a ni.

Wayne-a leh Jarry te inbeihna hmun, Opus tlang a sawi ṭihbaiawm thiamzia te hi. Kei chuan, he hmun hrang tak mai leh ṭihbaiawm taka a sawina ṭawngkam pui tak hi Wayne Cole-a thawnthubu Hlado atan ka hual daih tawh nghe nghe a, hetiangin, “Berlin khawchhak daifem, Opus tlangdung chhawrthla de tir engah, daifim a tla ngam lo, a reh vek mai, thli pawh a thaw ngam hek lo. Sahrang zawng pawh an hram lo, mahse chhimbuk zawk a hram. American pasalṭha huaisen suattu, Wayne Cole-a leh Jarry, Russian khawchhak mi hrang, Istanbul sorkar amaha chai buaitu, Korean silaimu zawng zawng pawhin a zawn hmuh theih loh chu inhmatawnin an ding ta, ramhuai pawhin rapthlak an ti rapthlak.

A tawp berah chuan he lehkhabu ngaihnawm tak hian rapthlak taka chhiartute leh Mizo literature-a nghawng ṭha tak a neih ngei hi ka duhsakna a ni e. Ka lawm e.

- Robert Laltinchhawna