Mizoram Pwd Kawng Brtf Kuta Pek Ṭhen
Ni 28.12.2023 tlaia BRTF officer pathum tena kan Chief Minister Pu Lalduhoma hnena an thusawi, Mizoram PWD Road ṭhenkhat anmahni BRTF (Pushpak Project) kuta pek ṭhen dilna kha TV ah kan lo hre hlauh mai a. MNF Sorkar hmasa (term hmasa) khan Mizoram chhunga BRTF kawng enkawl lai mek chu PWD kutah tam tak kha lak a nih khan, pawi ka lo ti em em mai a. Kan ram hi zau lo mah se la, motor kawng a tam ve ta hle a. Keimahni Mizoram Sorkar sum ringawta ṭha taka enkawl sen a lo harsa ta a. Chua chhapah kan hriat ṭheuh angin Mizoram Sorkar hian leiba tam tak a ba mek a. Keimahni budget ringawt chuan kan kawng hi kan enkawl ṭha seng tak tak dawn lo tih chu hriat sa a ni.
Chuvangin, BRTF ten CM hnena kan motor kawng ṭhenkhat pek let an dilna hi phalsak ngei ngei turah ka ngai a ni. Khami tlaia an kawng sawi bik emaw lek bakah khan Sorkarin pek ṭhen belh àwma a ngaihte pawh pek ṭhen ni se la. Central sum hmang tur an ni bawk a, kan Sorkar a zangkhai phah huai dawn a ni. Central Project hnuaia mi an ni bawk a, sum pawh an hnianghnar zawkin a rinawm a. Kan State sorkar PWD Department tan pawh a zangkhai phah zawk bawk ang a, kawng pawh an enkawl ṭhat phah ngei a rinawm.
BRTF kawng siam hi ṭha tawk lova sawi a awm ṭhin a. A dikna lai pawh a awm mai thei e. Tunah chuan Central YMA hnuaia Branch YMA tin hian BRTF kawng pawh ni se, PWD kawng an siam chhiat leh ṭhat chungchanga an vil ang hian BRTF kawng siam mek tur pawh hi vil ngun tlat se. An material hman quality rawra, balu, etc te endikpui vek se. Alkatra phah chin a chhah tawk em tih te, branch concern tinin vil tlat bawk se. Kawng ṭha tak kan neih phah bakah min zangkhai huai ngei ang.
Kan ZPM sorkar thar hian engtin nge a ngaih ve pawh chu ka hre chiah lo na a, chhim lamah kum 9 ka service chhung khan 72 RCC (Road Construction Company) Lawngtlai leh, 73 RCC Lunglei to Tlabung Headquarter Pachang Camp Officer te, Major te nen kan inngamtlak bawk a. An kawng siam a ṭha hle ve vein ka hria. Hetiang hi a nih avangin Project Pushpak kutah hian kan kawng eng emaw zat siam tura pek ṭhen hi kei chuan ṭha ka lo ti khawp mai. Sorkar thu thu a ni ang chu.
- S. LIANHRIMA HAUHNAR