Revd Chuauṭhuama kan chán ta!

Revd Chuauṭhuama hi Vanglaini columnist a ni a, August 19, 2013 khan Vanglaini chanchinbua a huang, 'Revd Chuauṭhuama Huang' tihah thu ziak ṭanin, chawlhkar tin Inrinni apiangin a thuziak tihchhuah a ni ṭhin. Revd Chuauṭhuama Huangah hian kum 10 leh thla li vel thu a ziak hman a, a thuziak hi 500 chuang fé a chhuak tawh a ni.

Pian leh mûrna:

Revd Dr Chuauṭhuama hi Tawna leh Buaii te fa pasarih zinga naupang ber a ni a, April 1, 1947-ah Bûkpui khuaah a piang. February 15, 1974-ah Lalchhumi nen Dawrpui biak-inah inneiin, fanu pakhat Dr Elsa Lalramzauvi Pachuau an nei a, tu pathum an nei. Mizoram Synod aṭanga a pension hnuah Ramhlun Venglaiah an inbéngbel a ni.

Zirna leh hnathawh:

Revd Chuauṭhuama hi lehkha thiam thei tak a ni a, Bukpuiah primary school leh middle school a zo. Kum 1962-a middle school pawl 6 exam-ah first division-ah a pass a, Zoram hmarchanah pahnihna a ni. Kum 1963-ah Mizo High School, Aizawlah high school a lut ṭan a, kum 1965 thleng tluang takin zir mah se, rambuai lai, kum 1996 khan zir chhunzawm thei loin, an khuaah hna a thawk. January 1967 khan man niin, Tezpur Jail-ah kum thum dawn a táng a, January 1970-a a chhuah hnuah Synod High School-ah pawl 10 a zir a, 1972-ah matric a zo.

Matric a pass hnuah kum khat chhung zirtir hna a thawk a, kum 1973-1977 chhung Mizoram Home Guard hnuaiah LDC hna a thawk. Hna thawk chung hian Pachhunga Memorial College (evening shift)-ah Pre University (PU) course leh BA a zir chhunzawm. Kum 1976-ah BA zoin, distinction-ah a pass a, NEHU-ah pahnihna a ni.

Kum 1978 aṭangin Hrangchhuana H/S-ah zirtirtu a ni a, headmaster hial a ni hman. Mahse, Hrangchhuana H/S-a kum ruk zet a thawh hnuah Pathian thu a zir duh avangin a bànsan a ni. September 1983 aṭangin United Theological College, Bangalore-ah Pathian thu a zir a, kum 1987 khan first class-ah a zo. BD a zawh hian kum 40 a ni tawh.

UTC-a BD a zir chhung hian academic prize awm zawng zawng chu a la deuh vek a, first prize 13 leh second prize pahnih a la a; BD-ah hian Senate of Serampore College hnuaiah pakhatna niin, kum 1988-a Vanapa Hall-a Serampore College Convocation-ah Senators’ Prize for Highest Proficiency a dawng nghe nghe.

Kum 1988-1990 chhungin Cambridge University, Britain-ah M.Phil (Old Testament & Hebrew) a zir a, a zir chhungin award a dawng nual. M.Phil a zawh hnûa Mizorama a hàw pahin Jerusalem, Israel-a St. George’s College-ah ‘The Bible and its setting’ course a zo leh a ni. Kum 1998 khan Netherlands ramah ‘Reading the Bible from the Jewish perspective’ course thla khat chhung a zir a; Mizoram pana a haw lamin Jerusalem-ah chawlhkar khat chhungin Isua sûlhnu uluk takin a zir leh bawk.

Rawngbawlna lam:

Kum 1990 Synod inkhawmpuiah probationary pastor atan lak a ni a, Lungleiah kum thum chhung pro pastor a ni. Kum 1993 Synod inkhawmpuiah pastor atan nemngheh a ni a, Aizawl Theological College-ah zirtirtu tura dah niin, January 1994 aṭangin a thawk a, a hun lai chuan Old Testament zirtir thei awm chhun a ni. Pastor/minister a nih chhung zawng ATC-ah a thawk a, pastor bial vawn a nei lo.

Revd Chuauṭhuama hi Synod hnuaiah a thawk rei hman lo a, upat lama Pathian thu zir a nih avangin kum 17 chauh (1991-2007) a thawk hman a, January 1, 2008 khan pension-in a chhuak. A pension hnuah ATC-a M.Th. (Old Testament) hawn a nih avangin kum 2011-2015 chhung zirtir hna a thawk leh bawk.

Synod-a a rawngbawlna

1. Pro pastor, Lunglei Bial (1991-1993)

2. Lecturer, ATC (1994-2001)

3. Registrar, ATC (2002-2007)

4. Synod Secretary Jr. (2000)

5. Synod Secretary Sr. (2001)

6. Synod Literature & Publication Board (1998-2000)

7. Mizo Sunday School Union (2001-2003)

8. Presbyterian Publication Board (2004-2006)

9. Research & Evaluation Wing (2004-2006, 2019-2021)

10. Synod Worship Committee (2007-2015)

11. Christian Home Committee (2001-2002)

12. Synod Social Front (2010-2012)

13. Synod Pastoral Committee (2013-2018)

14. Pension & Provident Fund Board (2013-2018)

15. MTC Governing Committee (2019-2021)

16. Synod Executive Committee (2019- a thih thlengin)

ATC-a a awm chhungin hostel warden (1995-1997), Book Service manager, Didakhe chanchinbu editor (2002-2007, Mizo Theological Literature Committee manager (2002-2007)-te a ni. ATC hmasawnna turin ṭan a la nasa a; kawng leh kawlphetha ṭha an neih theih nan te, telephone connection leh cable TV connection an neih theih nante a thawh hlâwk hle. ATC bul ram lei belh leh ATC kawta high mast phunnaah sûlsutu ber pakhat a ni.

Presbyterian Church of India (PCI):

Kum 2000 Synod inkhawmpuiah khan Revd Chuauṭhuama hi PCI Executive Committee member atan ruat a ni a, kum 2000-a PCI General Assembly, Kolasib-ah Bible study a neihpui. PCI Executive Committee member-ah hian term thum a awm a, kum 2009 thleng khan a awm a ni.

Bible Society of India:

Revd Chuauṭhuama hi Bible Society of India (BSI) tana ṭangkai tak a ni a, BSI hnuaia North East India Translation Advisory Committee-ah member a ni reng tawh ṭhin a, a thih thlengin BSI Aizawl Auxiliary member a ni. Aizawl Auxiliary-ah cchief translator a ni mek a, Mizo ṭawnga Bible lehlin mekah hotu ber chan chang mek a ni bawk.

Pension hnu lam:

Revd Dr. Chuauṭhuama hi Synod aṭanga a pension hnuah Dawrpui Kohhran sikul, Centenary School, Dàwrpui Church-ah January 15, 2008 aṭangin principal a ni a, hun eng emaw chen a thawk. Mizoram sorkarin Education Reforms Commission, Mizoram a dinah member a ni a, kum 2010-a Higher & Technical Education Entrance Examination result buai ching fel tura sorkarin a thlan mi pali zingah a tel.

Tualchhung kohhran:

Kum 2008 aṭangin Ramhlun Vengchhak Kohhranah an lawi a, ṭum eng emaw zat Kohhran Committee chairman leh Sunday School superintendent a ni tawh. Pastor Bialah chairman a ni tawh a, Aizawl Bethel Presbytery-ah moderator a nih tawh bakah, committee peng hrang hrangah a tel tawh bawk. January 1, 2024 kum thar ni khan chawhma inkhawmah thupui a sawi a, Pathian thuchah a sawi hnuhnung ber a ni.

Thu ziakmi a ni:

Revd Chuauṭhuama hi ziakmi a ni a, ama pualin lehkhabu 58 a ziak tawh a, mi dang nena an thawhhona leh a a buaipui lehkhabu 17 tihchhuah a ni tawh bawk. Mizo Academy of Letters 'Thu leh Hla' chanchinbuah editor a ni mek a, chanchinbu hrang hrangah a thuziak eng emaw zat a chhuak tawh bawk a ni. Kohhran tana a thawh hlawk avang te, thuziak lama a sûlhnute avangin December 4, 2021 khan Serampore College (University) chuan Doctor of Divinity (honoris causa) a hlan nghe nghe.

Mizo zinga Cambridge University aṭanga degree la hmasa ber a ni a, Pathian thu zirna - pawm dan leh hrilhfiahna kawnga Mizote zinga thawh hlâwk ber pakhat a nih avangin ZONET Cable TV chuan ZONET AWARD 2007 a hlan a; Mizo Writers Association pawhin thu leh hlaa chawimawina a pek ṭhin Literary Award chu kum 2014 khan an hlan bawk.

Nihna pawimawh dangte

Revd Chuauṭhuama hian nihna pawimawh tak tak dang a nei nual a, chung zinga ṭhenkhat chu hengte hi a ni:

1. Education Reform Commission, Mizoram (2009-2010)

2. Mizo Language Committee (2010 - tun thlengin)

3. Member, Appeal Committee, MBSE (2010, 2013, 2014)

4. Member, Pachhunga University College Development Committee (2013 - tun thleng)

5. General Secretary, MZP Headquarters, Aizawl (1972-1974)

6. President, All Mizo Students Federation (1973-1974)

5. President, Aizawl High School Students Union (1972)

6. Secretary, Chapchar Kut Committee (1972-1973)

7. Treasurer, Carey Society (United Theological College, 1986-1987)

A hun tawp lam:

Revd Chuauṭhuama hi mi invawng, hrisel leh harhvâng tak a ni a, khumbeta dam loh a nei khát hle. Synod hnuaia a thawh chhung zawngin earn leave a la miah lo a, ATC-a a thawh chhungin casual leave vawi nga chiah a la. Kum 2002-ah a khup ruh a sawh chhiat avangin sick leave ni 40 a la thung.

January 4, 2024 (Ningani) zing khan amahin a blood pressure a endik a, a sàn deuh avangin tukṭhuan ei khamah Trinity Diagnostic Centre, Zarkawtah a inentir a, ECG-ah a lung (heart)-ah fel tâwk lo a awm tih hmuh a nih avangin Ebenezer Medical Center-ah kaltir a ni.

Ebenezer Hospital-ah hian zan dar 7:00 pelh hretah angiography tih a ni a, a lunga thisen zámah dangtu (block) a nasa hle tih hmuh chhuah a ni. ICCU-ah enkawl nghal a ni a, thawktute'n theihtawp chhuah mah se, January 4, 2024 (Ningani) zan dar 10:20 khan chatuan rama chàwl turin a kal ta a ni.